ଭଞ୍ଜନଗର,୨୨।୯(ବାବୁଲା ପ୍ରଧାନ): ବିଗତ ୧୫ ଦିନ ମଧ୍ୟରେ କଳିଙ୍ଗା ଘାଟିରୁ ୫ରୁ ଊଦ୍ଧର୍ବ ଥର
ପଥର ଖସିଲାଣି। ଗତ ୧୬ ତାରିଖରେ ବଡ଼ ଧରଣର ପଥର ସବୁ ଝରଣାରେ ଗଡି ଗଡ଼ି ପାହାଡ ତଳକୁ ଆସିଥିଲା। ଫଳରେ ଭଞ୍ଜନଗର ଫୁଲବାଣୀ ଜାତୀୟ ରାଜପଥର ଏକାଧିକ ସ୍ଥାନରେ ରାସ୍ତା ଧୋଇ ହୋଇଯାଇଥିଲା। ତେଣୁ ଆଜକୁ ଏକ ସପ୍ତାହ ହେବ ଜାତୀୟ ରାଜପଥ ଉପରେ ଯାତାୟତ ବନ୍ଦ ଅଛି । ଆଗକୁ ରାସ୍ତା ସ୍ବଭାବିକ ହେବାକୁ ବହୁତ ଦିନ ଲାଗିଯିବ।
ଗତ ୧୬ ତାରିଖରେ ବହୁ ପରିମାଣର ପଥର ଖସିଥିଲା। ସେଥିମଧ୍ୟରୁ ଆହୁରି ଶହ ଶହ ପଥର ବିପଦଶଙ୍କୁଲ ଅବସ୍ଥାରେ ରାସ୍ତା କଡର ପାହାଡ ଉପରେ ରହିଛି। ବର୍ତ୍ତମାନ ରାସ୍ତା ସ୍ବଭାବିକ ପାଇଁ ବଡବଡ ହାଇୱା ଗାଡ଼ି ଲାଗିଛି। ମାତ୍ର ଉକ୍ତ ଗାଡ଼ି ଏବଂ ବାରମ୍ବାର ବର୍ଷାର ପ୍ରଭାବରେ ପୁଣି ପଥର ଖସୁଛି। ଯେଉଁ ପଥର ଗୁଡ଼ିକ ବିପଦ ସଙ୍କୁଳ ଅବସ୍ଥାରେ ଅଛି ତାହା ଖସୁଛି। ସୋମବାର ଦିନକ ମଧ୍ୟରେ ୩ ଥର ପଥର ଖସିଛି। ଖବର ପାଇ ସନ୍ଧ୍ୟାରେ ଭଞ୍ଜନଗର ତହସିଲଦାର ଅଭିପ୍ସା ପଟ୍ଟନାୟକ, ଅତିରିକ୍ତ ତହସିଲଦାର ଅବିନାଶ ମହାର ପ୍ରମୁଖ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି।
ପରେ ସେମାନେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ରିପୋର୍ଟ ପ୍ରଦାନ କରିଛନ୍ତି। ଅପରପକ୍ଷେ ଉକ୍ତ ରାସ୍ତାଟି ଏକ ଗରୁତ୍ୱପୂର୍ଣ୍ଣ ରାସ୍ତା ହୋଇଥିବା ବେଳେ ଯୁଦ୍ଧକାଳୀନ ଭିତ୍ତିରେ ଉକ୍ତ ରାସ୍ତାର ମରାମତି କରିବାର ଆବଶ୍ୟକତା ରହିଛି। ତେଣୁ ଅତ୍ୟାଧୁନିକ ଯନ୍ତ୍ରପାତି ମରାମତିରେ ବ୍ୟବହାର କରିବା ଆବଶ୍ୟକତା ରହିଛି। ତାହାହେଲେ ଯାଇ ରାସ୍ତା କାମ ତୁରନ୍ତ ସରିବ। ବର୍ତ୍ତମାନ ଶ୍ରମିକମାନେ ବିପଦ ସଙ୍କୁଳ ଅବସ୍ଥାରେ ରାସ୍ତା କାମ କରୁଛନ୍ତି। ତେଣୁ ଶ୍ରମିକ ମାନଙ୍କ ସୁରକ୍ଷା ପ୍ରତି ଦୃଷ୍ଟି ଦେବାକୁ ପଡିବ ବୋଲି ଦାବି ହେଉଛିି।
