ଖଡ଼ିଆଳ,୧୭।୩(ଡି.ଏନ୍.ଏ.): ନୂଆପଡ଼ା ଜିଲା ଖଡ଼ିଆଳ ଥାନା କୋଟାମାଲ ଗାଁରେ ଗୁରୁବାର ଜଣେ ଯୁବକ ବେକରେ ରଶି ଲଗାଇ ଆତ୍ନହତ୍ୟା କରିଥିବା ଅଭିଯୋଗ ହୋଇଛି। ସେ ହେଲେ କୋଟାମାଲ ଗାଁର କମଳ ମାଝି। ପ୍ରେମ ସମ୍ପର୍କକୁ ନେଇ କମଳ ଆତ୍ମହତ୍ୟା କରିଥିବା ଜଣାପଡିଛି।
ଖବର ପାଇଁ ଖଡ଼ିଆଳ ପୋଳିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲା। ପୋଲିସ ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛି। ଏନେଇ ପୋଲିସ ଏକ ମାମଲା(ନଂ.୨/୨୦୨୨) ରୁଜୁ କରି ଘଟଣାର ତଦନ୍ତ ଜାରି ରଖିଛି।
ମିଲିଥିବା ସୂଚନା ମୁତାବକ, କମଳଙ୍କ ସହ ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା। ୧୫ ତାରିଖରେ କମଳ ଯୁବତୀଙ୍କୁ ଧରି ଫେରାର୍ ହୋଇଯାଇଥିଲେ। ଏନେଇ ଥାନାରେ ଏକ ଅଭିଯୋଗ ହୋଇଥିଲା। ଅଭିଯୋଗ ପରେ ଖଡ଼ିଆଳ ପୋଲିସ ତଦନ୍ତ ଆରମ୍ଭ କରିଥିଲା। ଖଡ଼ିଆଳ ପୋଲିସ ତଦନ୍ତ ପରେ ସିନାପାଲି ପୋଲିସ ସହାୟତାରେ ୧୬ ତାରିଖରେ ଫେରାର କମଳ ଏବଂ ଯୁବତୀଙ୍କୁ ଉଦ୍ଦାର କରିଥିଲା। ପରେ ସେମାନେ ପୋଲିସ ଆଗରେ ଦୁହେଁ ଅଲଗା ହୋଇ ରହିବେ ବୋଲି ନିଷ୍ପତ୍ତି ନେଇଥିଲେ। ହେଲେ ଗୁରୁବାର କମଳ ନିଜ ଚାଷ ଜମିରେ ଥିବା ଏକ ତେନ୍ତୁଳୀ ଗଛରେ ବେକରେ ରଶିଲଗାଇ ଆତ୍ମହତ୍ୟା କରିଥିଲେ।
