କଟକ ଅଫିସ,୧୬ା୫: ସହରରେ ପଚା ଫଳ ବିକିଲେ ଏଣିକି ଦୃଢ଼ କାର୍ଯ୍ୟନୁଷ୍ଠାନ ନିଆଯିବ। ଦୋକାନୀ ସିଧାସଳଖ ବ୍ଲାକ ଲିଷ୍ଟେଡ୍ ହେବା ସହ ସମ୍ପୃକ୍ତ ଦୋକାନୀଙ୍କ ଫଟୋ କାନ୍ଥରେ ଲାଗିବ। କେବଳ ସେତିକି ନୁହଁ ଅପରାଧୀଙ୍କୁ ଯେପରି ତଡ଼ିପାର କରାଯାଉଛି, ପଚା ଫଳ ବିକ୍ରି କରୁଥିବା ବ୍ୟବସାୟୀଙ୍କ ମଧ୍ୟ କଠୋରରୁ କଠୋର ଦଣ୍ଡ ଦିଆଯିବ ବୋଲି ଫଳ ବ୍ୟବସାୟୀମାନଙ୍କୁ କଟକ ମହାନଗର ନିଗମ (ସିଏମ୍ସି) ମେୟର ସୁବାସ ସିଂ ଚେତାଇ ଦେଇଛନ୍ତି ା
କଟକର ପ୍ରମୁଖ ଛକ ଯେପରି ବାଦାମବଡି, ଲିଙ୍କ୍ ରୋଡ୍, ମଧୁପାଟଣା, ଏସ୍ସିବି ମେଡିକାଲ ନିକଟରେ ଦୀର୍ଘ ବର୍ଷ ଧରି ବ୍ୟବସାୟ କରି ଆସୁଛନ୍ତି ଫଳ ବ୍ୟବସାୟୀ। ଛୋଟ ବଡ଼ ବ୍ୟବସାୟୀମାନେ ବେଶ୍ ଭଲ ଭାବରେ ବ୍ୟବସାୟ କରନ୍ତି। କିନ୍ତୁ ବିଗତ କିଛି ଦିନ ମଧ୍ୟରେ ଏହି ଫଳ ବର୍ତ୍ତମାନ ଉଚିତ୍ମାନର ମିଳୁ ନଥିବା ସିଧାସଳଖ ଅଭିଯୋଗ କରୁଛନ୍ତି ଲୋକେ। ଏଥିସହ ପଚା ଫଳ ହେର୍ଫେର୍ ଆଉ ଏକ ସମସ୍ୟା ଉପୁଜିଛି। ବାଦାମବାଡ଼ି ଥାନା ଅଞ୍ଚଳରେ ଥିବା ବସଷ୍ଟାଣ୍ଡ ନିକଟରେ ଏଭଳି ସଙ୍ଗିନ ଅଭିଯୋଗ ଆସିଥିଲା। ଲୋକେ ଉଚିତ ମୂଲ୍ୟ ଦେଇଥିଲେ ପଚା ଫଳ କିଣୁଛନ୍ତି। ଗ୍ରାହକ କିଣିଲା ବେଳେ ଭଲ ଫଳ ଥିବାବେଳେ ଦୋକାନୀ ଜରିରେ ରଖିବାବେଳେ ଫଳ ଅଦଳବଦଳ କରି ପଚା ଫଳ ଭର୍ତ୍ତିକରି ଦେଉଛନ୍ତି। ତେବେ ନକଲି କାରବାରଠାରୁ ନେଇ ପଚା ଫଳ ବ୍ୟବାସୟୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଯୋଜନା ପ୍ରସ୍ତୁତ କରିଛି ସିଏମ୍ସି। ଏନ୍ଫୋର୍ସମେଣ୍ଟ ଟିମ୍କୁ ଏଣିକି ସବୁ ବଡ଼ବଡ଼ ଛକଗୁଡ଼ିକରେ ପାଟ୍ରୋଲିଂ କରିବାକୁ କଡ଼ା ନିର୍ଦ୍ଦେଶ ଦିଆଯାଇଛି। ଯେଉଁଠି ବି ପଚା ଫଳ ବିକ୍ରି ହେଉଥିବ ସେଠି ଦୃଢ଼ କାର୍ଯ୍ୟନୁଷ୍ଠାନ ନିଆଯିବ। ଏବେଠୁ ସାବଧାନ ହେଇକି ଫଳ ବିକ୍ରି କରିବାକୁ ନିର୍ଦ୍ଦେଶ ଦେଇଛନ୍ତି ମେୟର ସୁବାସ ସିଂ।
ହଜାର ହଜାର ବାହାର ଜିଲାରୁ ଲୋକେ ଆସୁଛନ୍ତି। ଖରାଦିନ ହୋଇଥିବାରୁ ଫଳଆଡ଼କୁ ସମସ୍ତେ ମନ ବଳାଉଛନ୍ତି। ତେବେ ଯଦି ଏହାର ସୁଯୋଗ ନେଇ ବ୍ୟବସାୟୀମାନେ ଲୋକଙ୍କୁ ଠକିବା ଆରମ୍ଭ କରିବେ ତେବେ ଏହାକୁ କୌଣସି ମତେ ସହ୍ୟ କରାଯିବନି ବୋଲି ସ୍ପଷ୍ଟ କରିଛନ୍ତି ମେୟର। କିଛି ଦିନ ପୂର୍ବରୁ ପଚା ଫଳ ବିକି ଲୋକଙ୍କୁ ଠକୁଥିବା ଫଳ ବ୍ୟବସାୟୀଙ୍କ ଉପରେ ରେଡ୍ କରିଥିଲା ବାଦାମବାଡ଼ି ଥାନା ପୋଲିସ। ଏ ନେଇ ମେୟର ସିଂ କହିଛନ୍ତି, ବିଷାକ୍ତ ଖାଦ୍ୟ ବିକ୍ରି କରିବା କାହାର ଅଧିକାର ନାହିଁ। ଯାହାର ବ୍ୟବସାୟ କରିବାର ଅଛି ସେ ଦୋ ନମ୍ବରି କାରବାର ବ୍ୟବସାୟ କରିବା ଆଶା ଛାଡି ଦିଅନ୍ତୁ । ଏନେଇ ହୋଟେଲ ଠାରୁ ଆରମ୍ଭକରି ଛୋଟ ଦୋକାନ ପର୍ଯ୍ୟନ୍ତ ସମସ୍ତଙ୍କ ଉପରେ ଚଢାଉ କରାଯିବ। ଫୁଡ ଲାଇସେନ୍ସ, ଟ୍ରେଡ ଲାଇସେନ୍ସ ନଥିବ, ଖାଦ୍ୟର ମାନ ଠିକ ନଥିବ ଏ ସବୁ କରିଲେ କଟକର ମାନ ବଢିବ ନାହିଁ । ବାଦାମବାଡି ହେଉଛି ଓଡ଼ିଶାର ପରିଚୟ। ଓଡ଼ିଶାର ବିଭିନ୍ନ ପ୍ରାନ୍ତରୁ ଏଠାକୁ ଲୋକ ଆସୁଛନ୍ତି। ଶୁଙ୍ଖଳା ସହ କଟକର ଗୌରବକୁ ରକ୍ଷା କରିବା ପାଇଁ ଆବଶ୍ୟକ ପଦକ୍ଷେପ ନିଆଯିବ । ଦରକାର ପଡିଲେ ଦୋକନୀଙ୍କୁ ବ୍ଲାକ ଲିଷ୍ଟେଡ୍ କରାଯାଇ କାନ୍ଥରେ ଫଟୋ ଲଗାଯିବ ବୋଲି ମେୟର କହିଛନ୍ତି।
