ମୁମ୍ବାଇ: ଦେଶରେ କରୋନାର ଦ୍ୱିତୀୟ ଲହର ଦ୍ରୁତ ଗତିରେ ବ୍ୟାପିବାରେ ଲାଗିଛି। ପ୍ରତିଦିନ ଲକ୍ଷାଧିକ ସଂଖ୍ୟାରେ କରୋନା ପଜିଟିଭ୍ ଚିହ୍ନଟ ହେଉଥିବା ବେଳେ ଏହା କବଳରୁ ଫିଲ୍ମ ଇଣ୍ଡଷ୍ଟ୍ରି ମଧ୍ୟ ବର୍ତ୍ତି ପାରିନାହିଁ। କରୋନା କାଳରେ ଗରିବ ଲୋକଙ୍କ ପାଇଁ ଭଗବାନ ସାଜିଥିବା ବଲିଉଡ୍ ଅଭିନେତା ସୋନୁ ସୁଦ୍ ଏବେ କରୋନା କବଳରେ। ଶନିବାର ସୋନୁଙ୍କ କରୋନା ରିପୋର୍ଟ ପଜିଟିଭ୍ ଆସିବା ପରେ ସମସ୍ତ ସତର୍କତା ଅବଲମ୍ବନ କରି ସେ ନିଜକୁ ହୋମ୍ କ୍ୱାରାଣ୍ଟାଇନ୍ କରିନେଇଛନ୍ତି। ଏନେଇ ସେ ନିଜେ ଟୁଇଟ କରି ପ୍ରଶଂସକଙ୍କୁ ଜଣାଇଛନ୍ତି। ଏଥିସହ ସେ ନିଜ ପ୍ରଶଂସକଙ୍କୁ ଚିନ୍ତା ନ କରିବାକୁ କହିଛନ୍ତି। ଖୁବ୍ଶୀଘ୍ର ସେ ଭଲ ହୋଇ ଲୋକଙ୍କ ସାହାଯ୍ୟ ପୁଣି ଆଗକୁ ଆସିବେ ବୋଲି ସୋନୁ ଟୁଇଟ କରି କହିଛନ୍ତି। ସୂଚନାଯୋଗ୍ୟ, ଗତବର୍ଷ କରୋନା ସମୟରେ ପ୍ରବାସୀଙ୍କୁ ନିଜ ଘରକୁ ପହଞ୍ଚାଇବାକୁ ହେଉ କିମ୍ବା ସେମାନଙ୍କୁ ରୋଜଗାରକ୍ଷମ କରିବାକୁ ସୋନୁ ଆଗକୁ ଆସିଥିଲେ। ସେହି ସମୟରେ ତାଙ୍କର ଏଭଳି କାର୍ଯ୍ୟକୁ ସବୁ ମହଲରେ ବେଶ୍ ପ୍ରଶଂସା କରାଯାଇଥିଲା।
