ଚେନ୍ନାଇ,୭।୫: ତାମିଲନାଡୁରେ ନୂତନ ସରକାର ଗଠନ ନେଇ ସସ୍ପେନ୍ସ ଶେଷ ହୋଇଥିବା ପରି ମନେ ହେଉଛି। ଟିଭିକେ ମୁଖ୍ୟ ବିଜୟ ତାମିଲନାଡୁର ପରବର୍ତ୍ତୀ ମୁଖ୍ୟମନ୍ତ୍ରୀ ହେବା ପାଇଁ ଆଉ ଏକ ପାଦ ଆଗକୁ ବଢ଼ିଛନ୍ତି। ଗୁରୁବାର ସେ ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଭେଟି ସରକାର ଗଠନ ପାଇଁ ଦାବି କରିଥିଲେ। ସୂତ୍ର ଅନୁଯାୟୀ, ବିଜୟ ରାଜ୍ୟପାଳଙ୍କୁ ଆଶ୍ୱାସନା ଦେଇଥିଲେ ଯେ, ତାଙ୍କ ପାଖରେ ଆବଶ୍ୟକ ସମର୍ଥନ ଅଛି ଏବଂ ଶପଥ ଗ୍ରହଣ ପରେ ବିଧାନସଭାରେ ସହଜରେ ତାଙ୍କର ସଂଖ୍ୟାଗରିଷ୍ଠତା ପ୍ରମାଣ କରିବେ।
ସେ ରାଜ୍ୟପାଳଙ୍କୁ ତାଙ୍କ ସରକାରଙ୍କୁ ସମର୍ଥନ କରୁଥିବା ଦଳ ଏବଂ ବିଧାୟକଙ୍କ ସମର୍ଥନ ବିଷୟରେ ମଧ୍ୟ ଅବଗତ କରାଇଥିଲେ। ବୈଠକ ସମୟରେ ବିଜୟ ସରକାରଙ୍କ ସ୍ଥିରତା ବଜାୟ ରଖିବାରେ ବିଶ୍ୱାସ ପ୍ରକାଶ କରିଥିଲେ। ରାଜ୍ୟପାଳ ଆର୍ଲେକର ବିଜୟଙ୍କ ଉପସ୍ଥାପନା ଏବଂ ତାଙ୍କ ଦାବିରେ ସନ୍ତୁଷ୍ଟ ମନେ ହେଉଥିଲେ। ଏହା ପରେ ସେ ବିଜୟଙ୍କୁ ସରକାର ଗଠନ ପାଇଁ ଆନୁଷ୍ଠାନିକ ଭାବରେ ନିମନ୍ତ୍ରଣ କରିଥିଲେ।
ରାଜ୍ୟପାଳଙ୍କ ଏହି ନିଷ୍ପତ୍ତି ସହିତ, ତାମିଲନାଡୁରେ ଚାଲିଥିବା ରାଜନୈତିକ କଳ୍ପନାଜଳ୍ପନାର ପ୍ରାୟତଃ ଅନ୍ତ ଘଟିଛି। କୁହାଯାଉଛି ନୂତନ ସରକାରଙ୍କ ଶପଥ ଗ୍ରହଣ ଉତ୍ସବ ଖୁବଶୀଘ୍ର ଅନୁଷ୍ଠିତ ହେବ। ସୂତ୍ର ଅନୁସାରେ, ଏହି ସମାରୋହ ଶୁକ୍ରବାର କିମ୍ବା ଶନିବାର ଚେନ୍ନାଇରେ ହୋଇପାରେ। ବରିଷ୍ଠ ଟିଭିକେ ନେତା, ସହଯୋଗୀ ଦଳର ପ୍ରତିନିଧି ଏବଂ ଦେଶବ୍ୟାପୀ ଅନେକ ପ୍ରମୁଖ ରାଜନୈତିକ ନେତା ଶପଥ ଗ୍ରହଣ ଉତ୍ସବରେ ଯୋଗଦେବାର ଆଶା କରାଯାଉଛି।
ବିଜୟ ଲୋକଭବନରେ ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଭେଟି ସରକାର ଗଠନ ପାଇଁ ଦାବି କରି ତାଙ୍କୁ ସମର୍ଥନ କରୁଥିବା ଟିଭିକେ ଏବଂ କଂଗ୍ରେସ ବିଧାୟକଙ୍କ ଏକ ତାଲିକା ଦାଖଲ କରିଥିଲେ। ତଥାପି ରାଜ୍ୟପାଳ ଏପର୍ଯ୍ୟନ୍ତ ବିଜୟଙ୍କୁ ସରକାର ଗଠନ ପାଇଁ ନିମନ୍ତ୍ରଣ କରିବା କିମ୍ବା ଶପଥ ଗ୍ରହଣ ଉତ୍ସବ ଆୟୋଜନ କରିବା ସମ୍ପର୍କରେ କୌଣସି ନିଷ୍ପତ୍ତି ନେଇ ନ ଥିଲେ। ଫଳସ୍ବରୂପ ପାଇଁ ନିର୍ଦ୍ଧାରିତ ବିଜୟଙ୍କ ଶପଥ ଗ୍ରହଣ ସମାରୋହକୁ ବାତିଲ କରାଯାଇଥିଲା।
Dharitri – Odisha’s No.1 Odia Daily
