ବରଗଡ,୪।୬(ପ୍ରେମାନନ୍ଦ ଖମାରୀ): ସମ୍ବଲପୁର ବିଶ୍ୱବିଦ୍ୟାଳୟ ଅଧୀନରେ ଅନୁଷ୍ଠିତ ବିବିଏ ପରୀକ୍ଷାରେ ବିକାଶ ସ୍କୁଲ ଅଫ ବିଜ୍ନେସ୍ ମ୍ୟାନେଜମେଣ୍ଟର ଛାତ୍ରୀଛାତ୍ରମାନେ ସଫଳତା ହାସଲ କରି ଅନୁଷ୍ଠାନ ଓ ସମଗ୍ର ପଶ୍ଚିମ ଓଡିଶା ପାଇଁ ଗୈାରବ ଆଣିଛନ୍ତି।
ଅନୁଷ୍ଠାନର ଛାତ୍ରୀ ଏନ୍. ଝାନ୍ସିରାଣୀ ୮.୯୭ ସିଜିପିଏ ହାସଲ କରି ବିଶ୍ୱବିଦ୍ୟାଳୟସ୍ତରରେ ପ୍ରଥମ ସ୍ଥାନ ଅଧିକାର କରି ସ୍ବର୍ଣ୍ଣପଦକ ଅର୍ଜନ କରିଛନ୍ତି । ସେ ବରଗଡ ଜିଲା ଅତାବିରା ବ୍ଲକ ଅନ୍ତର୍ଗତ ସୋଢଖପାଲି ଗ୍ରାମର ଏନ. ବାପିରାଜୁ ଏବଂ ଏନ. ଜ୍ୟୋତିଙ୍କ କନ୍ୟା। ଏହା ସହିତ ଅନୁଷ୍ଠାନର ଅନ୍ୟ ଛାତ୍ରୀଛାତ୍ରମାନେ ମଧ୍ୟ ବିଶ୍ୱବିଦ୍ୟାଳୟସ୍ତରରେ ଉଚ୍ଚ ର଼୍ୟାଙ୍କ ହାସଲ କରିଛନ୍ତି ।
ଅନୁଷ୍ଠାନର ଅନିଶା ଗୁପ୍ତା ଚତୁର୍ଥ ସ୍ଥାନ, ସିମ୍ରନ ଗୁପ୍ତା ପଞ୍ଚମ ସ୍ଥାନ, ପଲ୍ଲବି ଶର୍ମା ଏବଂ ରୋହିତ ଶର୍ମା ସପ୍ତମ ସ୍ଥାନ, ଶୃତି ଅଗ୍ରୱାଲ ଅଷ୍ଟମ ସ୍ଥାନ ଏବଂ ପ୍ରାଚି ପଣ୍ଡା ଦଶମ ସ୍ଥାନ ଅଧିକାର କରି ଅନୁଷ୍ଠାନର ଗୌରବ ବୃଦ୍ଧି କରିଛନ୍ତି ।
ଏକାଧିକ ଛାତ୍ରୀଛାତ୍ରଙ୍କ ଏହି ଅସାଧାରଣ ସଫଳତା ବିକାଶ ସ୍କୁଲ ଅଫବିଜ୍ନେସ୍ ମ୍ୟାନେଜମେଣ୍ଟର ଗୁଣାତ୍ମକ ଶିକ୍ଷା, ନିୟମିତ ମାର୍ଗଦର୍ଶନ ଏବଂ ଛାତ୍ରୀଛାତ୍ରଙ୍କ ପରିଶ୍ରମର ପ୍ରତିଫଳନ ବୋଲି ମତପ୍ରକାଶ ପାଇଛି । ଏହି ଉଲ୍ଲେଖନୀୟ କୃତିତ୍ୱ ପାଇଁ ଲକ୍ଷ୍ମୀ ବିକାଶ ଗ୍ରୁପ ଅଫ ଇନଷ୍ଟିଚ୍ୟୁସନ୍ସର ଚେୟାର୍ମେନ ଡି. ନାଗେଶ୍ୱର ରାଓ, ଅଧ୍ୟକ୍ଷ ଡଃ କ୍ଷୀରୋଦ କୁମାର ପ୍ରଧାନ, ଉପାଧ୍ୟକ୍ଷ ଦୀପକ କୁମାର ନାୟକ, ବିଭାଗୀୟ ମୁଖ୍ୟ ଶୁଭମ କୁମାର ଦାଶ, ଏକାଡେମିକ କୋଅର୍ଡିନେଟର ସୌମ୍ୟା ପ୍ରିୟଦର୍ଶିନୀ ମିଶ୍ର, ବିଭାଗୀୟ ଅଧ୍ୟାପକ ସୁଦେଶ ବିନାୟକ ଏବଂ ବିଭିନ୍ନ ବିଭାଗର ଅଧ୍ୟାପିକା, ଅଧ୍ୟାପକ ସମସ୍ତ ସଫଳ ଛାତ୍ରୀଛାତ୍ରଙ୍କୁ ଅଭିନନ୍ଦନ ଜଣାଇଛନ୍ତି। ଏହି ସଫଳତା ଆଗାମୀ ବ୍ୟାଚ୍ ଛାତ୍ରୀଛାତ୍ରଙ୍କ ପାଇଁ ପ୍ରେରଣାର ଉତ୍ସ ହେବ ବୋଲି ମତପ୍ରକାଶ ପାଇଛି।
