ବଲାଙ୍ଗୀର ଅଫିସ,୧୭ା୮: ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲ ଭିତରେ ମଙ୍ଗଳବାର ସକାଳୁ ଏକ ହତ୍ୟାକାଣ୍ଡ ଘଟିଛି। ମା’ ସମ୍ମୁଖରେ ଜଣେ ଯୁବକଙ୍କୁ ଖଣ୍ଡାରେ ହାଣି ୨ ଦୁର୍ବୃତ୍ତ ହତ୍ୟା କରି ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ମୃତକ ହେଲେ ସୁଦପଡା ନିବାସୀ ଅଜୟ ଦୋରା ଓରଫ୍ ଅଜୁ (୨୫)।
ହସ୍ପିଟାଲ କ୍ୟାମ୍ପସ ଚକ୍ଷୁ ଓପିଡି ସେଣ୍ଟର ସମ୍ମୁଖରେ ମୃତ ଅଜୁଙ୍କ ପିତା ରାଧେକୃଷ୍ଣ ଦୋରା ଗତ ୫ ବର୍ଷରୁ ଊର୍ଦ୍ଧ୍ୱ ହେବ ଠେଲାରେ ଇଡଲି ବିକ୍ରି କରିଥାନ୍ତି। ପ୍ରତିଦିନ ସକାଳୁ ଏହି ସ୍ଥାନକୁ ଅଜୁଙ୍କ ପିତା, ମାତା ଜୟନ୍ତୀ ଓ ବଡଭାଇ ରାଜୁ ଆସି ଇଡଲି ବିକ୍ରି କରିଥାନ୍ତି। ମଙ୍ଗଳବାର ଭୋର ୫ଟା୧୫ରେ ଅଜୁ ଏକ ସ୍କୁଟିରେ ତାଙ୍କ ମା ଜୟନ୍ତୀଙ୍କୁ ବସାଇ ନିକଟସ୍ଥ ସୁଦପଡାରୁ ହସ୍ପିଟାଲ ଅଭିମୁଖେ ଆସୁଥିଲେ। ନୂଆକରି ତିଆରି ହୋଇଥିବା ଅକ୍ସିଜେନ୍ ସେଣ୍ଟର ରାସ୍ତାରୁ ପୁରୁଣା ଡାଇରିଆ ୱାର୍ଡ ତଥା ସିକ୍ୟୁରିଟି ଅଫିସ ସମ୍ମୁଖ ଦେଇ ସେ ହସ୍ପିଟାଲରେ ପଶିଥିଲେ। ଏତିକିବେଳେ ସିକ୍ୟୁରିଟି ଅଫିସ ସମ୍ମୁଖ ବୁଲାଣିରେ ଛପି ରହିଥିବା ମୁଖାପିନ୍ଧା ଦୁଇ ଦୁର୍ବୃତ୍ତ ଅଜୁଙ୍କୁ ଏକ ଖଣ୍ଡାରେ ଚୋଟ ମାରିଥିଲେ। ଏଥିରେ ସ୍କୁଟିରୁ ଅଜୁ ଓ ତାଙ୍କ ମା’ ଛିଟିକି ପଡିଥିଲେ। ରକ୍ତ ଜୁଡୁବୁଡୁ ଅବସ୍ଥାରେ ତଳେ ପଡି ଅଜୁ ଛଟପଟ ହେଉଥିବାବେଳେ ଦୁର୍ବୃତ୍ତମାନେ ତାଙ୍କ ମୁଣ୍ଡକୁ ଆଉ ଏକ ଚୋଟ ମାରିଥିଲେ। ଜୟନ୍ତୀ ପୁଅକୁ ବଞ୍ଚାଇବାକୁ ଯିବାବେଳେ ସେ ମଧ୍ୟ ଆକ୍ରମଣର ଶିକାର ହୋଇଥିଲେ। ସେଠାରେ ଥିବା କେତେକ ଲୋକ ମା, ପୁଅଙ୍କୁ କାଜୁଆଲଟି ଓ୍ବାର୍ଡକୁ ନେଇଥିଲେ। ହେଲେ ସେଠାରେ ଡାକ୍ତର ଅଜୁଙ୍କୁ ମୃତ ଘୋଷିତ କରିଥିଲେ। ଜୟନ୍ତୀ ଏବେ ହସ୍ପିଟାଲରେ ଚିକିତ୍ସିତ ହେଉଛନ୍ତି। ହତ୍ୟାକାଣ୍ଡର କାରଣ ସ୍ପଷ୍ଟ ହୋଇ ନ ଥିଲେ ମଧ୍ୟ ଇଡଲି ଠେଲା ଲଗାଇବାକୁ ନେଇ ବଚସା କାରଣରୁ ହୋଇଥିବା କୁହାଯାଉଛି। ତେବେ ଏହି ହତ୍ୟାକାଣ୍ଡ ପଛରେ କଫ୍ ସିରପ ବ୍ୟବସାୟ ଏବଂ ପୂର୍ବଶତ୍ରୁତା ରହିଥିବା ଅନୁମାନ କରି ପୋଲିସ ତଦନ୍ତ ଆରମ୍ଭ କରିଛି। ଟାଉନ୍ ଥାନାରେ ଏ ନେଇ ଏକ ମାମଲା (୪୧୨/୨୨) ରୁଜୁ କରାଯାଇଛି। ହସ୍ପିଟାଲ କ୍ୟାମ୍ପସରେ ଏଭଳି ଏକ ହତ୍ୟାକାଣ୍ଡ ପରେ ହସ୍ପିଟାଲ ଷ୍ଟାଫ୍, ରୋଗୀ, ରୋଗୀ ପରିଜନ ଓ ସହରବାସୀ ଭୟଭୀତ ହୋଇପଡିଛନ୍ତି। ଘଟଣା ସମ୍ପର୍କରେ ଅନୁସନ୍ଧାନ ଆରମ୍ଭ ହୋଇଥିବା ସଦର ଏସଡିପିଓ ତୋଫାନ ବାଗ କହିଛନ୍ତି।
