ନୂଆଦିଲ୍ଲୀ,୨୨।୧୦: ଲଦାଖର ଭବିଷ୍ୟତ ଏବଂ ଗଣତାନ୍ତ୍ରିକ ବ୍ୟବସ୍ଥାକୁ ନେଇ ନିକଟରେ କେନ୍ଦ୍ର ସରକାର ଓ ଲଦାଖ ପ୍ରତିନିଧିମାନଙ୍କ ମଧ୍ୟରେ ଅନୁଷ୍ଠିତ ବୈଠକକୁ ନେଇ ସୋନମ ୱାଙ୍ଗଚୁକଙ୍କ ବୟାନ ସାମ୍ନାକୁ ଆସିଛି। ସେ କହିଛନ୍ତି ଯେ ଅକ୍ଟୋବର ୧୫ରେ ଲେହରେ ଗୃହ ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ ଲେହ ଆପେକ୍ସ ବଡି (LAB) ତଥା କାର୍ଗିଲ ଡେମୋକ୍ରାଟିକ ଆଲାଏନ୍ସ (KDA)ର ସବ-କମିଟି ମଧ୍ୟରେ ହୋଇଥିବା ଆଲୋଚନା ସମ୍ପୂର୍ଣ୍ଣ ରୂପେ ବିଫଳ ହୋଇଛି। ସେ ଜଣାଇଛନ୍ତି ଯେ ଆମକୁ ଆଜି ଦିଲ୍ଲୀ ଡକାଯାଇଥିଲା।
ସୋନମ ୱାଙ୍ଗଚୁକ ଏକ୍ସ (X)ରେ ପୋଷ୍ଟ କରି ଜଣାଇଛନ୍ତି ଯେ ଗୃହ ମନ୍ତ୍ରଣାଳୟ ସହ ଗୁରୁବାର (୨୨ ଅକ୍ଟୋବର) ଦିନ ବୈଠକ ହେବାର ଥିଲା। ସେ କହିଛନ୍ତି ଯେ ୧୫ ଅକ୍ଟୋବରରେ ଲେହରେ ହୋଇଥିବା ଆଲୋଚନା ସମ୍ପୂର୍ଣ୍ଣ ରୂପେ ବିଫଳ ହୋଇଥିଲା, କାରଣ ସେଥିରୁ କୌଣସି ଫଳାଫଳ ବାହାରି ନଥିଲା। ସେ କହିଛନ୍ତି ଯେ କେନ୍ଦ୍ରର ମୋଦୀ ସରକାର ନିଜ ପ୍ରତିଶ୍ରୁତିରୁ ଓହରି ଯାଇଛନ୍ତି। ତାଙ୍କ ତରଫରୁ କୁହାଯାଇଥିଲା ଯେ ଅକ୍ଟୋବର ୨୨ରେ ଆଲୋଚନା କରିବେ।
ସୋନମ ୱାଙ୍ଗଚୁକ କହିଛନ୍ତି ଯେ ଆମକୁ କୁହାଯାଇଥିଲା ଅକ୍ଟୋବର ୨୨ରେ ଦିଲ୍ଲୀରେ ଆଲୋଚନା କରାଯିବ, ତେଣୁ ମୁଁ ଆଜି ଦିଲ୍ଲୀ ଆସିଛି। ସେ ଆହୁରି କହିଛନ୍ତି ଯେ ବୋଧହୁଏ ଆଜି ମଧ୍ୟ ସରକାର ଏହି ଆଲୋଚନା କରୁନାହାନ୍ତି। ଏହିଭଳି ଭାବରେ ସେମାନେ ପୁଣି ଥରେ ନିଜ ପ୍ରତିଶ୍ରୁତିରୁ ଓହରି ଯାଉଛନ୍ତି। ସେ କହିଛନ୍ତି ଯେ ଏବେ ଯାହା ବି ହେଉ, ମୁଁ ତ ଦିଲ୍ଲୀ ପହଞ୍ଚୁଛି ଏବଂ ଦିଲ୍ଲୀ ଆସି ଲଦାଖ ଭବନରେ ସାମ୍ୱାଦିକମାନଙ୍କ ସହ କଥା ହେବି।
ସେ କହିଛନ୍ତି ଯେ ଆମେ ଆଶା କରୁଛୁ ସରକାର ଆମ ସହ ଆଲୋଚନା କରିବେ, କିନ୍ତୁ ମୋତେ ବହୁତ ଦୁଃଖର ସହ କହିବାକୁ ପଡ଼ୁଛି ଯେ ସରକାର କ୍ରମାଗତ ଭାବେ ନିଜ ପ୍ରତିଶ୍ରୁତିରୁ ଓହରି ଯାଉଛନ୍ତି, ତେଣୁ ସୀମାନ୍ତ ଅଞ୍ଚଳର ଲୋକମାନେ ଏସବୁ କାରଣରୁ ବହୁତ ଦୁଃଖିତ ଅଛନ୍ତି।
ୱାଙ୍ଗଚୁକ ଆହୁରି କହିଛନ୍ତି ଯେ ଆମ ଉପରେ ଚୀନ ପକ୍ଷରୁ ଚାପ ଆସୁଛି; ସେମାନେ କହୁଛନ୍ତି ଯେ ଭାରତ ସରକାର ତ ଲଦାଖକୁ ସୱୀକୃତି ମଧ୍ୟ ଦେଉନାହାନ୍ତି ଏବଂ ଲଦାଖ ଚୀନର ଏକ ଅଂଶ। ସେ କହିଛନ୍ତି ଯେ ଭାରତ, ଯାହାକୁ ଆମେ ବହୁତ ଭଲ ପାଉ, ସିଏ ମଧ୍ୟ ନିଜର ପ୍ରତ୍ୟେକଟି ପ୍ରତିଶ୍ରୁତିରୁ ପଛଘୁଞ୍ଚା ଦେଉଛି। ଲଦାଖବାସୀଙ୍କୁ ଦେଶର ବାକି ନାଗରିକଙ୍କ ସହ ସମାନ ମର୍ଯ୍ୟାଦା ମଧ୍ୟ ଦିଆଯାଉ ନାହିଁ। ଆମକୁ ଗଣତନ୍ତ୍ରର ଅଧିକାରଯେପରିକି ଭୋଟ ଦେବା ଏବଂ ସରକାର ବାଛିବା ଭଳି ମୌଳିକ ଅଧିକାରରୁ ମଧ୍ୟ ବଞ୍ଚିତ କରାଯାଉଛି।
