ସୋରଡ଼ା, ୧୩।୩(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବ୍ଲକ ଅସୁରବନ୍ଧ ପଞ୍ଚାୟତ ଗୋବିନ୍ଦପୁର ଗ୍ରାମରେ ଶୁକ୍ରବାର ରାତିରେ ଜଣେ ମହିଳାଙ୍କ ସନ୍ଦେହଜନକ ମୃତ୍ୟୁ ଘଟିଛି। ସେ ହେଲେ ଗ୍ରାମର କୌଶଲ୍ୟା ଗଉଡ଼। ତେବେ କୌଶଲ୍ୟାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି।
ପ୍ରକାଶ ଯେ, ଗ୍ରାମର ଗୌରାଙ୍ଗ ଗଉଡ(୨୮) ଧରାକୋଟ ନିକଟ ସରଧାପୁର ଗ୍ରାମର ନରହରି ଗଉଡଙ୍କ ଝିଅ କୌଶଲ୍ୟା ଗଉଡଙ୍କୁ ୮ ବର୍ଷ ପୂର୍ବେ ବୈଦିକ ରୀତିରେ ବିବାହ କରିଥିଲେ। ଉଭୟଙ୍କର ୪ ବର୍ଷର ପୁଅ ଓ ୫ ବର୍ଷର ଝିଅ ଅଛନ୍ତି । ଶ୍ରମିକ ଭାବେ କାମ କରୁଥିବା ଗୌରାଙ୍ଗଙ୍କ ପରିବାର କିଛି ବର୍ଷ ହସଖୁସିରେ ବିତିଥିଲା। ହେଲେ ପରେ ଶାଶୁ, ବୋହୂ, ସ୍ବାମୀଙ୍କ ମଧ୍ୟରେ କଳହ ଲାଗି ରହୁଥିଲା। ତେବେ ଶନିବାର ସକାଳୁ ତାଙ୍କର ମୃତ ଦେହ ଦେଖିବାକୁ ମିଳିଥିଲା। ଖବର ପାଇ ଆଇଆଇସି ରମେଶ କୁମାର ପ୍ରଧାନ, ଏସ୍ଆଇ ସୁନୀଲ କଣ୍ଡୋଗୋରୀ ଗ୍ରାମରେ ପହଞ୍ଚି ତଦନ୍ତ ଆରମ୍ଭ କରିବା ସହ କୌଶଲ୍ୟାଙ୍କ ମୃତଦେହକୁ ଜବତକରି ଭଞ୍ଜନଗର ବ୍ୟବଚ୍ଛେଦ ପାଇଁ ପଠାଇଛନ୍ତି । ମୃତ କୌଶଲ୍ୟାଙ୍କ ପିତା ନରହରି ଗଉଡଙ୍କ ଏତଲାକୁ ଭିତ୍ତିକରି ପୋଲିସ କେସ୍ ନଂ. ୭୮/୨୧ରେ ଏକ ମାମଲା ରୁଜୁ କରିଛି । ଏହି ମାମଲାରେ ଶାଶୁ ପରି ଗଉଡ, ସ୍ବାମୀ ଗୌରାଙ୍ଗ ଗଉଡଙ୍କୁ ପୋଲିସ ଅଟକ ରଖିଥିବା ଜଣାପଡ଼ିଛି। ମୃତଦେହ ବ୍ୟବଚ୍ଛେଦ ନିମନ୍ତେ ସମ୍ପର୍କୀୟଙ୍କ ଯାତାୟାତ ଖର୍ଚ୍ଚ ଖୋଦ ଆଇଆଇସି ପ୍ରଦାନ କରିଥିବା ଦେଖିବାକୁ ମିଳିଥିଲା । ମୃତଦେହ ବ୍ୟବଚ୍ଛେଦ ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଆଇଆଇସି ପ୍ରଧାନ କହିଛନ୍ତି।
