ଜେନେଭା,୨୬ା୪: ସ୍ବାଧୀନତା ପରବର୍ତ୍ତୀ ସୁଦାନର ଅଧିକାଂଶ ସମୟ ସାମରିକ ଶାସନ ଏବଂ ଗୃହଯୁଦ୍ଧ ମଧ୍ୟରେ ବିବାଦ ମଧ୍ୟରେ ଚାଲିଆସିଛି। ଏହି ଦେଶ ୧ ଜାନୁୟାରୀ ୧୯୫୬ରେ ସ୍ବାଧୀନ ହୋଇଥିଲା। ସେହି ଦିନଠାରୁ ବର୍ତ୍ତମାନ ପର୍ଯ୍ୟନ୍ତ ଏହି ଦେଶ ଗଣତନ୍ତ୍ରର ଲଢ଼େଇ କରୁଛି। ଆରବି ଭାଷାରେ କଳା ଲୋକଙ୍କ ଦେଶ କୁହାଯାଉଥିବା ସୁଦାନ ହେଉଛି ଦୁନିଆର ସବୁଠାରୁ ଗରିବ ଦେଶ।
୯ ଜୁଲାଇ ୨୦୧୧ରେ ଦକ୍ଷିଣ ସୁଦାନ ସୁଦାନଠାରୁ ଅଲଗା ହୋଇ ଏହାର ସ୍ବାଧୀନତା ପାଳନ କଲା, କିନ୍ତୁ ଏହି ସୁଖ ଅଳ୍ପ ସମୟର ଥିଲା। ଏଠାରେ ଗୃହଯୁଦ୍ଧ ଆରମ୍ଭ ହୋଇ ପ୍ରାୟ ୪ ହଜାର ଲୋକଙ୍କ ଜୀବନ ଯାଇଥିଲା। ପରିସ୍ଥିତି ଏତେ ଖରାପ ଥିଲା ଯେ, ଏଠାକାର ଲୋକମାନେ ଅନ୍ୟ ଦେଶରେ ଆଶ୍ରୟ ନେବାକୁ ବାଧ୍ୟ ହୋଇଥିଲେ। ଏଠାରେ ଦୁଇ ତୃତୀୟାଂଶ ଜନସଂଖ୍ୟା ମାନବିକ ସହାୟତା ଉପରେ ନିର୍ଭରଶୀଳ। ମିଳିତ ଜାତିସଂଘର ଶିଶୁ ପାଣ୍ଠି (ୟୁନିସେଫ୍) ମଧ୍ୟ ଚେତାବନୀ ଦେଇଛି ଯେ, ଦକ୍ଷିଣ ସୁଦାନ ବର୍ତ୍ତମାନର ମାନବୀୟ ସଙ୍କଟର ସମ୍ମୁଖୀନ ହୋଇଛି।
ବିଶ୍ୱାସ କରାଯାଏ, ଏପ୍ରିଲ ୨୦୧୯ରେ ଓମାର ଅଲ୍-ବଶିର ସରକାରଙ୍କ ପତ୍ତନ ପରେ ଏଠାରେ ପରିସ୍ଥିତି ଖରାପ ହେବାରେ ଲାଗିଛି। ବର୍ତ୍ତମାନ ସୁଦାନର ପାରାମିଲିଟାରୀ ଫୋର୍ସ ‘ରାପିଡ ସପୋର୍ଟ ଫୋର୍ସ’ ଅର୍ଥାତ୍ ଆର୍ଏସ୍ଏଫ୍ ଏବଂ ସେନା ମଧ୍ୟରେ ଯୁଦ୍ଧ ଚାଲିଛି। ଏହି ଗୃହଯୁଦ୍ଧ ମଧ୍ୟରେ କେବଳ ସୁଦାନର ନାଗରିକଙ୍କ ନୁହେଁ ବରଂ ୩ ହଜାର ଭାରତୀୟଙ୍କ ଜୀବନ ମଧ୍ୟ ବିପଦରେ ରହିଛି।
ଏହି ହିଂସାରେ ଏପର୍ଯ୍ୟନ୍ତ ୨୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି। ସୁଦାନର ଖାର୍ତୁମ ବର୍ତ୍ତମାନ ବିପଦରେ ପରିପୂର୍ଣ୍ଣ। ବର୍ତ୍ତମାନ ସମସ୍ତଙ୍କ ମନରେ ସେହି ଗୋଟିଏ କଥା ଯେ, ସୁଦାନ ଏକ ଗରିବ ଦେଶ ଏବଂ ଯେଉଁଠାରେ ହିଂସା ସବୁବେଳେ ଲାଗି ରହିଥାଏ।
