ଭବାନୀପାଟଣା,୯।୧୦(ଡି.ଏନ୍.ଏ.): ଦାରିଦ୍ରର କରୁଣ ପରିଣତି ଦେଖିବାକୁ ମିଳିଛି କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ଦୁର୍ଗମ କେଳୁଆ ଗାଁରେ। ବାପା କଲେଜରେ ନାମଲେଖାଇବାକୁ ଟଙ୍କା ନ ଦେବାରୁ ବିଷ ପିଇ ଆତ୍ମହତ୍ୟା କରିଛନ୍ତି ପୁଅ ସଞ୍ଜୟ। ସଞ୍ଜୟ ଚଳିତ ବର୍ଷ ମାଟ୍ରିକ ପରୀକ୍ଷାରେ କୃତକାର୍ଯ୍ୟ ହୋଇଥିଲେ। ଆଶା ରଖିଥିଲେ କଲେଜରେ ପଢିବେ। କଲେଜରେ ନାମ ଲେଖାଇବାକୁ ବାପାଙ୍କୁ କହିଲେ। ଦାରିଦ୍ର ସହ ଜୁଝୁଥିବା ଗରିବ ବାପା ପଢେଇବାକୁ ଅସମର୍ଥ ହୋଇଥିଲେ। ବାଧକ ସାଜିଥିଲା ଟଙ୍କା। ପାଠପଢି ନପାରିବାର ଦୁଃଖ ନିରାଶ କରିଥିଲା ସଞ୍ଜୟକୁ। ଶେଷରେ ମୃତ୍ୟୁକୁ ଆପଣାଇ ଥିଲେ ସଞ୍ଜୟ, କୀଟନାଶକ ପିଇ ଆତ୍ମହତ୍ୟା ଉଦ୍ୟମ କରିଥିଲେ। ଗୁରୁତର ଅବସ୍ଥାରେ ପରିବାର ଲୋକେ ତାଙ୍କୁ ଭବାନୀପାଟଣା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଗୁରୁବାର ଚିକିତ୍ସାଧୀନ ଅବସ୍ଥାରେ ସଞ୍ଜୟଙ୍କର ମୃତ୍ୟୁ ଘଟିଥିଲା।
