ପାଟଣା, ୨୯/୬ (ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ଥାନା ଅନ୍ତର୍ଗତ ଡାଳପକା ପଞ୍ଚାୟତର କେନ୍ଦୁଯୋଡା ଗ୍ରାମରେ ଜଣେ ୧୮ ବର୍ଷୀୟା ବିବାହିତା ମହିଳାଙ୍କ ସନ୍ଦେହଜନକ ମୃତ୍ୟୁ ଘଟିଛି। ଘର ନିକଟସ୍ଥ ଏକ ମହୁଲ ଗଛରୁ ତାଙ୍କର ଝୁଲନ୍ତା ମୃତଦେହ ସୋମବାର ପାଟଣା ପୋଲିସ ଉଦ୍ଧାର କରି ଜବତ କରିଛି। ମୃତକ ହେଲେ କେନ୍ଦୁଯୋଡା ଗ୍ରାମର ରାଜେଶ ମାଝୀଙ୍କ ସ୍ତ୍ରୀ ଫୁଲବତୀ ମାଝୀ (୧୮)।
ସୂଚନା ଅନୁସାରେ, ଫୁଲବତୀ ଗତ ଶନିବାରଠାରୁ ନିଖୋଜ ଥିଲେ। ତେବେ ତାଙ୍କ ଘରଠାରୁ ପ୍ରାୟ ୧୦୦ ମିଟର ଦୂରରେ ଥିବା ଏକ ମହୁଲ ଗଛ ଡାଳରେ ସେ ନିଜ ପିନ୍ଧିଥିବା ଲୁଗାରେ ଫାଶି ଲଗାଇ ଝୁଲିଥିବା ଅବସ୍ଥାରେ ମୃତଦେହ ମିଳିଥିଲା।
ସୋମବାର ସକାଳେ ଗ୍ରାମର କିଛି ମହିଳା ଜଙ୍ଗଲକୁ ଯାଇଥିବା ବେଳେ ମହୁଲ ଗଛରେ ଫୁଲବତୀଙ୍କ ଝୁଲନ୍ତା ମୃତଦେହ ଦେଖିଥିଲେ। ପରେ ସେମାନେ ଗ୍ରାମବାସୀଙ୍କୁ ଖବର ଦେବା ସହ ପୋଲିସକୁ ସୂଚନା ଦେଇଥିଲେ। ଖବର ପାଇ ପାଟଣା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ଜଣାପଡ଼ିଛି।
ଏହା ଆତ୍ମହତ୍ୟା ନା ହତ୍ୟା ପରେ ମୃତଦେହକୁ ଝୁଲାଇ ଦିଆଯାଇଛି, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ପୋଲିସ ବିଭିନ୍ନ ଦିଗକୁ ନେଇ ତଦନ୍ତ ଚଳାଇଥିବା ବେଳେ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ଆଶା କରାଯାଉଛି। ଖବର ଲେଖାହେବା ସୁଦ୍ଧା ଏହି ଘଟଣା ନେଇ ପାଟଣା ପୋଲିସ ପକ୍ଷରୁ କୌଣସି ଆଧିକାରିକ ପ୍ରତିକ୍ରିୟା ମିଳିପାରିନାହିଁ।
