ବେଜିଂ,୧୬।୯: ଚାଇନା ରାଷ୍ଟ୍ରପତି ସି ଜିନପିଙ୍ଗଙ୍କ ସ୍ବାସ୍ଥ୍ୟାବସ୍ଥାକୁ ନେଇ ପ୍ରାୟତଃ ବିଭିନ୍ନ ଖବର ସାମ୍ନାକୁ ଆସିଥାଏ। ପୁଣିଥରେ ସୋସିଆଲ ମିଡିଆରେ ତାଙ୍କ ସ୍ବାସ୍ଥ୍ୟାବସ୍ଥାକୁ ନେଇ ଚର୍ଚ୍ଚା ଆରମ୍ଭ ହୋଇଛି।
ସେପ୍ଟେମ୍ବର ୧୨-୧୩ରେ ଅନୁଷ୍ଠିତ ବ୍ରିକ୍ସ (BRICS) ସମ୍ମିଳନୀରେ ଯୋଗଦେବା ପାଇଁ ସି ଜିନପିଙ୍ଗ ଭାରତ ଗସ୍ତ କରିଥିଲେ। ସେ ନୂଆଦିଲ୍ଲୀରେ ମାତ୍ର ଗୋଟିଏ ଦିନ ରହିବାକୁ ନେଇ ସମାଲୋଚକମାନେ ପ୍ରଶ୍ନ ଉଠାଉଛନ୍ତି।
ବ୍ରିକ୍ସ ଶିଖର ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚାଇନା ରାଷ୍ଟ୍ରପତି ସି ଜିନପିଙ୍ଗଙ୍କୁ ପଚାରିଥିଲେ, ‘ସବୁ ଠିକ ଅଛି କି?’
ସ୍ଥାନୀୟ ଗଣମାଧ୍ୟମ ଅନୁଯାୟୀ, ପ୍ରଧାନମନ୍ତ୍ରୀ ମୋଦି ଲକ୍ଷ୍ୟ କରିଥିଲେ ଯେ ରାଷ୍ଟ୍ରପତି ସି ଜିନପିଙ୍ଗ ଅସନ୍ତୁଷ୍ଟ ଦେଖାଯାଉଥିଲେ ଏବଂ ତାଙ୍କ ବିଷୟରେ ଜାଣିବା ପାଇଁ ଅଟକି ଯାଇଥିଲେ, ଯେତେବେଳେ ତାଙ୍କ ସହଯୋଗୀମାନେ ମଧ୍ୟ ଶୀଘ୍ର ସିଙ୍କ ପାଖକୁ ଯାଉଥିବା ଦେଖାଯାଇଥିଲା।
ଏହା ଏକ କ୍ଷଣିକ ମୁହୂର୍ତ୍ତ ଥିଲା ଯାହା ଅନଲାଇନରେ ଭାଇରାଲ ହୋଇଥିଲା ଯେତେବେଳେ ସମାଲୋଚକମାନେ ଚାଇନା ନେତାଙ୍କ ସ୍ବାସ୍ଥ୍ୟାବସ୍ଥା ଉପରେ ଗୁରୁତ୍ୱାରୋପ କରିବା ଆରମ୍ଭ କରିଥିଲେ।
ଚାଇନାର ଜଣେ ଲେଖକ ତଥା ତୀବ୍ର ସମାଲୋଚକ ଗର୍ଡନ ଜି. ଚାଙ୍ଗ ଲେଖିଛନ୍ତି, ‘ସି ଜିନପିଙ୍ଗ ଅସୁସ୍ଥ ଅଛନ୍ତି। ଏଥର ଚାଇନା ତାଙ୍କର ଏହି ଅବସ୍ଥାକୁ ଲୁଚାଇ ପାରିଲା ନାହିଁ।’
ଚାଇନାର ଅନ୍ୟ ଜଣେ ସମାଲୋଚକ ଜେନିଫର୍ ଜେଙ୍ଗ, ଚାଇନା କମ୍ୟୁନିଷ୍ଟ ପାର୍ଟି (ସିସିପି)ର ଜଣେ ପୂର୍ବତନ ଅଧିକାରୀଙ୍କ ତଥ୍ୟ ଆଧାରରେ ଦାବି କରିଛନ୍ତି ଯେ ‘ସି ଜିନପିଙ୍ଗ ’ସେରିବେଲାର୍ ଆଟ୍ରୋଫି’ (ମସ୍ତିଷ୍କର ଏକ ଅଂଶ ସଙ୍କୁଚିତ ହେବା ଜନିତ ରୋଗ)ରେ ପୀଡ଼ିତ ଅଛନ୍ତି।’
