ଓଡ଼ିଶାରେ ରିୟଲ୍ ଇଷ୍ଟେଟ୍ର ସ୍ଥିତି ଭଲ ରହିଛି। ବର୍ତ୍ତମାନ ରାଜ୍ୟବାସୀ ରିୟଲ୍ ଇଷ୍ଟେଟ୍ କ୍ଷେତ୍ରରେ ନିବେଶ ପାଇଁ ମନ ବଳାଉଛନ୍ତି। ଏହା ଉପରେ କେବଳ ଭୁବନେଶ୍ୱର ନୁହେଁ, ଅନ୍ୟ ସହରଗୁଡ଼ିକରେ ମଧ୍ୟ ଲୋକଙ୍କ ଆଗ୍ରହ ବଢ଼ୁଥିବା କହିଛନ୍ତି ଇଭୋସ ବିଲ୍ଡକନ୍ ପ୍ରାଇଭେଟ୍ ଲିମିଟେଡ୍ର ପରିଚାଳନା ନିର୍ଦ୍ଦେଶକ କଳିଙ୍ଗ କେଶରୀ ରଥ। ଧରିତ୍ରୀକୁ ସ୍ବତନ୍ତ୍ର ସାକ୍ଷାତ୍କାରରେ ସେ ଅନେକ କଥା ଶେୟାର କରିଛନ୍ତି।
ରିୟଲ ଇଷ୍ଟେଟ୍ ବଜାର ସ୍ଥିତି କ’ଣ ରହିଛି?
ଅଗ୍ରଣୀ ଓ ମାନ୍ୟତାପ୍ରାପ୍ତ କ୍ଷେତ୍ରଗୁଡ଼ିକ ମଧ୍ୟରେ ରିୟଲ୍ ଇଷ୍ଟେଟ୍ ମାର୍କେଟ ଅନ୍ୟତମ। ରାଜ୍ୟରେ ରିୟଲ ଇଷ୍ଟେଟ୍ ମାର୍କେଟର ସ୍ଥିତି ଭଲ ରହିଛି ଏବଂ ଏହା ସମ୍ପର୍କରେ ରାଜ୍ୟର ଲୋକମାନେ ଜାଣିଛନ୍ତି ତଥା ଏହା ସେମାନଙ୍କ ଦ୍ୱାରା ସ୍ବୀକୃତିପ୍ରାପ୍ତ।
ଇଷ୍ଟେଟ୍ ମାର୍କେଟକୁ କୋଭିଡ୍ ମହାମାରୀ କିଭଳି ପ୍ରଭାବିତ କରିଛି?
ଇଷ୍ଟେଟ୍ ମାର୍କେଟ ଉପରେ କୋଭିଡ୍ ମହାମାରୀର କୌଣସି ପ୍ରଭାବ ପଡ଼ିନାହିଁ। ପୂର୍ବଭଳି ଏହା ଠିକ୍ ଭାବରେ ଚାଲିଥିଲା। କେବଳ ଲକ୍ଡାଉନ୍ ସ୍ଥିତି ବ୍ୟବସାୟକୁ ଧିମା କରିଦେଇଥିଲା। ତେବେ ଉକ୍ତ ସମୟରେ ଏହାର ଉଚିତ ପରିଚାଳନା କରାଯାଇଥିଲା।
ରିୟଲ ଇଷ୍ଟେଟ୍ ଦର ଉପରେ କ’ଣ କହିବେ?
ବଜାରରେ ରିୟଲ ଇଷ୍ଟେଟ୍ କ୍ଷେତ୍ର ଆଗକୁ ବଢୁଛି। ଅନ୍ୟ ରାଜ୍ୟଗୁଡ଼ିକ ତୁଳନାରେ ଭୁବନେଶ୍ୱରରେ ଫ୍ଲୋର୍ ଏରିଆ ଅନୁପାତ ବା ଫ୍ଲୋର୍ ସ୍ପେଶ୍ ଇନ୍ଡେକ୍ସ ଅଧିକ ରହିଛି।
ସ୍ଥିତିରେ ଉନ୍ନତି ଆସିବାକୁ କେତେ ସମୟ ଲାଗିବ?
