ମୁମ୍ବାଇ,୨୫।୪ : ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ବ୍ୟାଟ୍ସମ୍ୟାନ ସୁରେଶ ରାଇନା ରବିବାର ଆଇପିଏଲରେ ୨୦୦ ଛକା ପୂରଣ କରିଛନ୍ତି। ୭ମ ବ୍ୟାଟ୍ସମ୍ୟାନ ଭାବେ ଏହି ତାଲିକାରେ ସ୍ଥାନ ପାଇଛନ୍ତି ରାଇନା। ତେବେ ରୋହିତ ଶର୍ମା, ମହେନ୍ଦ୍ର ସିଂ ଧୋନୀ ଓ ବିରାଟ କୋହଲିଙ୍କ ପରେ ରାଇନା ଚତୁର୍ଥ ଭାରତୀୟ ବ୍ୟାଟ୍ସମ୍ୟାନ ଭାବେ ଆଇପିଏଲରେ ୨୦୦ ଛକା ପୂରଣ କରିଛନ୍ତି।
ଓ୍ବାଙ୍ଖଡେ ଠାରେ ଆରସିବି ବିପକ୍ଷ ମ୍ୟାଚ୍ ପୂର୍ବରୁ ରାଇନା ୨୦୦ ଛକାଠାରୁ ମାତ୍ର ୧ ଛକା ଦୂରରେ ଥିଲେ। ମାତ୍ର ରାଇନାଙ୍କ ୨୪ ରନ୍ର ଛୋଟିଆ ଇନିଂସରେ ସାମିଲ ଥିଲା ୩ ଛକା।
ଆଇପିଏଲରେ ସର୍ବାଧିକ ଛକା ମାରିଥିବା ବ୍ୟାଟ୍ସମ୍ୟାନଙ୍କ ତାଲିକାରେ ୩୫୪ ଛକା ସହ ଶୀର୍ଷରେ ଅଛନ୍ତି କ୍ରିସ୍ ଗେଲ। ତାଙ୍କ ପଛକୁ ଏବି ଡି’ଭିଲର୍ସ (୨୪୦), ରୋହିତ ଶର୍ମା (୨୨୨), ଧୋନୀ (୨୧୭), କୋହଲି (୨୦୪) ଓ କିରନ ପୋଲାର୍ଡ (୨୦୨) ରହିଛନ୍ତି।
