ରାଜକୋଟ,୧୭।୬: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ପାଞ୍ଚ ମ୍ୟାଚ ବିଶିଷ୍ଟ ଟି -୨୦ ସିରିଜର ଚତୁର୍ଥ ମ୍ୟାଚ ରାଜକୋଟର ସୌରାଷ୍ଟ୍ର କ୍ରିକେଟ ଷ୍ଟାଡିୟମରେ ଖେଳାଯିବ। ଶୁକ୍ରବାର ଅନୁଷ୍ଠିତ ହେବାକୁ ଥିବା ଏହି ମ୍ୟାଚ ଜିତି ଟିମ ଇଣ୍ଡିଆ ସିରିଜ ସମାନ ସ୍ତର କରିବାକୁ ଚାହୁଁଛି। ପାଞ୍ଚ ମ୍ୟାଚ ବିଶିଷ୍ଟ ସିରିଜର ପ୍ରଥମ ମ୍ୟାଚରେ ଭାରତ ୭ ଉଇକେଟ ଏବଂ ଦ୍ୱିତୀୟ ମ୍ୟାଚରେ ୪ ଉଇକେଟରେ ଦକ୍ଷିଣ ଆଫ୍ରିକାଠାରୁ ପରାସ୍ତ ହୋଇଛି। ତୃତୀୟ ଟି -୨୦ରେ ଟିମ ଇଣ୍ଡିଆ ପ୍ରତ୍ୟାବର୍ତ୍ତନ କରି ୪୮ ରନ୍ରେ ଦକ୍ଷିଣ ଆଫ୍ରିକାକୁ ପରାସ୍ତ କରିଥିଲା। ଦକ୍ଷିଣ ଆଫ୍ରିକା ଏହି ସିରିଜରେ ୨-୧ରେ ଆଗୁଆ ରହିଛି।
ଭାରତ ପାଇଁ ଚତୁର୍ଥ ଟି -୨୦ ମ୍ୟାଚ ହେଉଛି ଏକ କର ବା ମର ମ୍ୟାଚ। ଏହି ମ୍ୟାଚରେ ପରାଜୟ ସହିତ ଟିମ ଇଣ୍ଡିଆ ଟି-୨୦ ସିରିଜ ହରାଇବ। ତେଣୁ ଟିମ ଇଣ୍ଡିଆ ପାଇଁ ବିଜୟ ଏକମାତ୍ର ବିକଳ୍ପ ହେବ। ଏବେ ସିରିଜ ଜିତିବା ପାଇଁ ଭାରତକୁ ଆଗାମୀ ଦୁଇଟି ମ୍ୟାଚ ଜିତିବାକୁ ପଡ଼ିବ। ଏଭଳି ପରିସ୍ଥିତିରେ ଚତୁର୍ଥ ଟି -୨୦ ବହୁତ ରୋମାଞ୍ଚକର ହେବ ବୋଲି ଆଶା କରାଯାଉଛି।
