ନୂଆଦିଲ୍ଲୀ,୨୧।୨: ଇଂଲଣ୍ଡ ବିପକ୍ଷ ଆଗାମୀ ଘରୋଇ ଟି୨୦ ସିରିଜ୍ ପାଇଁ ଘୋଷିତ ଦଳରେ ସ୍ଥାନ ପାଇଛନ୍ତି ସୂର୍ଯ୍ୟକୁମାର ଯାଦବ। ମୁମ୍ବାଇର ଏହି ବ୍ୟାଟ୍ସମ୍ୟାନ୍ଙ୍କୁ ଦଳରେ ସାମିଲ କରାଯିବା ପଛରେ ଅନେକ କାରଣ ରହିଛି ବୋଲି କୁହାଯାଉଛି।
ଭାରତୀୟ ଟିମ୍ରେ ଏବେ ଜଣେ ବିଜେତାଙ୍କ ଆବଶ୍ୟକତା ରହିଛି। ଏଣୁ ସୂର୍ଯ୍ୟକୁମାରଙ୍କୁ ଦଳରେ ସାମିଲ କରାଯାଇଥିବା କେହି କହୁଛନ୍ତି। କିଛି ଧୋନୀ ସନ୍ୟାସ ନେବା ପରେ ମ୍ୟାଚ୍ ଫିନିଶରଙ୍କ ସ୍ଥାନ ଖାଲି ରହିଥିଲା, ଏହାକୁ ପୂରଣ କରିବା ଲାଗି ଯାଦବ ଉପଯୁକ୍ତ ବୋଲି କହୁଛନ୍ତି। ସେହିଭଳି ଟି୨୦ ବିଶ୍ୱକପ୍ରେ ମିଡିଲ୍ ଅର୍ଡର ପାଇଁ ଯାଦବ ଉପଯୁକ୍ତ ବ୍ୟାଟ୍ସମ୍ୟାନ୍ ରହିବେ, ଏଥିପାଇଁ ତାଙ୍କ ଚୟନ କରାଯାଇଛି ବୋଲି କେହି କହୁଛନ୍ତି।
ତେବେ ଅକ୍ଟୋବର ୨୮ରେ ଖେଳାଯାଇଥିବା ଆଇପିଏଲ୍ ୨୦୨୦ର ୪୮ତମ ମ୍ୟାଚ୍ରେ ଯାଦବ ଏବଂ କୋହଲିଙ୍କ ମଧ୍ୟରେ ମତାନ୍ତର ଦେଖିବାକୁ ମିଳିଥିଲା। ମୁମ୍ବାଇ ଇଣ୍ଡିଆନ୍ସ ଟିମ୍ ଆର୍ସିବି ବିପକ୍ଷରେ ୧୬୫ରନ୍ର ପିଛା କରୁଥିଲେ। କୋହଲି ଯାଦବଙ୍କୁ ହଇରାଣ କରିବାକୁ ଯାଇ ସ୍ଲେଜ୍ କରିଥିଲେ। ଜବାବରେ କୋହଲିଙ୍କୁ ସେ କିଛି ନ କହିଲେ ହେଁ କେବଳ ଚାହିଁ ରହିଥିଲେ। ଏହି ବିବାଦ ସେତେବେଳେ ବେଶ୍ ହାଇଲାଇଟ୍ ହୋଇଥିଲା। ମ୍ୟାଚ୍ରେ ୪୩ବଲ୍ରେ ୧୦ ଚୌକା ଏବଂ ୩ ଛକା ସହାୟତାରେ ୭୯ରନ୍ କରି ଦଳକୁ ଜିତାଇଥିଲେ। ଏହାପରେ ଯାଦବଙ୍କ ‘ମୈ ହୁଁ ନା’ ପାର୍ଟିଂ ବେଶ୍ ଭାଇରାଲ ହୋଇଥିଲା।
ଘଟଣା ସମ୍ପର୍କରେ ପଚରାଯିବାରେ ଯାଦବ କହିଥିଲେ, ହିଟ୍ ଅଫ୍ ଦ ମୋମେଣ୍ଟ ଯୋଗୁ କୋହଲିଙ୍କ ସହ ସେଭଳି ବିବାଦ ହୋଇଥିଲା। ଉଭୟଙ୍କ ମଧ୍ୟରେ ସମ୍ପର୍କ ଭଲ। ମାତ୍ର ପରବର୍ତ୍ତୀ ସମୟରେ ଅଷ୍ଟ୍ରେଲିଆ ଗସ୍ତ ପାଇଁ ତାଙ୍କୁ ଚୟନ କରାଯାଇ ନ ଥିଲା। ଏହା ତାଙ୍କୁ ବଡ଼ ଝଟକା ଦେଇଥିଲା।
