ଭବାନୀପାଟଣା,୧୮ା୪(ଉତ୍ତମ କୁମାର ଦାଶ): ବୃତ୍ତି ଶିକ୍ଷକତା ହେଲେ ନିଶା ଥିଲା ବିଭିନ୍ନ ପ୍ରକାର ଚାଷ। ଶିକ୍ଷକତାରୁ ସେ ପାଲଟିଛନ୍ତି ଜଣେ ସଫଳ ଆମ୍ବଚାଷୀ। ସେ ହେଲେ କଳାହାଣ୍ଡି ଜିଲା ଜୁନାଗଡ଼ ବ୍ଲକ ଛୋରିଆଗଡ଼ ଗ୍ରାମର ଅବସରପ୍ରାପ୍ତ ପ୍ରଧାନଶିକ୍ଷକ ପ୍ରକାଶ ଚନ୍ଦ୍ର ନାଏକ (୬୫)। ଏବେ ବିଭିନ୍ନ ପ୍ରକାର ଆମ୍ବଚାଷ କରି ସେ ଚର୍ଚ୍ଚାକୁ ଆସିଛନ୍ତି। ଶିକ୍ଷକତା ସମୟରେ ୨୦୦୦ ମସିହାରେ ସେ ନିଜ ଗ୍ରାମର ୫ ଏକର ଜାଗାରେ ଆମ୍ବ ବଗିଚା କରିବା ପାଇଁ ନିଷ୍ପତ୍ତି ନେଇଥିଲେ। ପରେ ଉକ୍ତ ବର୍ଷ ସେହି ସ୍ଥାନରେ ସେ ଆମ୍ବ ଚାଷ ଆରମ୍ଭ କରିଥିଲେ। ଏପଟେ ଗଛର ଯତ୍ନ ନେଉଥିବାବେଳେ ଅନ୍ୟପଟେ ସ୍କୁଲ ଯାଇ ଛାତ୍ରୀଛାତ୍ରଙ୍କୁ ଉତ୍ତମ ଶିକ୍ଷା ପ୍ରଦାନ କରୁଥିଲେ। ୨୦୧୭ ମସିହାରେ ସେ ଶିକ୍ଷକତା ଜୀବନରୁ ଅବସର ନେଇଥିଲେ। ଏହା ପରେ ସେ ଚାଷ କାମରେ ଲାଗିରହିଲେ। ଆଗରୁ ଯେମିତି ଚାଷ କାମରେ ସମୟ ଦେଉଥିଲେ ଏବେ ମଧ୍ୟ ଚାଷ ତାଙ୍କର ଏକ ମୁଖ୍ୟ କାର୍ଯ୍ୟ ପାଲଟିଛି। ବର୍ତ୍ତମାନ ସେ ୫ ଏକର ଜାଗାରେ ୬୦୦ ଆମ୍ବ ଗଛ ଲଗାଇ ଅଧିକ ରୋଜଗାର କରୁଥିବା କହିଛନ୍ତି। ଏବେ ତାଙ୍କ ବଗିଚାରେ ୧୬ କିସମର ଆମ୍ବ ଗଛ ରହିଛି। ସେଥିମଧ୍ୟରେ ହେମ ସାଗର, ଲେଙ୍ଗଡା, ବମ୍ବେଗ୍ରିନ, କଳାପାହାଡ଼, ସିନ୍ଧୁ, କାବେରୀ, ଚଉସା, ଆମ୍ବରପୁଲି, ଚେରଗୁରେସମ, ବାଇଗଣ ପଲି, ମିଳକ ଓ ରତ୍ନା ଆଦି ପ୍ରଜାତି ଅନ୍ୟତମ। ଆମ୍ବଗଛ ରକ୍ଷଣାବେକ୍ଷଣ ପାଇଁ ପ୍ରତିଦିନ ୬ ଜଣ ଶ୍ରମିକ ନିୟୋଜିତ ହୋଇଥାନ୍ତି। ଏବେ ପ୍ରତ୍ୟେକ ଗଛରେ ଭରପୂର ଆମ୍ବ ଫଳିଛି। ଆଉ ମାସେ ପରେ ଏହା ଅମଳକ୍ଷମ ହେବ। ଅମଳ ଆମ୍ବକୁ ବମ୍ବେ, ରାୟପୁର, ଭିଲାଇ, ବିହାର ଓ ଦିଲ୍ଲୀକୁ ପଠାଯିବ ବୋଲି ସେ ପ୍ରକାଶ କରିଛନ୍ତି। ପ୍ରତିବର୍ଷ ସେ ଏହି ଆମ୍ବ ବିକ୍ରିକରି ପ୍ରାୟ ୫ରୁ ୬ ଲକ୍ଷ ଟଙ୍କା ଆୟ କରୁଥିବା କହିଛନ୍ତି । ଅଞ୍ଚଳରେ ଜଣେ ସଫଳ ଆମ୍ବ ଚାଷୀ ଭାବରେ ସେ ବେଶ ପରିଚିତ। ଆମ୍ବ ସହ ସପୁରୀ ପଣସ, ଜାମ ଓ କଦଳୀ ଚାଷ ମଧ୍ୟ କରିଥାନ୍ତି। ୨୦୦୩ ମସିହାରେ ଶ୍ରେଷ୍ଠ କୃଷକ (ଉଦ୍ୟାନ) ଭାବରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ପୁରସ୍କୃତ ହୋଇଛନ୍ତି ପ୍ରକାଶ। ଏପରି କି ଆଗୁଆ ଚାଷୀ ଭାବରେ ମଧ୍ୟ ୧୯୭୫ ମସିହାରେ ସେ ପୁରସ୍କୃତ ହୋଇସାରିଛନ୍ତି। ଉଦ୍ୟାନ ବିଭାଗ ପକ୍ଷରୁ ତାଙ୍କୁ ସରକାରୀ ସହାୟତା ଯୋଗାଇଦେଲେ ସେ ଆହୁରି ଉନ୍ନତ କିସମର ଆମ୍ବ ଚାଷ କରି ଅଧିକ ଲୋକଙ୍କୁ ରୋଜଗାର ଦେଇପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି।
