ନୂଆଦିଲ୍ଲୀ,୨୦।୭: ଦିଲ୍ଲୀର ସରକାରୀ ହସ୍ପିଟାଲ ସଫଦରଜଙ୍ଗରେ ଭର୍ତ୍ତି ହୋଇଥିବା ବିଶିଷ୍ଟ ସାମାଜିକ କର୍ମୀ ସୋନମ ୱାଙ୍ଗଚୁକ ହସ୍ପିଟାଲ ପ୍ରଶାସନକୁ ଏକ ଚିଠି ଲେଖିଛନ୍ତି। ଏଥିରେ ସେ ନିଜକୁ ଡିସଚାର୍ଜ କରିବା ପାଇଁ ଦାବି କରିଛନ୍ତି, କାରଣ ତାଙ୍କୁ ‘କକରୋଚ ଜନତା ପାର୍ଟି’ (CJP)ର ସଂସଦ ମାର୍ଚ୍ଚରେ ସାମିଲ ହେବାର ଅଛି। ସୋନମ ୱାଙ୍ଗଚୁକ ସଫଦରଜଙ୍ଗ ହସ୍ପିଟାଲକୁ ଲେଖିଥିବା ପତ୍ରରେ ଉଲ୍ଲେଖ କରିଛନ୍ତି ଯେ, “ମୁଁ ଆଜି ବହୁତ ଭଲ ଅନୁଭବ କରୁଛି। ମୋର ସ୍ବାସ୍ଥ୍ୟ ପାରାମିଟରଗୁଡ଼ିକ ସାଧାରଣ ରହିଛି। ତେଣୁ ଅନୁରୋଧ କରୁଛି ଯେ, ଦୟାକରି ମତେ ହସ୍ପିଟାଲରୁ ଯିବାକୁ ଅନୁମତି ଦିଅନ୍ତୁ, ଯାହାଫଳରେ ମୁଁ ସଂସଦ ମାର୍ଚ୍ଚରେ ଯୋଗ ଦେଇପାରିବି।”
ସୋନମ ୱାଙ୍ଗଚୁକ ହସ୍ପିଟାଲକୁ ଲେଖିଥିବା ଚିଠିକୁ ନିଜର ଅଫିସିଆଲ ’X’ ଆକାଉଣ୍ଟରେ ଶେୟାର କରିଛନ୍ତି। ସେ ପୋଷ୍ଟର କ୍ୟାପଶନରେ ଲେଖିଛନ୍ତି, “ପ୍ରିୟ ସାଥୀମାନେ, ସୋନମ ୱାଙ୍ଗଚୁକ ଆପଣ ସମସ୍ତଙ୍କୁ ଭେଟିବା ପାଇଁ ବେଶ ଆତୁର ଏବଂ ଏଥିପାଇଁ ସମ୍ଭବ ସବୁ ପ୍ରକାର ଚେଷ୍ଟା କରୁଛନ୍ତି। ଆଜି ହସ୍ପିଟାଲକୁ ଚିଠି ଲେଖି ହସ୍ତାନ୍ତର କରିଦେଇଛି। ମୋ ସ୍ବାସ୍ଥ୍ୟ ଏବେ ଭଲ ଅଛି ଏବଂ ହସ୍ପିଟାଲ ଦାବି କରୁଛି ଯେ ମୁଁ କୌଣସି ପ୍ରକାର ଅଟକରେ ନାହିଁ, କିନ୍ତୁ ମୁଁ ବୁଝିପାରୁ ନାହିଁ ଯେ ତେବେ ମୋ ଉପରେ ଏତେ କଟକଣା କାହିଁକି ଲଗାଯାଇଛି? କାହିଁକି ମତେ ଡିସଚାର୍ଜ କରାଯାଉ ନାହିଁ?”
ସୋନମ ୱାଙ୍ଗଚୁକଙ୍କ ଚିକିତ୍ସା VAMC ଏବଂ ସଫଦରଜଙ୍ଗ ହସ୍ପିଟାଲରେ ଜାରି ରହିଛି, ତାଙ୍କର ହୃଦସ୍ପନ୍ଦନ ଓ ଅନ୍ୟାନ୍ୟ ପାରାମିଟରଗୁଡ଼ିକ ସ୍ଥିର ରହିଛି। କିନ୍ତୁ ରକ୍ତ ପରୀକ୍ଷା ରିପୋର୍ଟକୁ ଦୃଷ୍ଟିରେ ରଖି ତାଙ୍କୁ ତତ୍ତ୍ୱାବଧାନରେ ରଖିବାର ଆବଶ୍ୟକତା ରହିଛି। ଡାକ୍ତରମାନଙ୍କର ଏକ ମଲ୍ଟି-ଡିସିପ୍ଲିନାରୀ ଟିମ ତାଙ୍କ ସ୍ଥିତି ଉପରେ କ୍ରମାଗତ ନଜର ରଖିଛନ୍ତି। ଯେକୌଣସି ପ୍ରକାରର ଜରୁରୀକାଳୀନ ପରିସ୍ଥିତିରେ ତୁରନ୍ତ ଚିକିତ୍ସା ଯୋଗାଇ ଦେବା ପାଇଁ ବିନା କୌଣସି ବାଧାରେ କ୍ଲିନିକାଲ ମନିଟରିଂର ଆବଶ୍ୟକତା ରହିଛି। ତାଙ୍କୁ ଆବଶ୍ୟକୀୟ ଚିକିତ୍ସା ସୁବିଧା ଯୋଗାଇ ଦିଆଯାଉଛି ଏବଂ ଶରୀର ସ୍ବାଭାବିକ ଅବସ୍ଥାକୁ ଫେରିବା ପାଇଁ ଅପେକ୍ଷା କରାଯାଉଛି।
