କେନ୍ଦୁଝର,୪ା୨(ନରେଶ ଚନ୍ଦ୍ର ପଟ୍ଟନାୟକ): ୨୪ ବର୍ଷ ଧରି ଦେଶସେବା କରି ଅବସର ପରେ ଗାଁକୁ ଫେରିଲେ ଯବାନ। ଏଥିପାଇଁ ଗ୍ରାମବାସୀଙ୍କ ମିଳିତ ସହଯୋଗରେ ଭବ୍ୟ ସମ୍ବର୍ଦ୍ଧନା ଦିଆଯାଇଛି। କେନ୍ଦୁଝର ସଦର ବ୍ଲକ ଅନ୍ତର୍ଗତ ଜନାର୍ଦ୍ଧନପୁର ପଞ୍ଚାୟତ ଗୋପୀନାଥପୁର ନୂଆଗାଁ ଗାଁର ଜିତେନ୍ଦ୍ର ଦେହୁରୀ(୪୪)ଇଣ୍ତିଆନ ଆର୍ମି ହାବିଲଦାର ଭାବେ ୨୦୦୨ ଜାନୁଆରୀ ୨୨ରେ ଜମ୍ମୁ-କଶ୍ମୀର ୟୁରି ସେକ୍ଟରରେ ଯୋଗଦାନ କରିଥିଲେ। ଇତିମଧ୍ୟରେ ଡେରାଡୁନ, ଆସାମ, ଲାଗାଲାଣ୍ତ, ସିକିମ ପରେ ଜମ୍ମୁ-କଶ୍ମୀର ୟୁରି ସେକ୍ଟରରେ ଚାକିରି କରି ଚଳିତ ୨୦୨୬ ୩୧ ଜାନୁଆରୀରେ ଜିତେନ୍ଦ୍ର ଅବସର ନେଇଛନ୍ତି। ୨୪ବର୍ଷ ଦେଶସେବା କରି ସେ ଘରକୁ ଫେରିବା ଖବର ପାଇ ଗ୍ରାମବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା। ଗ୍ରାମବାସୀ ଏବଂ ମା’ ତାରିଣୀ ସ୍ବୟଂ ସହାୟକ ଗୋଷ୍ଠୀ ମହିଳାଙ୍କ ମିଳିତ ଉଦ୍ୟମରେ ଏକ ସୁସଜ୍ଜିତ ସ୍ବତନ୍ତ୍ର ଗାଡ଼ି ଯୋଗେ ୨୦ନମ୍ବର ଜାତୀୟ ରାଜପଥ ନୂଆ ସଡ଼କଠାରୁ ବାଜାବାଣ ନାଚଗୀତରେ ତାଙ୍କୁ ସସ୍ତ୍ରୀକ ଘରକୁ ପାଛଟି ଅଣାଯାଇଥିଲା। ଏଥିରେ ରାଧାକାନ୍ତ ନାଏକ, ନୁଥୁନ ପାତ୍ର, ଗୋପୀନାଥପୁର ସରପଞ୍ଚ ସରୋଜ ଦେହୁରୀ, ରାଇସୁଆଁ ସରପଞ୍ଚ ଅନନ୍ତ ଦେହୁରୀ, ଜନାର୍ଦ୍ଧନପୁର ସରପଞ୍ଚ ଜତିନ୍ଦ୍ର ଦେହୁରୀ ପ୍ରମୁଖ ଉପସ୍ଥିତ ଥିଲେ।
