ବ୍ରହ୍ମପୁର ଅଫିସ,୨୭ା୫: ପାରିବାରିକ କଳହରୁ ବାପାଙ୍କୁ ଆକ୍ରମଣ କରିଥିବା ଅଭିଯୋଗରେ ପୋଲିସ ଅଭିଯୁକ୍ତ ପୁଅ ତାଙ୍କର ଜଣେ ସହଯୋଗୀଙ୍କୁ ଗିରଫ କରିଛି। ସେମାନେ ହେଲେ ମୋଚି ସାହିର ଏ. ଭେଙ୍କଟରମଣଙ୍କ ପୁଅ ଏ. ସୁରଜ ଓ ତାଙ୍କ ସହଯୋଗୀ ଖାଲାସୀ ସାହିର ଜି.ଶ୍ୟାମ। ପୋଲିସ ଘଟଣାରେ ବ୍ୟବହୃତ ଖଣ୍ଡା ଜବତ କରିଛି। ପୋଲିସ ଏକ ମାମଲା (ନଂ.୧୩୨/୨୨) ରୁଜୁ କରି ଶୁକ୍ରବାର ଅଭିଯୁକ୍ତଦ୍ୱୟଙ୍କୁ କୋର୍ଟ ଚାଲାଣ କରିଛି।
ପ୍ରକାଶ ଯେ, ସୁରଜ ଘର ଲୋକଙ୍କ ଅନିଚ୍ଛା ସତ୍ତ୍ୱେ କିଛିଦିନ ତଳେ ଅନ୍ୟ ଜାତିର ଜଣେ ଝିଅକୁ ବିବାହ କରିଥିଲେ। ତେଣୁ ପୁଅ ବୋହୂଙ୍କୁ ବାପା ଭେଙ୍କଟରମଣ ଘରେ ରହିବାକୁ ଅନୁମତି ଦେଇ ନ ଥିଲେ। ଏହାକୁ କେନ୍ଦ୍ର କରି ବାପା, ପୁଅଙ୍କ ମଧ୍ୟରେ ଝଗଡା ହୋଇଥିଲା। ଗୁରୁବାର ରାତି ପ୍ରାୟ ସାଢେ ୧୦ଟାରେ ସୁରଜ ଓ ତାଙ୍କ ସହଯୋଗୀ ଶ୍ୟାମଙ୍କୁ ଧରି ମୋଚି ସାହକୁ ଆସିଥିଲେ। ସୁରଜ ଏକ ଖଣ୍ଡାରେ ତାଙ୍କ ବାପାଙ୍କୁ ହାଣିବା ପାଇଁ ଉଦ୍ୟମ କରିଥିଲେ। ସୁରଜଙ୍କ ଅନ୍ୟ ଜଣେ ଭାଇ ଏ .ରସିବତ ଏହାର ପ୍ରତିବାଦ କରିଥିଲେ। ଏଥିରେ ଭେଙ୍କଟରମଣ ଓ ରସିବତ ଆହତ ହୋଇଥିଲେ। ଏ ନେଇ ଥାନାରେ ଅଭିଯୋଗ ହୋଇଥିଲା।
