ମାଲକାନଗିରି,୧୮୯(ଡି.ଏନ୍.ଏ.): ମାଲକାନଗିରି ଜିଲା ଖଇରପୁଟ ବ୍ଲକ ମୁଦୁଲିପଡା ଥାନା ଅନ୍ତର୍ଗତ ଅଣ୍ଡ୍ରାହାଲ ବିଏସ୍ଏଫ୍ କ୍ୟାମ୍ପ ପରିସରରେ ଶନିବାର ୭ଶହ ମହିଳାପୁରୁଷ ମାଓବାଦୀ, ମିଲିସିଆ ଓ ମାଓବାଦୀ ସମର୍ଥକ ଆତ୍ମସମର୍ପଣ କରିଛନ୍ତି। ସେମାନେ ଆଉ ମାଓବାଦୀଙ୍କୁ ସମର୍ଥନ କରିବେ ନାହିଁ। ନିଜ ଅଞ୍ଚଳର ବିକାଶ ପାଇଁ ପୋଲିସ ଓ ପ୍ରଶାସନକୁ ସହଯୋଗ କରିବେ ବୋଲି କହିଛନ୍ତି। ଆତ୍ମସମର୍ପଣକାରୀଙ୍କ ମଧ୍ୟରେ ଆନ୍ଧ୍ର ପ୍ରଦେଶ ଆଲ୍ଲୁରି ସୀତାରାମାରାଜୁ ଜିଲା ମୁଚିିଙ୍ଗପୁଟ ଥାନା ରଙ୍ଗବେଲ୍ ପଞ୍ଚାୟତର ପଡାଲପୁଟ, କୁସୁମପୁଟ, ମଟମପୁଟ, ଯୋଡିଗୁମ୍ମା ଗ୍ରାମର ୧୩ ମାଓବାଦୀ ରହିଛନ୍ତି। ଅନ୍ୟମାନେ ମାଲକାନଗିରି ଜିଲା ଖଇରପୁଟ ବ୍ଲକ ଅନ୍ତର୍ଗତ ଅଣ୍ଡ୍ରାହାଲ ପଞ୍ଚାୟତର ଭେଜାଗୁଡା, ବିଶୋଇଗୁଡା, ଖାଲଗୁଡା, ପାତ୍ରପୁଟ ଅଞ୍ଚଳର ମାଓବାଦୀ ମିଲେସିଆ ଓ ସମର୍ଥକ ଥିବା ଜଣାପଡିଛି।
ମାଲକାନଗିରି ଜିଲାରେ ବିଏସ୍ଏଫ୍୍ କ୍ୟାମ୍ପ ପ୍ରତିଷ୍ଠା ପରେ ଜିଲାରେ ମାଓବାଦୀଙ୍କ ପ୍ରାଦୁର୍ଭାବ କମିବାରେ ଲାଗିଛି। ଲୋକେ ଲାଲବାହିନୀର ହାତ ଛାଡି ସରକାରଙ୍କ ବିକାଶମୂଳକ କାର୍ଯ୍ୟରେ ସାମିଲ ହେଉଛନ୍ତି। ସୁରକ୍ଷାବାହିନୀର କୋମ୍ବିଂ ଅପରେଶନ ଯୋଗୁ ସମର୍ଥକମାନେ ମାଓବାଦୀଙ୍କୁ ସମର୍ଥନ ଦେବାକୁ ପଛଘୁଞ୍ଚା ଦେଉଛନ୍ତି। ଇତି ମଧ୍ୟରେ ଗତ ଜୁନ୍ ମାସରେ ୫୦ ଜଣ ମାଓବାଦୀ ସମର୍ଥକ ଦକ୍ଷିଣାଞ୍ଚଳ ଡିଆଇଜିଙ୍କ ନିକଟରେ ଆତ୍ମସମର୍ପଣ କରିଥିବା ବେଳେ ସେହି ମାସରେ ପୁଣି ୩୪୭ ଜଣ ମାଓବାଦୀ ସମର୍ଥକ ଆତ୍ମସମର୍ପଣ କରିଥିଲେ। ସେହିପରି ଜୁଲାଇରେ ୫୫୦ ମାଓବାଦୀ ସମର୍ଥକ ଜାନବାଇ ବିଏସ୍ଏଫ୍ କ୍ୟାମ୍ପରେ ଆତ୍ମସମର୍ପଣ କରିଥିଲେ। ଶନିବାର ୭ଶହ ଜଣ ଆତ୍ମସମର୍ପଣ କରିବା ମାଓବାଦୀ ସଙ୍ଗଠନକୁ ବଡ ଧକ୍କା ଦେଇଛି। ଏହି ଅବସରରେ ପୋଲିସ ଓ ବିଏସ୍ଏଫ୍ ପକ୍ଷରୁ ଗ୍ରାମବାସୀଙ୍କୁ ଶାଢି, ଧୋତି, ଗାମୁଛା, କ୍ରୀଡା ସାମଗ୍ରୀ ପ୍ରଦାନ କରାଯାଇଥିଲା। ଏହି ସମୟରେ ଶତାଧିକ ମହିଳା ପୁରୁଷ ମାଓବାଦୀ ସମର୍ଥକ ମାଓବାଦୀଙ୍କ କୁଶ ପତ୍ତଳିକା ଦାହ କରିଥିଲେ। ମାଓବାଦୀ ମୁର୍ଦ୍ଦାବାଦ, ଆମ ସରକାର ଜିନ୍ଦାବାଦ ଧ୍ୱନିରେ ବଣ୍ଡାଘାଟି ମୁଖରିତ ହୋଇଥିଲା। କାର୍ଯ୍ୟକ୍ରମରେ ଦକ୍ଷିଣାଞ୍ଚଳ ଡିଆଇଜି ରାଜେଶ ପଣ୍ଡିତ, ବିଏସ୍ଏଫ୍ ଡିଆଇଜି ମଦନ ଲାଲ, ମାଲକାନଗିରି ଏସ୍ପି ନୀତୀଶ୍ ଓ୍ବାଧ୍ୱାନୀଙ୍କ ସହ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
