କଲମ୍ବୋ,୮ା୨- ଟି୨୦ ବିଶ୍ୱକପ୍ରେ ରବିବାର ସନ୍ଧ୍ୟାରେ ଖେଳାଯାଇଥିବା ମ୍ୟାଚ୍ରେ ଶ୍ରୀଲଙ୍କା ୨୦ ରନରେ ଆୟର୍ଲାଣ୍ଡକୁ ପରାସ୍ତ କରିଛି। ଶ୍ରୀଲଙ୍କା ଦ୍ୱାରା ପ୍ରଦତ୍ତ ୧୬୪ ରନର ଟାର୍ଗେଟକୁ ପିଛା କରି ଆୟର୍ଲାଣ୍ଡ ୧୪୩ ରନରେ ଅଲଆଉଟ୍ ହୋଇଯାଇଥିଲା। ଶ୍ରୀଲଙ୍କା ଆସନ୍ତା ୧୨ ତାରିଖରେ ତା’ର ଦ୍ୱିତୀୟ ମ୍ୟାଚ୍ରେ ଓମାନକୁ ଭେଟିବ।
ବ୍ୟାଟିଂ କରିଥିବା ଶ୍ରୀଲଙ୍କା ଆରମ୍ଭରୁ କମିଲ ମିଶାରା(୧୪)ଙ୍କ ଉଇକେଟ ହରାଇଥିଲା। ଅନ୍ୟତମ ଓପନ ପଥୁମ ନିଶଙ୍କା ଓ କୁସାଲ ମେଣ୍ଡିସ ଦ୍ୱିତୀୟ ଉଇକେଟରେ ୩୪ ରନ ଯୋଡ଼ିଥିଲେ। ଏହାପରେ ଦଳ କ୍ରମାଗତ ବ୍ୟବଧାନରେ ନିଶଙ୍କା (୨୪), ପବନ ରତନାୟକେ (୫) ଓ ଦୁନିଥ ଓ୍ବେଲାଲେଜ (୧୦)ଙ୍କ ଉଇକେଟ ହରାଇଥିଲା। ଏହିଠାରୁ କୁସାଲ ଓ କାମିଣ୍ଡୁ ମେଣ୍ଡିସ ପଞ୍ଚମ ଉଇକେଟରେ ୨୯ ବଲରେ ଦ୍ରୁତ ୬୭ ରନ କରି ଦଳୀୟ ସ୍କୋରକୁ ୧୫୦ ପାର କରାଇଥିଲେ।
କାମିଣ୍ଡୁ ୧୯ ବଲରେ ୪୪ (୪ ଚୌକା ଓ ୨ ଛକା) ରନ କରି ଆଉଟ୍ ହେବାରୁ ଏହି ଯୋଡ଼ି ଭାଙ୍ଗିଥିଲା। ଅଧିନାୟକ ଦାସୁନ ଶନକା ଖାତା ଖୋଲିବା ପୂର୍ବରୁ କ୍ୟାଚ୍ ଆଉଟ୍ ହୋଇଥିଲେ। ଫଳରେ ଶ୍ରୀଲଙ୍କା ନିର୍ଦ୍ଧାରିତ ୨୦ ଓଭରରେ ୬ ଉଇକେଟ ହରାଇ ୧୬୩ ରନ କରିଥିଲା। କୁସାଲ ୪୩ ବଲରେ ୫ ଚୌକା ସହ ୫୬ ରନ କରି ଅପରାଜିତ ରହିଥିଲେ।
ଜବାବରେ ଆୟର୍ଲାଣ୍ଡ ଖୁବ ଶସ୍ତାରେ ଅଧିନାୟକ ପଲ ଷ୍ଟର୍ଲିଙ୍ଗ (୬)ଙ୍କ ଉଇକେଟ ହରାଇଥିଲା। ଅନ୍ୟତମ ଓପନର ରସ ଆଡେଆର ୩୪ (୫ ଚୌକା ଓ ୧ ଛକା), ହ୍ୟାରୀ ଟେକ୍ଟର ୪୦(୧ ଚୌକା), ଲର୍କାନ ଟକର ୨୧ ରନ କରିଥିଲେ। ଏକଦା ୧୦୪ ରନରେ ୨ ଉଇକେଟ ହରାଇଥିବା ଆୟର୍ଲାଣ୍ଡ ମାତ୍ର ୧୪୩ ରନରେ ଅଲଆଉଟ୍ ହୋଇଯାଇଛି। ଶ୍ରୀଲଙ୍କା ପାଇଁ ଓ୍ବାନିନ୍ଦୁ ହସରଙ୍ଗା ଓ ମହିଶ ତିକ୍ଷଣା ୩ ଲେଖାଏ ଉଇକେଟ ନେଇଥିଲେ।
