ନୂଆଦିଲ୍ଲୀ,୨୫।୪ : ’ସୁପ୍ରିମକୋର୍ଟ କହିଛନ୍ତି, ସମ୍ବିଧାନ ଅନୁଯାୟୀ ବାଧ୍ୟତାମୂଳକ ଭାବେ ନାଗରିକଙ୍କ ଅଧିକାର ତଥା ସ୍ବାଧୀନତାର ସୁରକ୍ଷା ପାଇଁ ରାଜ୍ୟ ଦାୟିତ୍ୱ ଗ୍ରହଣ କରିବା ଆବଶ୍ୟକ। ଜଷ୍ଟିସ ଅଜୟ ରାସ୍ତୋଗୀ ଏବଂ ଜଷ୍ଟିସ ବେଲା ଏମ ତ୍ରିବେଦୀଙ୍କ ନେତୃତ୍ୱରେ ଗଠିତ ଏକ ବେଞ୍ଚ ମଙ୍ଗଳବାର ଏକ ମାମଲାର ଶୁଣାଣି ବେଳେ ଏହି ମନ୍ତବ୍ୟ ଦେଇଛନ୍ତି।
ଲ’ ଇଣ୍ଟର୍ନ ସୋନୁ ମାନସୁରୀ ସହ ଜଡିତ ଏକ ମାମଲାର ଶୁଣାଣି ହୋଇଥିଲା। ଏହି ସମୟରେ ଜଷ୍ଟିସ ଅଜୟ ରାସ୍ତୋଗି ଏବଂ ଜଷ୍ଟିସ ବେଲା ଏମ ତ୍ରିବେଦୀଙ୍କ ଏକ ବେଞ୍ଚ ମଧ୍ୟପ୍ରଦେଶ ସରକାରଙ୍କୁ ସୋନୁ ମାନସୁରୀଙ୍କ ବିରୋଧରେ ଦାଖଲ ହୋଇଥିବା ଏଫଆଇଆରରେ ଏପର୍ଯ୍ୟନ୍ତ କରାଯାଇଥିବା ଯାଞ୍ଚ ସମ୍ପର୍କରେ ଷ୍ଟାଟସ ରିପୋର୍ଟ ଦାଖଲ କରିବାକୁ କହିଥିଲେ।
ବାସ୍ତବରେ ମଧ୍ୟପ୍ରଦେଶ ପୋଲିସ ପଠାନ ଚଳଚ୍ଚିତ୍ର ସମୟରେ ବିବାଦରେ ହିନ୍ଦୁ ସଂଗଠନର କାର୍ଯ୍ୟକର୍ତ୍ତାଙ୍କୁ ଗିରଫ କରିଥିଲା। ଏହା ପରେ, ଯେତେବେଳେ ସେମାନଙ୍କୁ କୋର୍ଟରେ ହାଜର କରାଯାଉଥିଲା, ଲ’ ଇଣ୍ଟର୍ନ ସୋନୁ ସେମାନଙ୍କ ଭିଡିଓ ପ୍ରସ୍ତୁତ କରୁଥିବାବେଳେ ଧରାପଡିଥିଲେ। ପରେ ପଚରାଉଚରା ବେଳେ ସୋନୁ କହିଥିଲେ, ଆଡଭୋକେଟ ନୁରଜାହାନଙ୍କ ନିର୍ଦ୍ଦେଶରେ ସେ ଏହି ସବୁ କାମ କରୁଛନ୍ତି। ଦିଲ୍ଲୀର ନିଷିଦ୍ଧ ସଂଗଠନ ପପୁଲାର ଫ୍ରଣ୍ଟ ଅଫ ଇଣ୍ଡିଆକୁ ନୁରଜାହାନ ଏହି ସୂଚନା ଦେଉଥିଲେ। ଏହି ମାମଲାରେ ଦାଖଲ ହୋଇଥିବା ଏଫଆଇଆର୍ରେ ମାନସୁରୀଙ୍କୁ ଜଣେ ଅଭିଯୁକ୍ତ ଭାବେ ନାମିତ କରାଯାଇଛି। ୨୮ ଜାନୁଆରୀରେ ସୋନୁଙ୍କୁ ଜେଲକୁ ପଠାଯାଇଥିଲା। ପରେ ଯେତେବେଳେ ତାଙ୍କ ମାମଲା ସର୍ବୋଚ୍ଚ ଅଦାଲତରେ ପହଞ୍ଚିଲା, ମାର୍ଚ୍ଚ ୨୨ ରେ କୋର୍ଟ ତାଙ୍କୁ ଜାମିନ ପ୍ରଦାନ କରିଥିଲେ।
