ଦିଗପହଣ୍ଡି, ୨୩ା୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ରାଜବାଟି ପରିସରରେ ଥିବା ଶ୍ରୀ ଜଗନ୍ନାଥ ମନ୍ଦିରରୁ ଘଣ୍ଟ ଚୋରି ହୋଇଥିବା ମାମଲାରେ ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଜାମିନ ଆବେଦନ ନାମଞ୍ଜୁର ହେବାରୁ ତାଙ୍କୁ ଦିଗପହଣ୍ଡି ସବ୍ ଜେଲ୍ ହାଜତକୁ ପଠାଇ ଦିଆଯାଇଛି। ଗିରଫ ଅଭିଯୁକ୍ତ ଜଣକ ହେଲେ ଦିଗପହଣ୍ଡି ସାହାଣୀ ସାହିର ମୁରଲୀ ଦାସ (୧୯)। ଦିଗପହଣ୍ଡି ଥାନା ଏଏସଆଇ ଦିଲ୍ଲୀପ ଗରଡ଼ା ଗୁରୁବାର ଅପରାହ୍ନ ପ୍ରାୟ ୧ଟା ସମୟରେ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଏନେଇ ଥାନାରେ ମାମଲା ନଂ ୪୧୬/୨୫ ଏବଂ ଭାରତୀୟ ନ୍ୟାୟ ସଂହିତା (BNS)ର ଦଫା ୩୩୧(୩)/୩୦୫/୩(୫) ଅନୁଯାୟୀ ମକଦ୍ଦମା ରୁଜୁ ହୋଇଥିଲା।
ଗତ ୨୦୨୫ ନଭେମ୍ବର ୧୦ ତାରିଖରେ ଅଭିଯୁକ୍ତ ମୁରଲୀ ଏବଂ ଜଣେ ନାବାଳକ ରାଜବାଟି ପରିସରସ୍ଥ ମନ୍ଦିର ଭଣ୍ଡାର ଘର ଛାତର ଝିକର ଭାଙ୍ଗି ପ୍ରାୟ ୧୨ କିଲୋଗ୍ରାମ ଓଜନର ପିତ୍ତଳ ଘଣ୍ଟ ଚୋରି କରି ନେଇଥିଲେ। ଘଟଣାର ପରଦିନ ମନ୍ଦିର ତତ୍ତ୍ୱାବଧାରକ ଦେବୀ ପ୍ରସାଦ ରଥ ସିସିଟିଭି ଫୁଟେଜରୁ ଉଭୟଙ୍କୁ ଚିହ୍ନଟ କରି ଥାନାରେ ଏତଲା ଦେଇଥିଲେ। ପୋଲିସ ନାବାଳକଙ୍କ ସୂଚନା ମୁତାବକ ଦିଗପହଣ୍ଡି ପୁଞ୍ଜିକଂୟା ଛକସ୍ଥିତ ଏକ ପିତ୍ତଳ ସାମଗ୍ରୀ ଦୋକାନରେ ଚଢ଼ାଉ କରି ଚୋରି ହୋଇଥିବା ଘଣ୍ଟ ଜବତ କରିଥିଲା। ଦୋକାନ ମାଲିକ ଉଦୟ ନାଥ ନାୟକ ୧୬ ଶହ ଟଙ୍କା ଦେଇ ଏହାକୁ କିଣିଥିବା ସ୍ୱୀକାର କରିଥିଲେ। ସହଯୋଗୀ ନାବାଳକଙ୍କୁ ପୂର୍ବରୁ ବାଳ ସୁଧାର ଗୃହକୁ ପଠାଯାଇଥିବା ବେଳେ, ଘଟଣା ପରଠାରୁ ଫେରାର ଥିବା ମୁଖ୍ୟ ଅଭିଯୁକ୍ତ ମୁରଲୀ ଦାସଙ୍କୁ ବର୍ତ୍ତମାନ ପୋଲିସ ଗିରଫ କରି କୋର୍ଟ ଚାଲାଣ କରିଛି।
