ଭୁବନେଶ୍ୱର,୪।୨(ବ୍ୟୁରୋ):ପୋଲିସ ବିଭାଗରେ ଏବେ ଅଜବ ଘଟଣା ନଜରକୁ ଆସିଛି। ଆଇନକାନୁନ, ନୀତିନିୟମ ପାଳନ ପାଇଁ କାର୍ଯ୍ୟ କରୁଥିବା ଏହି ବିଭାଗରେ ବଡ଼ ବ୍ୟତିକ୍ରମ ଘଟିଛି। ପଦୋନ୍ନତି ପାଇଥିବା କେତେଜଣ ବାବୁ ଗାଦି ଲୋଭରେ ନୀତିନିୟମକୁ ଜଳାଞ୍ଜଳି ଦେଇ ପୋଷ୍ଟିଂ ଅର୍ଡର ନ ଆସୁଣୁ ଚୌକି ଦଖଲ କରିଛନ୍ତି। ସେମାନଙ୍କ ମନରେ ଦାମୀ ଚୌକି ଖସି ଯିବାର ଭୟ ବି ଘାରିଛି। ଏବେ ବି ଡେପୁଟେଶନରେ ଥିବା କିମ୍ବା ଅନ୍ୟ କୌଣସି କାରଣରୁ ଆଉକେତେଜଣ ଅଫିସର ପଦୋନ୍ନତି ପାଇନାହାନ୍ତି। ସେମାନେ କାଳେ କୋର୍ଟଙ୍କ ଆଶ୍ରୟ ନେଇ ପଦୋନ୍ନତି ଓ ନୂଆ ପୋଷ୍ଟିଂ ଉପରେ ଅଙ୍କୁଶ ଲଗାଇଦେବେ, ସେପରି ଆଶଙ୍କା କରି ଏମାନେ ଆଗୁଆ ଜଏନ୍ କରିଛନ୍ତି। ପୋଲିସବାବୁଙ୍କ ଏପରି ଆଧିପତ୍ୟକୁ ନେଇ ବିଭାଗୀୟ ଅଧିକାରୀଙ୍କ ମଧ୍ୟରେ ଚର୍ଚ୍ଚା ଜୋର୍ ଧରିଛି। ସେମାନେ ଖୋଲାଖୋଲି ମୁହଁ ନ ଖୋଲୁଥିଲେ ମଧ୍ୟ ଉଚ୍ଚ ଅଧିକାରୀଙ୍କ ନିକଟରେ କଥା ପହଞ୍ଚତ୍ଥିବା ସୂଚନା ମିଳିଛି।
ନିକଟରେ ଓଡ଼ିଶା ପୋଲିସରେ ଏକ ବଡ଼ଧରଣର ପଦୋନ୍ନତି କରାଯାଇଥିଲା। ଏକକାଳୀନ ୩୦୧ ଇନ୍ସପେକ୍ଟରଙ୍କୁ ଡିଏସ୍ପି ପାହ୍ୟାକୁ ପଦୋନ୍ନତି ମିଳିଥିବା ନେଇ ଗତ ୩୦ ତାରିଖରେ ବିଜ୍ଞପ୍ତି ପ୍ରକାଶ ପାଇଥିଲା। ଏଯାଏ ଏମାନଙ୍କ ନୂଆ ପୋଷ୍ଟିଂ ସଂକ୍ରାନ୍ତରେ କୌଣସି ବିଜ୍ଞପ୍ତି ପ୍ରକାଶ ପାଇନି। କିନ୍ତୁ ଆଶ୍ଚର୍ଯ୍ୟର କଥା ହେଲା, ପୋଷ୍ଟିଂ ଆସିବା ପୂର୍ବରୁ ଡିଏସ୍ପି ଇନ୍ଚାର୍ଜ ଥିବା କେତେଜଣ ଅଧିକାରୀ ନୂଆ ପଦରେ ଜଏନ୍ କରିସାରିଲେଣି। ଏଠାରେ ପ୍ରଶ୍ନ ଉଠୁଛି, ଅର୍ଡର ନ ଆସିବା ପୂର୍ବରୁ ସେମାନେ ନିଜ ପୋଷ୍ଟିଂ ସମ୍ପର୍କରେ କିପରି ଜାଣିଲେ? ନା ଚୌକି ଆଉ କିଏ ନେଇଯିବ ଭାବି ଏପରି ଆଗୁଆ ଜଏନ୍ କରିଛନ୍ତି। କୋରାପୁଟ, ମାଲକାନଗିରି ଆଦି ମାଓବାଦୀ ପ୍ରଭାବିତ ଅଞ୍ଚଳକୁ ଠେଲି ହୋଇଯିବାର ଭୟ ରଖି କେତେଜଣ ଅଫିସର ନିଜର ଯୋଗଦାନପତ୍ର ଦେଇଛନ୍ତି ବୋଲି କୌତୂହଳରେ ତାଙ୍କ ବନ୍ଧୁମାନେ କହୁଛନ୍ତି। ଏହାକୁ ନେଇ ଅନ୍ୟ ଅଧିକାରୀଙ୍କ ମଧ୍ୟରେ ନାନା ଗୁଞ୍ଜରଣ ଚାଲିଥିବାବେଳେ ଆଉ କେହି ଉପର ମହଲରୁ ଆଗୁଆ ଜଏନିଂ ପାଇଁ ଇଙ୍ଗିତ ଆସିଥିବା ଆଲୋଚନା କରୁଛନ୍ତି। ପଦୋନ୍ନତି ବିଜ୍ଞପ୍ତି ଗୃହ ବିଭାଗ ପ୍ରକାଶ କରିଥାଏ, କିନ୍ତୁ ପୋଷ୍ଟିଂ ପୋଲିସ ମହାନିର୍ଦ୍ଦେଶକ (ଡିଜିପି) ହିଁ କରିଥାନ୍ତି। ତେବେ ଏମିତି କେଉଁ ସ୍ଥିତି ସୃଷ୍ଟି ହେଲା ଯେ, ଜଏନିଂ ପାଇଁ ଅଫିସରମାନେ ଡିଜିପିଙ୍କ ଅର୍ଡରକୁ ଅପେକ୍ଷା କଲେ ନାହିଁ। ନିର୍ଦ୍ଦେଶ ପୂର୍ବରୁ କେଉଁ ବରିଷ୍ଠ ଅଧିକାରୀମାନେ ଏମାନଙ୍କୁ ଜଏନିଂ ପାଇଁ ସାହସ ଦେଲେ ବା ସ୍ବୀକୃତି ପ୍ରଦାନ କଲେ, ତାହାକୁ ନେଇ ପୋଲିସ ବିଭାଗରେ ଚର୍ଚ୍ଚା ଜୋର୍ ଧରିଛି। ଏହି ଘଟଣାକୁ ବିଭାଗୀୟ ଉଚ୍ଚପଦସ୍ଥ ଅଧିକାରୀମାନେ ମଧ୍ୟ ସ୍ବୀକାର କରିଛନ୍ତି। ଜଣେ ବରିଷ୍ଠ ଅଧିକାରୀ କହିଛନ୍ତି, ଏପର୍ଯ୍ୟନ୍ତ ସେମିତି କିଛି ଜଏନିଂ ଅର୍ଡର ଆମ ପାଖକୁ ଆସିନାହିଁ। ପୂର୍ବରୁ ଇନ୍ଚାର୍ଜରେ ଥିବା କେତେଜଣ ଅଫିସର ଜଏନିଂ ନେଇଛନ୍ତି। ସେମାନେ ପୂର୍ବରୁ ଯେଉଁ ଜାଗାରେ ଥିଲେ ସେହି ଜାଗାରେ ଜଏନ୍ କରିଛନ୍ତି। ସେମାନଙ୍କ ପ୍ରମୋଶନ ହୋଇଛି, କିନ୍ତୁ ଟ୍ରାନ୍ସଫର ହୋଇନାହିଁ। ଅର୍ଡର ଆସିଲେ ଅନ୍ୟମାନଙ୍କର ଜଏନିଂ ହେବ।
