ନୂଆଦିଲ୍ଲୀ,୧୫।୩: ଭାରତୀୟ ଟି-୨୦ ଦଳର ଅଧିନାୟକ ତଥା ବିଶ୍ୱକପ ବିଜୟୀ ହିରୋ ସୂର୍ଯ୍ୟକୁମାର ଯାଦବଙ୍କ ଘରକୁ ଆସିବାକୁ ଯାଉଛି ନୂଆ ଅତିଥି। ଖୁବଶୀଘ୍ର ସୂର୍ଯ୍ୟକୁମାର ବାପା ହେବାକୁ ଯାଉଥିବା ବେଳେ ଏବେ ପତ୍ନୀ ଦେବିଶା ଶେଟ୍ଟୀଙ୍କ ‘ବେବି ସାୱାର୍’ ଉତ୍ସବର ଏକ ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି।
ଭାଇରାଲ ହେଉଥିବା ଭିଡିଓରେ ସୂର୍ଯ୍ୟକୁମାର ଏବଂ ଦେବିଶା ଏକ ସୁସଜ୍ଜିତ ହଲ୍କୁ ପ୍ରବେଶ କରୁଥିବା ଦେଖିବାକୁ ମିଳିଛି। ସେଠାରେ ବେବି ସାୱାର୍ କାର୍ଯ୍ୟକ୍ରମ ଚାଲିଥିବା ବେଳେ ପରିବାର ଓ ସମ୍ପର୍କୀୟଙ୍କ ଗହଣରେ ଏହି ଖୁସିର ମୁହୂର୍ତ୍ତକୁ ପାଳନ କରୁଛନ୍ତି ଏହି ଦମ୍ପତି। ଦେବିଶା ଗର୍ଭବତୀ ଥିବା ନେଇ ବେଶ କିଛି ଦିନ ହେବ ଚର୍ଚ୍ଚା ଚାଲିଥିବା ବେଳେ ଏହି ଭିଡିଓ ସାମ୍ନାକୁ ଆସିବା ପରେ ଏହା ଉପରେ ମୋହର ବାଜିଛି।
Baby shower of Suryakumar Yadav and Devika 😍❤️ pic.twitter.com/rYudGduOPE
— Jeet (@JeetN25) March 14, 2026
ଗତକାଲି ସୂର୍ଯ୍ୟକୁମାର ଯାଦବ, ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏବଂ ଆଇସିସି ଅଧ୍ୟକ୍ଷ ଜୟ ଶାହଙ୍କ ସହ ମୁମ୍ବାଇର ପ୍ରସିଦ୍ଧ ସିଦ୍ଧିବିନାୟକ ମନ୍ଦିରରେ ପହଞ୍ଚିଥିଲେ। ସେଠାରେ ସେମାନେ ଟି-୨୦ ବିଶ୍ୱକପ ଟ୍ରଫି ସହ ଗଣପତି ବାପ୍ପାଙ୍କ ଦର୍ଶନ କରିବା ସହ ଆଶୀର୍ବାଦ ଭିକ୍ଷା କରିଥିଲେ। ଏହି ଖୁସିର ମୁହୂର୍ତ୍ତର ଭିଡିଓ ମଧ୍ୟ ନ୍ୟୁଜ ଏଜେନ୍ସି ANI ଦ୍ୱାରା ଶେୟାର କରାଯାଇଛି।
ସୂଚନାଯୋଗ୍ୟ, ଭାରତ ନିଜ ଘରୋଇ ମାଟିରେ ଟି-୨୦ ବିଶ୍ୱକପ ଜିତିବାରେ ଦୁନିଆର ପ୍ରଥମ ଦେଶ ହୋଇଛି। ୮ ମାର୍ଚ୍ଚ ୨୦୨୬ରେ ଅନୁଷ୍ଠିତ ରୋମାଞ୍ଚକର ଫାଇନାଲ ମ୍ୟାଚ୍ରେ ଭାରତ ପ୍ରଥମେ ବ୍ୟାଟିଂ କରି ୨୦ ଓଭରରେ ୫ ଉଇକେଟ ହରାଇ୨୫୫ ରନର ବିଶାଳ ସ୍କୋର ଛିଡ଼ା କରିଥିଲା। ଲକ୍ଷ୍ୟର ପିଛା କରି ନ୍ୟୁଜିଲାଣ୍ଡ ଦଳ ମାତ୍ର ୧୫୯ ରନ୍ରେ ଅଲଆଉଟ ହୋଇଯାଇଥିଲା। ଜସପ୍ରୀତ ବୁମରା ୪ ଉଇକେଟ ନେଇ ’ମ୍ୟାନ ଅଫ ଦି ମ୍ୟାଚ୍’ ହୋଇଥିବା ବେଳେ ସଞ୍ଜୁ ସାମସନଙ୍କୁ ’ମ୍ୟାନ୍ ଅଫ ଦି ସିରିଜ’ ପୁରସ୍କାର ମିଳିଥିଲା।
