ଟେନସା,୨୧ା୧୨(ଡି.ଏନ.ଏ.): ସୁନ୍ଦରଗଡ଼ ଜିଲା କୋଇଡା ଥାନା ଅନ୍ତର୍ଗତ ଶଗଡ଼ଭଙ୍ଗା ଜଙ୍ଗଲରୁ ଗତ ୧୨ ତାରିଖ ଦିନ ଜଣେ ଅଚିହ୍ନା ମହିଳାଙ୍କ ମୃତଦେହ ରକ୍ତ ଜୁଡୁବୁଡୁ ଅବସ୍ଥାରେ ପୋଲିସ ଜବତ କରିଥିଲା। ମଙ୍ଗଳବାର ଦିନ ଏହି ହତ୍ୟା ଘଟଣାର ପର୍ଦ୍ଦାଫାଶ କରିଛି କୋଇଡା ପୋଲିସ। ନିହତ ମହିଳା ହେଲେ ସୁନ୍ଦରଗଡ ଜିଲା ସୀମାନ୍ତ କେନ୍ଦୁଝର ଜିଲା ରୁଗୁଡିହି ଥାନା ଅନ୍ତର୍ଗତ ପାରମସାହି ନୂଆଗାଁ ଗୁଆଲି ଅଞ୍ଚଳର ମାଙ୍ଗିରି ମୁଣ୍ଡା (୪୧)। ବଣାଇଁ ଉପଖଣ୍ଡ ପୋଲିସ ଅଧିକାରୀ ସ୍ବରାଜ ଦେବତା ଓ କୋଇଡା ଥାନା ଅଧିକାରୀ ଲୋକେଶ୍ୱର ସାହୁ ଏକ ଖବରଦାତା ସମ୍ମିଳନୀ କରି ଏହି ସୂଚନା ଦେଇଛନ୍ତି ା ଜମିବାଡି ଲୋଭରେ ପୁତୁରା ସୁବାସ ମୁଣ୍ଡା(୩୦) ନିଜ ସାଥୀଙ୍କ ସହ ମିଶି ମହିଳାଙ୍କୁ ପଥରରେ ଛେଚି ହତ୍ୟା କରିଥିବା ତଦନ୍ତରୁ ଜଣାପଡିଛି। ଏହି ଘଟଣାରେ ଦୁଇ ଅଭିଯୁକ୍ତଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ା
ପ୍ରକାଶ ଯେ, ମାଙ୍ଗିରି ସ୍ବାମୀ ମରିବା ପରଠାରୁ ଘରେ ଏକୁଟିଆ ରହି ଆସୁଥିଲେ। ରବିବାର ଗାଁରେ ପୂଜା ଥିବାରୁ ସାମଗ୍ରୀ କିଣିବାକୁ ଶନିବାର ସାପ୍ତାହିକ ହାଟ କୋଇଡାକୁ ଯାଇଥିଲେ। କିନ୍ତୁ ସେ ଘରକୁ ଫେରି ନ ଥିଲେ ା ପରେ ଜଙ୍ଗଲରୁ ତାଙ୍କ ମୃତଦେହ ଓ ରକ୍ତ ଲଗା ପଥର ଜବତ କରି ମହିଳାଙ୍କ ପରିଚୟ ଜାଣିବା ପାଇଁ ତଦନ୍ତ ଜାରି ରଖିଥିଲା। ଏପରି କି ସନ୍ଧାନୀ କୁକୁର ସାହାଯ୍ୟ ନିଆଯାଇଥିଲେ ହେଁ କୌଣସି ସୁୁଫଳ ମିଳି ନ ଥିଲା । କୋଇଡା ଥାନା କିମ୍ବା ନିକଟସ୍ଥ ଥାନାରେ ମହିଳା ନିରୁର୍ଦ୍ଦିଷ୍ଟ ନେଇ କେହି ଏତଲା ମଧ୍ୟ ଦେଇ ନ ଥିଲେ ା ଶେଷରେ ଜଙ୍ଗଲ ନିକଟବର୍ତ୍ତୀ ରାସ୍ତା ପାର୍ଶ୍ୱରେ ଲାଗିଥିବା ସିସି ଟଭି ଫୁଟେଜରୁ ପୋଲିସ ଜଣେ ମହିଳା ଯିବାର ଦେଖିବାକୁ ପାଇଥିଲେ। ଏହାକୁ ଆଧାର କରି ଶେଷରେ ମୃତା ମହିଳାଙ୍କ ପରିଚୟ ଖୋଜି ବାହାର କରିଥିଲା କୋଇଡା ପୋଲିସ।
ସନ୍ଦେହରେ ପଚରାଉଚରା କରୁ କରୁ ପୋଲିସ ମହିଳାଙ୍କ ନିଜ ପୁତୁରା ସୁବାସଙ୍କୁ ନଜର ରଖିଥିଲା। ପରେ ତାଙ୍କୁ ଅଟକ ରଖି ପଚରାଉଚରା କରିଥିଲା। ତଦନ୍ତରୁ ଜଣାପଡିଛି ଯେ, ନିଜ ଖୁଡୀଙ୍କ ଦୁଇ ଏକର ଜମି ହାତେଇବା ଲୋଭରେ ପୁତୁରା ସୁବାସ ଓ ତାଙ୍କ ସାଥୀ ସେହି ଗ୍ରାମର ବଳରାମ ମୁଣ୍ଡା(୨୧) ମାଙ୍ଗିରିଙ୍କ ପଛେ ପଛେ ଯାଇଥିଲେ। ଫେରିବା ବାଟରେ ଏକୁଟିଆ ପାଇ ପଥର ସାହାଯ୍ୟରେ ହତ୍ୟା କରି ଫେରାର ମାରିଥିଲେ। ଏହି ଘଟଣାରେ ପୋଲିସ ଦୁଇ ଅଭିଯୁକ୍ତଙ୍କୁ ଗିରଫ କରିବା ସହ ଘଟଣାରେ ବ୍ୟବହୃତ ବାଇକ୍ (ଓଡି୦୯୯୨୧୪ )ଜବତ କରିଛି। ଧାରା ୩୦୨ରେ ହତ୍ୟା ମାମଲା ନଂ ୧୧୪/୨୦୨୨ ରୁଜୁ କରି ଅଭିଯୁକ୍ତଙ୍କୁ ବଣାଇ କୋର୍ଟ ଚାଲାଣ କରାଯାଇଛି।
