ବମ୍ବେ: ବଲିଉଡ୍ ଅଭିନେତା ସୁନୀଲ ସେଟ୍ଟୀଙ୍କ ଆଜି ହେଉଛି ଜନ୍ମଦିନ। ୧୯୬୧ ମସିହା ଆଜିର ଦିନରେ କର୍ନାଟକର ମାଙ୍ଗାଲୋରରେ ତାଙ୍କର ଜନ୍ମ ହୋଇଥିଲା। ସୁନୀଲଙ୍କ ପୁରା ନାମ ସୁନୀଲ ବିରପ୍ପା ସେଟ୍ଟୀ। ଲୋକେ ତାଙ୍କୁ ସ୍ନେହରେ ଅନ୍ନା ବୋଲି ଡାକିଥାନ୍ତି। ୧୯୯୨ରେ ଫିଲ୍ମ ‘ବଲବାନ୍’ରୁ କ୍ୟାରିୟର ଆରମ୍ଭ କରିଥିଲେ ସୁନୀଲ। ୧୯୯୪ରେ ଫିଲ୍ମ ‘ମୋହରା’ ତାଙ୍କ ନାୟକ ଜୀବନକୁ ନୂଆ ଦିଗ ଦେଇଥିଲା। ପରେ ୨୦୦୧ରେ ରିଲିଜ ହୋଇଥିବା ଫିଲ୍ମ ‘ଧଡକନ୍’ ତାଙ୍କୁ ଲୋକପ୍ରିୟ କରିଥିଲା। ଏଯାବତ ୧୨୦ରୁ ଅଧିକ ଫିଲ୍ମରେ କାମ କରିଥିବା ସୁନୀଲଙ୍କ ଜୀବନଶୈଳୀ ବେଶ ସମ୍ଭାନ୍ତ। ନିଜର ପରିଶ୍ରମରୁ ସୁନୀଲ କୋଟି କୋଟି ଟଙ୍କା ସମ୍ପତ୍ତିର ଏବେ ମାଲିକ। ତାଙ୍କ ଜନ୍ମଦିନରେ ଆସନ୍ତୁ ଜାଣିବା ତାଙ୍କ ବିଷୟରେ ଅନେକ କିଛି…
ଅଲ୍ଟାମାଉଣ୍ଟ ରୋଡ୍ରେ ଥିବା ପୃଥ୍ବୀ ଆପାର୍ଟମେଣ୍ଟରେ ରୁହନ୍ତି ସୁନୀଲ। ଏହି ରୋଡ୍କୁ ଭାରତର କୋଟିପତିମାନଙ୍କ ରୋଡ୍ ବୋଲି ମଧ୍ୟ କୁହାଯାଏ। ଏହାଛଡ଼ା ସୁନୀଲ ଏକ ହଲିଡେ ହୋମ୍ର ମଧ୍ୟ ମାଲିକ। ଖଣ୍ଡାଲାରେ ସେ ଏହି ଘର କରିଛନ୍ତି। ୬୨୦୦ ସ୍କୋୟାର ଫୁଟ୍ ଅଞ୍ଚଳରେ ଏହି ଘର ନିର୍ମାଣ ହୋଇଛନ୍ତି।
କେବଳ ଯେ ଜଣେ ଭଲ ଅଭିନେତା ତାହା ନୁହେଁ ସୁନୀଲ ଭଲ ବ୍ୟବସାୟୀ ମଧ୍ୟ। ବର୍ଷକୁ ସେ ୧୦୦ କୋଟି ରୋଜଗାର କରିଥାନ୍ତି। ଅଭିନେତାଙ୍କର ଏକ ପ୍ରଯୋଜନା ସଂସ୍ଥା ପପ୍କର୍ନ ଏଣ୍ଟରଟେନ୍ମେଣ୍ଟ ରହିଛି। ଏହାଛଡ଼ା ତାଙ୍କର ଦୁଇଟି ରେଷ୍ଟୁରାଣ୍ଟ ମଧ୍ୟ ରହିଛି। ୨୦୧୩ରେ ରିଅଲ୍ ଇଷ୍ଟେଟ୍ କାରବାର ଆରମ୍ଭ କରିଥିଲେ ସୁନୀଲ। ସେ ରିଆଲିଟି ଆଣ୍ଡ ଡେଭେଲପର୍ସ ପ୍ରାଇଭେଟ ଲିମିଟେଡ୍ ନାମକ କମ୍ପାନୀର ମାଲିକ।
