ଲଣ୍ଡନ,୬।୫ : ବ୍ରିଟେନର ପ୍ରଧାନମନ୍ତ୍ରୀ ଋଷି ସୁନକଙ୍କୁ ସ୍ଥାନୀୟ ପୌରପରିଷଦ ନିର୍ବାଚନରେ ଏକ ବଡ଼ ଝଟ୍କା ଲାଗିଛି। ସାରା ଦେଶରେ ଅନୁଷ୍ଠିତ ପୌରପରିଷଦ ନିର୍ବାଚନରେ ସୁନକଙ୍କ କଞ୍ଜରଭେଟିବ ପାର୍ଟି ୪୮ ଟି ପରିଷଦରେ ପରାସ୍ତ ହୋଇଛି। ଏଥିସହ ଦଳର ୧୦୦୦ ରୁ ଅଧିକ କାଉନସିଲର ନିର୍ବାଚନରେ ହାରିଯାଇଛନ୍ତି। ଫଳାଫଳ ପରେ ବିରୋଧୀ ଲେବର ପାର୍ଟି କହିଛି, ବର୍ତ୍ତମାନର ପ୍ରଧାନମନ୍ତ୍ରୀଙ୍କୁ ଜନସାଧାରଣ ଗ୍ରହଣ କରୁନାହାଁନ୍ତି।
ପ୍ରଧାନମନ୍ତ୍ରୀ ହେବା ପରେ ସେ ପ୍ରଥମ ନିର୍ବାଚନରେ ପରାଜୟର ସମ୍ମୁଖୀନ ହୋଇଛନ୍ତି। ବ୍ରିଟେନର ୩୧୭ ଟି ପୌର ପରିଷଦର ୨୩୦ ଟି ପାଇଁ ସ୍ଥାନୀୟ ପ୍ରତିନିଧୀ ଚୟନ କରିବାକୁ ଗୁରୁବାର ମତଦାନ କରାଯାଇଥିଲା। ଅକ୍ଟୋବର ୨୦୨୨ ରେ ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରେ ଏହା ହେଉଛି ପ୍ରଥମ ନିର୍ବାଚନ ଏବଂ ଏଥିରେ ସୁନକଙ୍କୁ ପରାଜୟର ସାମ୍ନା କରିବାକୁ ପଡିଛି। ଫଳାଫଳ ନୈରାଶ୍ୟ ଜନକ ବୋଲି ସୁନାକ ସ୍ବୀକାର କରିଛନ୍ତି।
