ସୁନାବେଡା/ସେମିଳିଗୁଡା,୧୩ା୩ (ସ୍ବ.ପ୍ର.):୧୯୬୧ରେ ତତ୍କାଳୀନ ମୁଖ୍ୟମନ୍ତ୍ରୀ ସ୍ବର୍ଗତ ବିଜୁ ପଟ୍ଟନାୟକଙ୍କ ଉଦ୍ୟମରେ ସୁନାବେଡାରେ ମିଗ୍ ବିମାନ କାରଖାନା ନିର୍ମାଣ ହୋଇଥିଲା। ସରକାରୀ ନିୟମ ଅନୁଯାୟୀ ଏଠାକାର ଅଧିବାସୀଙ୍କୁ ସେତେବେବେଳ ବିସ୍ଥାପିତ କରାଯାଇଥିଲା। ଏହି ବିସ୍ଥାପନ ପ୍ରକ୍ରିୟାରେ ପେଟକଣା,ଲେଞ୍ଜିଗୁଡା,ଚେରେଙ୍ଗାଗୁଡା, ପଣସପୁଟ, ବାଉଁଶଗୁଡା, ପଦ୍ମପୁର, ଡୁମୁରିପୁଟ, ଆରକେ ମାଳିଗୁଡା, ଡୋଳିଆମ୍ବ, ଗୁଞ୍ଜା, କିରାଝୋଲା, ବଡ଼ ବୋଡ଼େଙ୍ଗା, ରାଜପୁଟ, ମୁଖିବିଡ଼ାଇ, ତାଲାପୁଟ, ପାଙ୍ଗିଗୁଡା, କାଡ଼ାମଗୁଡା, ପୁରୀ ମୁଣ୍ଡା, ବୁଢାପୁଟ, ଦୁଧାରି ଓ ସେମିଳିଗୁଡା ଅଞ୍ଚଳର ପ୍ରାୟ ୧୨ହଜାର ହେକ୍ଟର ଜମି ଅଧିଗ୍ରହଣ କରାଯାଇଥିଲା। ଏହିସବୁ ଜମି ପ୍ରତି ବଦଳରେ ବିସ୍ଥାପିତ ପରିବାରର ସଦସ୍ୟଙ୍କୁ ନିଯୁକ୍ତି ସହ ବାସୋପଯୋଗୀ ଜାଗା ଦେବାକୁ ଚୁକ୍ତି ହୋଇଥିଲା। ମାତ୍ର ଏପର୍ଯ୍ୟନ୍ତ କେତେକ ବିସ୍ଥାପିତଙ୍କୁ ଘର ଖଣ୍ଡେ ପାଇଁ ଜାଗାଟିଏ ମିଳିନାହିଁ। ଯାହାକୁ ନେଇ ରବିବାର ସେମିଳିଗୁଡା ବ୍ଳକ ଅଧୀନ ରାଜପୁଟ ପଞ୍ଚାୟତର ଓୟୁଏଟି ନିକଟ ଚୁଲାପାରି ଗ୍ରାମ ପଡ଼ିଆ ଠାରେ ହାଲ ବିସ୍ଥାପିତ ସଂଘ ସଭାପତି ତ୍ରିଲୋଚନ ମୁଦୁଲି ଓ ସମାଜିକ କର୍ମୀ ନନ୍ଦିବାଲି ଚୈତନ୍ୟଙ୍କ ନେତୃତ୍ୱରେ ୨୨ଟି ଗ୍ରାମର ଶତାଧିକ ମହିଳା ପୁରୁଷ ଏକାଠି ହୋଇ ପ୍ରତିବାଦ ଜଣାଇଛନ୍ତି।
ଆୟୋଜିତ ଖବରଦାତା ସମ୍ମିଳନୀରେ ସେମାନେ କହିଛନ୍ତି, ପ୍ରତିଶ୍ରୁତି ଅନୁସାରେ, ସେମାନଙ୍କୁ ଏଯାଏ ସ୍ଥାୟୀ ଜାଗା ଖଣ୍ଡେ ମିଳି ନ ଥିବା ହେତୁ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ସେମାନଙ୍କ ପିଲା ପାଠ ପଢିବାକୁ ସ୍ଥାୟୀ ବାସଗୃହ ତଥା ଜାତିଗତ ପ୍ରମାଣ ପତ୍ର ମିଳିପାରୁ ନାହିଁ। ଏନେଇ ସେମାନେ ବିଭିନ୍ନ ସରକାରୀ ସୁବିଧାରୁ ମଧ୍ୟ ବଞ୍ଚିତ ହେଉଛନ୍ତି। ଗତ ୨୦୧୩ରେ ରାଜ୍ୟ ସରକାର ଜମି ଅଧିଗ୍ରହଣର ଏକ ନୂଆ ନିୟମ ଆଣିଥିଲେ । ଏହି ନିୟମ ଅନୁସାରେ କୌଣସି କାରଖାନା ଅଧିଗ୍ରହଣ କରିଥିବା ଜମିକୁ ଯଦି ଉପଯୋଗ ନକରି ଖାଲି ପକାଇ ରଖନ୍ତି ତେବେ ସେ ଜାଗାକୁ ଆବଶ୍ୟକ ସ୍ଥଳେ ବିସ୍ଥାପିତ ଲୋକଙ୍କୁ ଫେରାଇବେ। ତେବେ ଏଠାରେ ମଧ୍ୟ ହାଲ୍ ପ୍ରଶାସନ ଅଧିଗ୍ରହଣ କରିଥିବା ଗୁଡାଏ ଜମି ଦୀର୍ଘ ବର୍ଷ ଧରି ଖାଲି ପଡିରହିଛି। ସେହି ଜମିଗୁଡିକୁ ଜମିହରାଙ୍କୁ ଫେରାଇବାକୁ ଦାବି ହୋଇଆସୁଛି। ଏନେଇ ବିସ୍ଥାପିତ ସଂଘ ପକ୍ଷରୁ ବହୁବାର ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ ବୋଲି ସଭାପତି ମୁଦୁଲି କହିଛନ୍ତି। ଗ୍ରାମବାସୀଙ୍କ ସହ ଅନ୍ୟମାନଙ୍କ ମଧ୍ୟରେ ଦଳେଇଗୁଡା ସରପଞ୍ଚ ପ୍ରତିନିଧି ମଙ୍ଗୁଡୁ ଜାନି, ସଂଘ କର୍ମକର୍ତ୍ତା ଗୁରୁ ଗାଦବା, ରାମ ରୁଢାଇ, ଅର୍ଜୁନ ରୁଢାଇ, ରବି ରୁଢାଇ, ବଳରାମ ହନ୍ତାଳ, ସମାରୁ ଖିଲ, ବାବୁଲା ମାଝୀ, ଘାସିରାମ ଦେଉଳପାଡିଆ, ଡମୁ ଓୟାଲ, ଘନ ଓୟାଲ ପ୍ରମୁଖ ଉପସ୍ଥିତ ଥିଲେ ।
