ନୂଆଦିଲ୍ଲୀ,୨୦ ।୧୨: ଠକ ସୁକେଶ ଚନ୍ଦ୍ରଶେଖରଙ୍କୁ ୨୦୦ କୋଟି ଠକେଇ ଅଭିଯୋଗରେ ମଙ୍ଗଳବାର ପଟିଆଲା ହାଉସ କୋର୍ଟରେ ହାଜର କରାଯାଇଥିଲା । ସେଠାରେ ସେ ଆମ ଆଦମୀ ପାର୍ଟି(ଏଏପି)କୁ ୬୦ କୋଟି ଟଙ୍କା ଦେଇଥିବା ଦାବି କରିଛନ୍ତି । ଏହି ସମୟରେ କୋର୍ଟରେ ବଲିଉଡ ଅଭିନେତ୍ରୀ ଜ୍ୟାକଲିନ ଫର୍ନାଡିଜ ବି ଉପସ୍ଥିତ ଥିଲେ ।
ସୁକେଶ ଚନ୍ଦ୍ରଶେଖରଙ୍କ ଓକିଲ ଅନନ୍ତ ମଲିକଙ୍କ ସୂଚନା ଅନୁଯାୟୀ, ମଙ୍ଗଳବାର ସୁକେଶ ଚନ୍ଦ୍ରଶେଖର ଅଭିଯୋଗ କରିଛନ୍ତି କି ସେ ଏଏପିକୁ ୬୦ କୋଟି ଟଙ୍କା ଦେଇଛନ୍ତି । ଏକ ଉଚ୍ଚ ସ୍ତରୀୟ ସମିତି ତାଙ୍କ ବୟାନ ନେଇଛନ୍ତି ଏବଂ ସମିତି ତାଙ୍କ ସୁପାରିସରେ କହିଛନ୍ତି ଅଭିଯୋଗ ଗୁରୁତର ତେଣୁ ଏହାର ଯାଞ୍ଚ କରାଯିବା ଦରକାର ।
କୋର୍ଟ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)କୁ ୨୦୦ କୋଟି ଟଙ୍କା ମନି ଲଣ୍ଡରିଂ ମାମଲାରେ ସୁକେଶଙ୍କ ପତ୍ନି ଲିନା ମାରିୟା ପଲଙ୍କ ସହ ଜଡିତ ୨୬ଟି କାରକୁ କବଜା କରିବାକୁ ଅନୁମତି ଦେଇଛନ୍ତି । ଅନ୍ୟପଟେ ଏହି ମାମଲା ସହ ଜଡିତ ବଲିଉଡ ଅଭିନେତ୍ରୀ ଜ୍ୟାକଲିନ ଫର୍ନାଡିଜ ୨୩ ଡିସେମ୍ବରରୁ ବାହାରିନ ଯାତ୍ରା କରିବାକୁ ଅନୁମତି ପ୍ରଦାନ ପାଇଁ ଏକ ଆବେଦନ କରିଛନ୍ତି । କୋର୍ଟ ଇଡିକୁ ୨୨ ଡିସେମ୍ବର ସୁଦ୍ଧା ଜବାବ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।
