ଭୁବନେଶ୍ୱର,୧୬।୪: ପୁଣି ଚର୍ଚ୍ଚାରେ ବରିଷ୍ଠ ରାଜନେତା ତଥା ଜଟଣୀ ବିଧାୟକ ସୁରେଶ ରାଉତରାୟ । ଦଳବିରୋଧୀ କାର୍ଯ୍ୟ ପାଇଁ ସୁରଙ୍କୁ କଂଗ୍ରେସ ବହିଷ୍କାର କରିବା ପରେ ବି ଥମୁନାହିଁ ଚର୍ଚ୍ଚା। କାରଣ, ସୁରଙ୍କୁ କଂଗ୍ରେସ ବାହାର କରିବା ପରେ ଏହା ତାଙ୍କ ପାଇଁ ଆଶୀର୍ବାଦ ହେବ ନା ଅଭିଶାପ ସେନେଇ ରାଜନୀତି ଜୋର୍ ଧରିଛି। ବିଜେଡି ପ୍ରାର୍ଥୀ ତଥା ସାନପୁଅ ପାଇଁ ପ୍ରଚାର କରି କଂଗ୍ରେସରୁ ବାହାରିଥିବା ସୁର, ଏବେ ସାନପୁଅ ସପକ୍ଷରେ କେତେ ଭୋଟ ଜୁଟାଇ ପାରିବେ ତାହା ଦେଖିବା ବାକି ରହିଲା।
କଂଗ୍ରେସରୁ ଜଟଣୀ ବିଧାୟକ ସୁରେଶ ରାଉତରାୟଙ୍କୁ ବହିଷ୍କାର କରାଯିବା ପରେ ରାଜନୈତିକ ମହଲରେ ଏକ ଚର୍ଚ୍ଚା ଜୋର୍ ଧରିଛି । ସୁରଙ୍କୁ କଂଗ୍ରେସରୁ କାଢ଼ିବା, ସୁରଙ୍କ ପାଇଁ ଲାଭ ହେବ ନା କ୍ଷତି ? କଂଗ୍ରେସ ସହିତ ଦୀର୍ଘ ୫୦ ବର୍ଷର ସମ୍ପର୍କ ଚ୍ଛିନ୍ନ ହେବା ପରେ ସୁରଙ୍କ ରାଜନୈତିକ ଭାବମୂର୍ତ୍ତି ପ୍ରଭାବିତ ହେବ କି ? ସାନପୁଅ ପାଇଁ ସୁର ଅଡୁଆରେ ପଡିଛନ୍ତି ନା କଂଗ୍ରେସରୁ ବିଦା ହେବା ପରେ ସୁରଙ୍କ ପଥ ସୁଗମ ହୋଇଛି, ତାକୁ ନେଇ ଚାଲିଛି ଚର୍ଚ୍ଚା ।
ଚର୍ଚ୍ଚା ହେଉଛି, କଂଗ୍ରେସରୁ ବାହାରି ଯିବା ପରେ ସୁର ଏବେ ବିନା ଦ୍ବନ୍ଦ୍ବରେ ବିଜେଡି ପ୍ରାର୍ଥୀ ସାନପୁଅ ମନ୍ମଥ ପାଇଁ ପ୍ରଚାର କରିପାରିବେ । ଭୋଟରଙ୍କ ପାଖକୁ ଯାଇ ସାନପୁଅ ପାଇଁ ଭୋଟ ମାଗିବା ବେଳେ ସୁରଙ୍କ ଭିତରେ କୌଣସି ଦ୍ବିଧା ରହିବ ନାହିଁ । ଦ୍ବିତୀୟତଃ ସୁର ପ୍ରଚାର କଲେ, ତାଙ୍କ କଂଗ୍ରେସ ପକେଟ ଭୋଟ ସାନପୁଅ ମନ୍ମଥଙ୍କ ଆଡକୁ ଟ୍ରାନ୍ସଫର ହୋଇପାରେ । ତୃତୀୟରେ ଖୋଲାଖୋଲି ଜଟଣୀରେ ସାନପୁଅ ପାଇଁ ଭୋଟ ରଣକୌଶଳ ସ୍ଥିର କରିପାରିବେ ଭେଟେରାନ ଲିଡର ସୁରେଶ ରାଉତରାୟ ।
ସୁରଙ୍କୁ ରାଜ୍ୟ କଂଗ୍ରେସର ଚେହେରା ବୋଲି କୁହାଯାଏ । କଂଗ୍ରେସ ଷ୍ଟାମ୍ପ ହଟିବା ପରେ ସୁରଙ୍କ ପାଇଁ କ’ଣ ହେବ କ୍ଷତି! ରାଜନୈତିକ ମହଲରେ ଆକଳନ କରାଯାଉଛି, ଜଣେ କଂଗ୍ରେସ ଚେହେରା ବିଜେଡି ପ୍ରାର୍ଥୀ ପାଇଁ ଭୋଟ ମାଗିବା କେତେ ଫଳପ୍ରଦ ହେବ, ତାକୁ ନେଇ ଆଶଙ୍କା ରହିଛି । ତା’ଛଡ଼ା କଂଗ୍ରେସରେ ରହିଛି, କଂଗ୍ରେସରେ ରହିବି ବୋଲି ସବୁବେଳେ କହି ଆସୁଥିବା ସୁରଙ୍କୁ ଦଳବିରୋଧୀ କାର୍ଯ୍ୟ ପାଇଁ ବହିଷ୍କାର କରିବା ତାଙ୍କ ଭାବମୂର୍ତ୍ତିକୁ ମଳିନ କରିପାରେ । ସୁରଙ୍କୁ ବିଶ୍ବାସ ରଖି ତାଙ୍କ ପୁଅକୁ ଭୋଟରମାନେ ଶତପ୍ରତିଶତ ସମର୍ଥନ କରିବା ନେଇ ସନ୍ଦେହ ରହିଛି ବୋଲି କୁହାଯାଉଛି ।
ଦଳରୁ ବାହାରିବା ପରେ ଖବରଦାତା ସମ୍ମିଳନୀକୁ ସାକ୍ଷାତକାର ଦେଇ କଂଗ୍ରେସ ଉପରେ ବର୍ଷିବା ସହ ପୁଅ ମନ୍ମଥ ଜିତିବ ବୋଲି ଖୋଲାଖୋଲି କହିଛନ୍ତି। ସେ କହିଛନ୍ତି, ବହିଷ୍କାର ହୋଇଛି, ଭଲ ହୋଇଛି। ଏବେ ପୁଅ ପାଇଁ ବିନ୍ଦାସ ପ୍ରଚାର କରିବି। ହେଲେ କୌଣସି ଦଳ ପାଇଁ ନୁହେଁ। ଭୋଟ ପରେ ସେମାନଙ୍କ(କଂଗ୍ରେସ) କଥା ବୁଝିବି ବୋଲି ସୁର କହିଛନ୍ତି।