ଜେନିଫର୍ ଜେଙ୍ଗ କୁହନ୍ତି, ‘ଏହି ଅବସ୍ଥାର ଚିକିତ୍ସା ବା ପରିଚାଳନା କରିବା କଷ୍ଟକର, କାରଣ ଶରୀରର ଅନ୍ୟାନ୍ୟ ଅଙ୍ଗପ୍ରତ୍ୟଙ୍ଗ ପରି ‘ସେରିବେଲମ’ (ମସ୍ତିଷ୍କର ପଶ୍ଚାତ ଭାଗ)କୁ ସହଜରେ ପ୍ରତିରୋପଣ (transplant) ମାଧ୍ୟମରେ ବଦଳାଯାଇପାରିବ ନାହିଁ। ବିଭିନ୍ନ ଲକ୍ଷଣକୁ ଲକ୍ଷ୍ୟ କଲେ, ଏହା ସମ୍ଭବ ଯେ ସି ଜିନପିଙ୍ଗ ପ୍ରକୃତରେ ସ୍ବାସ୍ଥ୍ୟଗତ ସମସ୍ୟାର ସମ୍ମୁଖୀନ ହେଉଛନ୍ତି।’
ରାଷ୍ଟ୍ରପତି ସି ଜିନପିଙ୍ଗଙ୍କ ଭାରତ ଗସ୍ତଯାହା ମାତ୍ର ୨୪ ଘଣ୍ଟା ପାଇଁ ଥିଲା ତାଙ୍କ ସରକାରଙ୍କ ସମାଲୋଚକମାନଙ୍କୁ ଆଲୋଚନା ପାଇଁ ଏକ ନୂଆ ବିଷୟ ଯୋଗାଇ ଦେଇଛି। ଫଳସ୍ବରୂପ, ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥା ପ୍ରସଙ୍ଗ ସର୍ବସାଧାରଣଙ୍କ ଦୃଷ୍ଟିକୁ ଆସିଛି।
ସି ଜିନପିଙ୍ଗ ସମ୍ମିଳନୀରୁ ଶୀଘ୍ର ଚାଲିଯାଇଥିଲେ ଏବଂ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ଆୟୋଜିତ ଭୋଜି ସଭାରେ ଯୋଗ ଦେଇନଥିଲେ, ଯେତେବେଳେ କି ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ ରାମାଫୋସା ସେଠାରେ ରହିଯାଇଥିଲେ।
ଆମେରିକାକୁ ପଳାଇ ଯାଇଥିବା ଚାଇନାର ଜଣେ ରାଜନୈତିକ କର୍ମୀ ଜି ୱାନ୍ଜୁନ ଲେଖିଛନ୍ତି, ‘ବ୍ରିକ୍ସ (BRICS) ସମ୍ମିଳନୀ ଶେଷ ହେବା ପୂର୍ବରୁ ହିଁ, ସି ଜିନପିଙ୍ଗ ଭାରତ ଗସ୍ତ ଶେଷ କରି ନିର୍ଦ୍ଧାରିତ ସମୟ ପୂର୍ବରୁ ବେଜିଂ ଫେରିଯାଇଥିଲେ।’
ଜି ୱାନ୍ଜୁନ ଆହୁରି ମଧ୍ୟ ଲେଖିଛନ୍ତି, ‘ବିମାନରେ ଚଢ଼ିବା ସମୟରେ ସି ଜିନପିଙ୍ଗଙ୍କୁ ଚାଲିବାରେ ଅସୁବିଧା ହେଉଥିବା ପରି ମନେହେଉଥିଲା; ତାଙ୍କ ଚାଲିବା ଅସ୍ଥିର ଥିଲା ଏବଂ ତାଙ୍କ ଶରୀର ବାରମ୍ବାର ବାମ ପାର୍ଶ୍ୱକୁ ଢଳି ପଡ଼ୁଥିଲା।”
