ନୂଆଦିଲ୍ଲୀ,୧୬।୫(ପି.ଟି.): ଭାରତୀୟ ଜୁନିୟର କ୍ରିକେଟ ଦଳର ଚୟନକର୍ତ୍ତା ହେବାକୁ ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ସୁରିନ୍ଦର ଅମରନାଥ ଆବେଦନ କରିଛନ୍ତି। ୫ଟି ପଦ ପାଇଁ ଗତମାସ ଶେଷ ତାରିଖ ରହିଥିଲା। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏ ନେଇ ଖୁବ୍ଶୀଘ୍ର ଚୟନ ପ୍ରକ୍ରିୟା ଆରମ୍ଭ କରିବ।
ସୁରିନ୍ଦର କ୍ରିକେଟ କିମ୍ବଦନ୍ତୀ ଲାଲା ଅମରନାଥଙ୍କ ପୁଅ। ସେ ଭାରତ ପାଇଁ ୧୦ଟି ଟେଷ୍ଟ ଓ ୩ଟି ଦିନିକିଆ ମ୍ୟାଚ୍ ଖେଳିଛନ୍ତି। ସେ ମଧ୍ୟ ୧୪୫ଟି ପ୍ରଥମଶ୍ରେଣୀ ମ୍ୟାଚ୍ ଖେଳିଛନ୍ତି ଓ ୮୦୦୦ରୁ ଊର୍ଦ୍ଧ୍ୱ ରନ ସଂଗ୍ରହ କରିଛନ୍ତି। ଆମ ଜାତୀୟ ଦଳ ଭଲ ପ୍ରଦର୍ଶନ କରୁଛି। ଦେଶରେ କ୍ରିକେଟ ବ୍ୟବସ୍ଥା ଓ ସଂସ୍କୃତି ଉଚ୍ଚକୋଟୀର ରହିଛି। ତେଣୁ ପ୍ରତିଭାସମ୍ପନ୍ନ କ୍ରିକେଟର ଦେଶରେ ସୃଷ୍ଟି ହେଉଛନ୍ତି ବୋଲି ୭୨ ବର୍ଷୀୟ ସୁରିନ୍ଦର କହିଛନ୍ତି। ଭଲ କ୍ରିକେଟ ଖେଳିବା ସହ କୋଚିଂରେ ମଧ୍ୟ ସୁରିନ୍ଦରଙ୍କ ଭଲ ଅଭିଜ୍ଞତା ରହିଛି। ସେ କୋଚ୍ ଭାବେ ମରୋକ୍କୋରେ କାର୍ଯ୍ୟ କରିଛନ୍ତି। ଗୋଆ କ୍ରିକେଟ ଆସୋସିଏଶନ ପାଇଁ ସେ ମୁଖ୍ୟ କନ୍ସଲଟାଣ୍ଟ ଭାବେ କାର୍ଯ୍ୟ କରିଛନ୍ତି। ୧୯୭୪ରେ ସେ ଅକଲାଣ୍ଡରେ ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟ ପଦାର୍ପଣ କରିଥିଲେ। ଡେବ୍ୟୁରେ ସେ ଶତକ ହାସଲ କରିଥିଲେ। ଏହି ମ୍ୟାଚ୍ରେ ସେ ସୁନୀଲ ଗାଭାସ୍କରଙ୍କ ସହ ଇନିଂସ ଓପନ କରି ୨୦୪ ରନର ଭାଗୀଦାରି ସ୍ଥାପନ କରିଥିଲେ। ସ୍କୁଲ କ୍ରିକେଟରେ ସେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ। ଭାରତୀୟ ସ୍କୁଲ ଟେଷ୍ଟ ଟିମ୍ ତରଫରୁ ପ୍ରତିନିଧିତ୍ୱ କରି ସେ ଲଡର୍ସରେ ଶତକ ହାସଲ କରିଥିଲେ। ଶେଷ ଦୁଇଟି ବଲ୍ରେ ଭାରତ ବିଜୟ ପାଇଁ ୯ ରନ ଆବଶ୍ୟକ କରୁଥିବା ବେଳେ ସେ ଦୁଇଟି ଛକା ମାରି ଦଳକୁ ଜିତାଇଥିଲେ।
