ଟିକିରି,୨୩।୩(ଡି.ଏନ୍.ଏ.) – ଗରିବ ଓ ବାସହୀନଙ୍କ ପାଇଁ ସରକାର ଆବାସ ଯୋଜନାରେ ବାସଗୃହ ଯୋଗାଉଛନ୍ତି। ହେଲେ ତଳସ୍ତରରେ ଏହା ଠିକ୍ରେ କାର୍ଯ୍ୟକାରୀ ହେଉ ନ ଥିବାରୁ ଅନେକ ଲୋକଙ୍କ ପାଖରେ ଯୋଜନାର ସୁଫଳ ପହଞ୍ଚିପାରୁନାହିଁ। ଆଦିବାସୀ ଅଧ୍ୟୁଷିତ ରାୟଗଡ଼ା ଜିଲା କାଶୀପୁର ବ୍ଲକ ଡଙ୍ଗାସିଲ ପଞ୍ଚାୟତର ବେଲଗଛତୁଣ୍ଡା ଗ୍ରାମରେ ଏହାର ନଗ୍ନ ଉଦାହରଣ ଦେଖିବାକୁ ମିଳିଛି। ଗାଁର ରାଧାମନି ନାଏକ(୮୦)ଭଙ୍ଗା କୁଡ଼ିଆରେ କଷ୍ଟରେ ଚଳୁଥିବାବେଳେ ଏ ପର୍ଯ୍ୟନ୍ତ ଆବାସ ଯୋଜନାରେ ଘରଟିଏ ପାଇପାରିନାହାନ୍ତି। ଘରଟିଏ ପାଇଁ ଅପେକ୍ଷା କରି କରି ଜୀବନ ଚାଲିଯିବ ବୋଲି ରାଧାମନି ଦୁଃଖର ସହ କହିଛନ୍ତି। ରାଧାମନିଙ୍କ ସ୍ବାସ୍ଥ୍ୟାବସ୍ଥା ଭଲ ନାହିଁ। ଘରେ ଜଣେ ଅବିବାହିତ ଝିଅ ମଧ୍ୟ ରହୁଛନ୍ତି। ଭତ୍ତା ବାବଦକୁ ଯାହା ଟଙ୍କା ମିଳୁଛି ସେଥିରେ ଦୁହେଁ ଚଳୁଛନ୍ତି। ହେଲେ ଭଙ୍ଗା କୁଡ଼ିଆରେ ତାଙ୍କ ଜୀବନ ବିତୁଛି। ଅନେକ ସମୟରେ ଘର ମଧ୍ୟରେ ସରୀସୃପଙ୍କ ସହ ରାତି ବିତାଇବାକୁ ପଡ଼ୁଛି ବୋଲି ସେ କୋହଭରା କଣ୍ଠରେ କହିଛନ୍ତି। ପ୍ରଶାସନ ପକ୍ଷରୁ ଶେଷ ଜୀବନରେ ତାଙ୍କୁ ଆବାସ ଖଣ୍ଡିଏ ଦେଲେ ଶାନ୍ତିରେ ଓ ସୁରକ୍ଷିତଭାବେ ଝିଅ ସହ ରହିପାରିବେ ବୋଲି ଗ୍ରାମବାସୀ ପ୍ରକାଶ କରିଛନ୍ତି।
