ମୋହାଲି,୫ ।୯: ପଞ୍ଜାବର ମୋହାଲିରେ ରବିବାର ଏକ ବଡ ଦୁର୍ଘଟଣା ହୋଇଛି । ସହରର ଫେଜ ୮ରେ ଦଶହରା ଗ୍ରାଉଣ୍ଡ ମେଳାରେ ଏକ ଦୋଳି ଖସି ପଡିବାରୁ ୧୫ରୁ ଅଧିକ ଆହତ ହୋଇଥିବା ସୂଚନା ମିଳିଛି । ଏମାନଙ୍କ ମଧ୍ୟରେ ଅଧିକାଂଶ ମହିଳା ଓ ଶିଶୁ ରହିଛନ୍ତି । ଆହତଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି । ଅଧିକାଂଶ ଆହତଙ୍କ ପିଠି ଓ ବେକରେ ଆଘାତ ଲାଗିଥିବା କୁହାଯାଉଛି । ଏହି ଘଟଣା ପରେ ଦୋଳିର ସଂଚାଳକ ଓ ଏହାର କର୍ମଚାରୀ ଘଟଣାସ୍ଥଳରୁ ଫେରାର ହୋଇ ଯାଇଛନ୍ତି । ପୋଲିସ ଘଟଣାର ଯାଞ୍ଚ ଆରମ୍ଭ କରିଛି ।
ସୂଚନାଯୋଗ୍ୟ, ମୋହାଲିର ଫେଜ ୮ରେ ଦଶହରା ଗ୍ରାଉଣ୍ଡରେ ଲଣ୍ଡନ ବ୍ରିଜ ମେଳା ଲାଗିଛି । ରବିବାର ଛୁଟିଦିନ ଥିବାରୁ ମେଳାରେ ବହୁତ ଭିଡ ହୋଇଥିଲା । ହେଲେ ସବୁଠିକ୍ଠାକ ଚାଲିଥିବା ବେଳେ କିନ୍ତୁ ଯେତେବେଳେ ଡ୍ରାପ ଟାୱର ଦୋଳି ୫୦ ଫୁଟ ଉପରୁ ହଠାତ୍ ତଳକୁ ଖସି ପଡିଥିଲା ସେତେବେଳେ ଆଖପାଖର ଲୋକେ ଦୌଡିବା ଆରମ୍ଭ କରିଥିଲେ । କେହି କିଛି ବୁଝିବା ପୁର୍ବରୁ ଦୋଳିରେ ବସିଥିବା ଲୋକଙ୍କ ସମେତ ଦୋଳିଟି ତଳେ ଖସି ପଡିଥିଲା । ଦୁର୍ଘଟଣା ସମୟରେ ଦୋଳିରେ ୩୦ରୁ ଅଧିକ ଲୋକ ଥିଲେ । ଗୁରୁତ୍ୱପୂର୍ଣ୍ଣ କଥା ହେଲା ଦୋଳିରେ ଥିବା ସମସ୍ତ ଲୋକେ ବେଲ୍ଟ ବାନ୍ଧି ଥିବାରୁ ଏକ ବଡ ଦୁର୍ଘଟଣାକୁ ଏଡାଇ ଦିଆଯାଇ ପାରିଥିବା କୁହାଯାଉଛି ।