ସମୟ ଆସିଗଲାଣି। ଲୋକଙ୍କ ମାନସିକତାରେ ପରିବର୍ତ୍ତନ ଆସିବା ସହିତ ସେମାନେ ରିୟଲ ଇଷ୍ଟେଟ୍ ବଜାରରେ ଲମ୍ବା ସମୟ ପର୍ଯ୍ୟନ୍ତ ନିବେଶ କରିବା ପାଇଁ ଆଗ୍ରହ ପ୍ରକାଶ କରୁଛନ୍ତି। କେବଳ ଭୁବନେଶ୍ୱର ନୁହେଁ, ବରଂ ରାଜ୍ୟର ପ୍ରାୟ ସବୁ ସହରରେ ଏନେଇ ଲୋକଙ୍କର ଆଗ୍ରହ ବୃଦ୍ଧି ପାଉଥିବା ଦେଖାଯାଉଛି।
ବିଲ୍ଡକନ୍ ପ୍ରାଇଭେଟ୍ ଲିମିଟେଡ୍ର ପରିଚାଳନା ନିର୍ଦ୍ଦେଶକ ହିସାବରେ ଭବିଷ୍ୟତ ପାଇଁ ଆପଣଙ୍କର କି କି ଯୋଜନା ରହିଛି?
ଆର୍ଥିକ ବିକାଶ ଦିଗରେ ରିୟଲ୍ ଇଷ୍ଟେଟ୍ ସେକ୍ଟରର ଅନେକ ମାତ୍ରାରେ ଯୋଗଦାନ ରହିଛି। ଆର୍ଥିକ ବିକାଶରେ ଯେଉଁ ସେକ୍ଟରଗୁଡ଼ିକର ପ୍ରମୁଖ ଅବଦାନ ରହିଛି, ସେଥିମଧ୍ୟରୁ ରିୟଲ ଇଷ୍ଟେଟ୍ ତୃତୀୟ ସ୍ଥାନରେ ରହିଛି। ଏହାଛଡ଼ା ନିଯୁକ୍ତି ସୁଯୋଗ ସୃଷ୍ଟି ଦିଗରେ ମଧ୍ୟ ଏହାର ସ୍ଥାନ ଦ୍ୱିତୀୟରେ। ୨୦୨୫ ସୁଦ୍ଧା ଦେଶର ଜିଡିପିରେ ଏହାର ୧୩% ଯୋଗଦାନ ରହିବ। ଏଥିସହିତ ୨୦୨୫ ସୁଦ୍ଧା ୫,୦୦୦ ସନ୍ତୁଷ୍ଟ ଗ୍ରାହକଙ୍କ ସହ ଯୋଡ଼ିହେବାକୁ ଲକ୍ଷ୍ୟ ରଖିଛି।
କାହାର ମାର୍କେଟ୍ ବ୍ୟାପକ ରହିଛି; ଜମି ବ୍ୟବସାୟ ନା ଆପାର୍ଟମେଣ୍ଟର?
ସମୟରେ ଆପାର୍ଟମେଣ୍ଟର ଅଧିକ ଚାହିଦା ରହିଛି। ଜମି କିଣିବାଠାରୁ ଆରମ୍ଭ କରି ବିଲ୍ଡିଂ ତିଆରି କରିବା ଜଣେ ବ୍ୟକ୍ତି ପାଇଁ କଷ୍ଟକର ବ୍ୟାପାର। କିନ୍ତୁ ଏକ ଆପାର୍ଟମେଣ୍ଟ କ୍ରୟ କରିବା ସହଜ। ଆପାର୍ଟମେଣ୍ଟଗୁଡ଼ିକରେ ଆବଶ୍ୟକତା ଅନୁସାରେ ଇଣ୍ଟେରିୟର ଡିଜାଇନ୍ ମଧ୍ୟ ରହୁଛି। ତେଣୁ ଗ୍ରାହକମାନେ ଆପାର୍ଟମେଣ୍ଟ କିଣିବା ପାଇଁ ଅଧିକ ଆଗ୍ରହ ପ୍ରକାଶ କରୁଛନ୍ତି।
