କୁଆଁରମୁଣ୍ଡା,୨୭।୮(ଡି.ଏନ୍.ଏ.): ସୁନ୍ଦରଗଡ଼ ଜିଲା କୁଆରମୁଣ୍ଡା ବ୍ଲକ କୁମଝରିଆସ୍ଥିତ ଉନ୍ନୀତ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ସଞ୍ଜୟ ସାମଲ ଭିଜିଲାନ୍ସ ଦ୍ୱାରା ଗିରଫ ହେବା ପରେ ଶନିବାର ବିଦ୍ୟାଳୟର ଛାତ୍ରୀଛାତ୍ର ଓ ସେମାନଙ୍କ ଅଭିଭାବକ ଆନ୍ଦୋଳନକୁ ଓହ୍ଲାଇଛନ୍ତି। ଛାତ୍ରୀଛାତ୍ର କହିଥିଲେ, ସଞ୍ଜୟ ସାର୍ ନିର୍ଦ୍ଦୋଶ। ତାଙ୍କୁ ଭିଜିଲାନ୍ସ ଜାଲରେ ଫସାଇ ଦିଆଯାଇଛି। ତେଣୁ ତାଙ୍କୁ ତୁରନ୍ତ ଛାଡି ଦେବାକୁ ଦାବିକରି ଅପରାହ୍ନରେ କୁମଝରିଆ ଉନ୍ନୀତ ଉଚ୍ଚ ବିଦ୍ୟାଳୟର ଛାତ୍ରୀଛାତ୍ର ୧୪୩ ନମ୍ବର ଜାତୀୟ ରାଜପଥ ଅବରୋଧ କରିଥିଲେ। ଦୀର୍ଘ ସାଢେ ୫ଘଣ୍ଟା ଧରି ପିଲା ଓ ସେମାନଙ୍କର ଅଭିଭାବକ ରାଜପଥ ଅବରୋଧ କରିବାରୁ ରାଜପଥର ଉଭୟ ପାର୍ଶ୍ୱରେ ଶତାଧିକ ଭାରିଯାନଠାରୁ ଆରମ୍ଭ କରି ଯାତ୍ରୀବାହୀଯାନଗୁଡିକ ଅଟକି ରହିଥିଲା। ପ୍ରଧାନ ଶିକ୍ଷକ ସଞ୍ଜୟ ସାମଲଙ୍କୁ ଭିଜିଲାନ୍ସ ନ ଛାଡିବା ପର୍ଯ୍ୟନ୍ତ ରାଜପଥରୁ ହଟିବେ ନାହିଁ କି ଖାଇବେ ନାହିଁ ବୋଲି ପିଲାମାନେ ନିଜ ଜିଦ୍ରେ ଅଡି ବସିଥିଲେ। ଏହା ପରେ ଖବର ପାଇ କୁଆଁରମୁଣ୍ଡା ବିଡିଓ ତୃପ୍ତି ବରାଇ, ପାନପୋଷ ଉପଜିଲାପାଳ ଦୌଲତ ଚନ୍ଦ୍ର ଚନ୍ଦ୍ରାକାର ଓ ବୀରମିତ୍ରପୁର ଉପଖଣ୍ଡ ସମେତ ଜିଲା ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚତ୍ ଆନ୍ଦୋଳନରତ ଛାତ୍ରୀଛାତ୍ରମାନଙ୍କୁ ଯେତେ ବୁଝାଇଲେ ମଧ୍ୟ କିଛି ଶୁଣି ନ ଥିଲେ। ଛାତ୍ରୀଛାତ୍ର ଗୋଟିଏ ଜିଦରେ ଅଟଳ ରହି କହିଥିଲେ, ‘ଆମର ସାର୍ ନିର୍ଦ୍ଦୋଶ ଓ ତାଙ୍କୁ ଆମ ସ୍କୁଲକୁ ଫେରାଇ ନ ଆଣିବା ପର୍ଯ୍ୟନ୍ତ ଆମେ ଆନ୍ଦୋଳନରୁ ହଟିବୁ ନାହିଁ। ଏହା ପରେ କୁଆଁରମୁଣ୍ଡା ଜିଲା ପରିଷଦ ସଭ୍ୟ ରାଜେନ୍ଦ୍ର କୁଜୁର, କୁମଝରିଆ ସରପଞ୍ଚ ବାତିଆ ଲାକ୍ରା, କୁଆଁରମୁଣ୍ଡା ସରପଞ୍ଚ ରାଜେଶ ହଁାସଦା, ପଦମପୁର ସରପଞ୍ଚ ଦିଲ୍ଲୀପ ଏକ୍କା, ପୁଟ୍ରିଖମଣ ସରପଞ୍ଚ ନରେଶ ସୁରିନଙ୍କ ସମେତ ୧୫ ରୁ ଊର୍ଦ୍ଧ୍ୱ ସରପଞ୍ଚ ସେଠାରେ ପହଞ୍ଚତ୍ ଛାତ୍ରୀଛାତ୍ରଙ୍କର ଦାବିକୁ ଯଥାର୍ଥ ବୋଲି କହିବା ସହ ପ୍ରଶାସନ ସମ୍ପୃକ୍ତ ପ୍ରଧାନଶିକ୍ଷକ ସାମଲଙ୍କୁ ଖଲାସ କରିବା ଦିଗରେ ସ୍ବତନ୍ତ୍ର ବ୍ୟବସ୍ଥା କରୁ ବୋଲି ଦାବି କରିଥିଲେ। ଏହା ପରେ ପ୍ରଧାନଶିକ୍ଷକ ସାମଲ ଜାମିନ୍ରେ ଆସିବା ପର୍ଯ୍ୟନ୍ତ ବିଦ୍ୟାଳୟରେ ଯେଉଁ ପ୍ରକାରେ ପିଲାମାନଙ୍କ ପାଇଁ ବ୍ୟବସ୍ଥା କରାଯାଇଥିଲା ତାହାର ପୂର୍ଣ୍ଣ ବ୍ୟବସ୍ଥା କରାଯିବା ପାଇଁ ପ୍ରତିଶ୍ରୃତି ଦେଇଥିଲେ। ପ୍ରଧାନଶିକ୍ଷକ ସାମଲଙ୍କୁ ପୁନର୍ବାର ଏହି ବିଦ୍ୟାଳୟକୁ ଫେରାଇ ଅଣାଯିବାର ସମ୍ପୂର୍ଣ୍ଣ ବ୍ୟବସ୍ଥା କରିବେ ବୋଲି ଉପଜିଲାପାଳ ଚନ୍ଦ୍ରାକାର କହିବାରୁ ଛାତ୍ରୀଛାତ୍ର ଆନ୍ଦୋଳନରୁ ଓହରିବା ସହ ରାତ୍ରଭୋଜନ କରିବାକୁ ଯାଇଥିଲେ।
