ସୋନପୁର,୧୯।୨: ସୁବର୍ଣ୍ଣପୁର ଜିଲା ବୀରମହାରାଜପୁର ତହସିଲ ସୁପରଭାଇଜର ନବେନ୍ଦ୍ର ମହାକୁର ଓ ଅବସରପ୍ରାପ୍ତ ରାଜସ୍ବ ନିରୀକ୍ଷକ ବାବାଜୀ ଚରଣ ସାହୁ ସମ୍ବଲପୁର ଭିଜିଲାନ୍ସ ଜାଲରେ ପଡିଛନ୍ତି । ୧୦ ହଜାର ଟଙ୍କା ଲାଞ୍ଚ ନେବା ଅଭିଯୋଗରେ ଉଭୟଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରାଯାଇଛି। ଏଥିସହ ସୁପରଭାଇଜରଙ୍କ ସୋନପୁର ବ୍ଲକ ନାଇକେନପାଲିସ୍ଥିତ ବାସଭବନ, ବୀରମହାରାଜପୁର କାର୍ଯ୍ୟାଳୟରେ ଭିଜିଲାନ୍ସ ପକ୍ଷରୁ ଚଢାଉ କରାଯାଇଛି। ଏ ନେଇ ସମ୍ବଲପୁର ଭିଜିଲାନ୍ସ ବିଭାଗ ପକ୍ଷରୁ ଏକ ମାମଲା (ନଂ.୪/୨୧) ରୁଜୁ ହୋଇଛି । ଜିଲାରେ ଜମିଜମା ସମ୍ପର୍କିତ ହାଇଟେକ୍ ସର୍ଭେ ଚାଲିଥିବାରୁ କମିରା ରାଜସ୍ବ ସର୍କଲ ଅନ୍ତର୍ଗତ ଥବୀର ମେହେର ମା’ଙ୍କ ନାମରେ ଥିବା ଜମିକୁ ବନ୍ଦୋବସ୍ତରେ ନିଜ ନାମରେ କରିବା ପାଇଁ ସୁପରଭାଇଜରଙ୍କ ନିକଟରେ ଆବେଦନ କରିଥିଲେ। ସୁପରଭାଇଜର ଫାଇଲ ପକାଇ ରଖି ପରେ ଅବସରପ୍ରାପ୍ତ ଆର୍ଆଇ ସାହୁଙ୍କୁ ଦେବା ପାଇଁ କହିଥିଲେ । ଥବୀର ଡିସେମ୍ବର ମାସ ୧୫ ତାରିଖରୁ ଫର୍ମ ଓ କାଗଜପତ୍ର ଦାଖଲ କରିଥିଲେ ମଧ୍ୟ ଆର୍ଆଇ ସାହୁ କୌଣସି କାର୍ଯ୍ୟ କରି ନ ଥିଲେ। ଅନ୍ୟପକ୍ଷେ ଆର୍ଆଇ ରାଜସ୍ବ ସୁପରଭାଇଜରଙ୍କୁ ୧୦ ହଜାର ଟଙ୍କା ଦେଲେ କାମ ହୋଇଯିବ ବୋଲି ଥବୀରଙ୍କୁ କହିଥିଲେ। ଏ ସମ୍ପର୍କରେ ଅଭିଯୋଗ ପରେ ଭିଜିଲାନ୍ସ ବିଭାଗ ପକ୍ଷରୁ ଜାଲ ବିଛା ଯାଇଥିଲା । ଯୋଜନା ମୁତାବକ ଥବୀର ଲାଞ୍ଚ ଟଙ୍କା ଦେଲା ପରେ ଭିଜିଲାନ୍ସ ଅଧିକାରୀ ରଙ୍ଗବୋଳା ୨୦ଟି ୫ଶହ ଟଙ୍କିଆ ନୋଟ ସହ ସୁବଳୟାରୁ ଆର୍ଆଇ ସାହୁଙ୍କୁ ଗିରଫ କରିଥିଲେ । ପରେ ରାଜସ୍ବ ସୁପରଭାଇଜର ନବେନ୍ଦ୍ରଙ୍କୁ ଗିରଫ କରାଯାଇଥିଲା । ଭିଜିଲାନ୍ସ ଡିଏସ୍ପି ଦାଶରଥି ସେଠୀ, ଇନ୍ସପେକ୍ଟର ତୁଷାରକାନ୍ତ ମହାପାତ୍ର ଏହି ଚଢାଉ କରିଥିଲେ । ତେବେ ଆରଆଇ ସାହୁ ହାଇଟେକ୍ କାମ ପାଇଁ ଅନୁଗୋଳରୁ ଡେପୁଟେସନରେ ଆସିଥିବା ବେଳେ ଗତ ଜୁନ୍ ୩୦ ତାରିଖରେ ଅବସର ଗ୍ରହଣ କରିଛନ୍ତି । କିନ୍ତୁ ସେ ସୁବଳୟାରେ ରହି ସରକାରୀ କାର୍ଯ୍ୟ କରୁଥିଲେ । ତାଙ୍କ ନିକଟରୁ ସରକାରୀ ଫାଇଲ ଜବତ ହୋଇଛି ା
