ବାରିପଦା ଅଫିସ,୧ା୧୨-ବାସନା ଧାନରେ ମହକୁଛି ଗାଁ ଦାଣ୍ଡ। ସୁଗନ୍ଧରେ ଫାଟି ପଡ଼ୁଛି ପରିବେଶ। ଯାହାଙ୍କ ପାଇଁ ଏହା ସମ୍ଭବ ହୋଇଛି ସେ ଜଣେ ମହିଳା ଚାଷୀ। ନିଜେ ସ୍ବାବଲମ୍ବୀ ହେବା ସହିତ ଅଞ୍ଚଳବାସୀଙ୍କୁ ଚାଷର ପ୍ରଣାଳୀ ଜଣାଇ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଏଭଳି ସଫଳତା ହାସଲ କରିଥିବା ମହିଳା ଚାଷୀ ହେଲେ ମୟୂରଭଞ୍ଜ ଜିଲା ଶାମାଖୁଣ୍ଟା ବ୍ଲକ ବାଲିଡ଼ିହା ପଞ୍ଚାୟତ ଅଧୀନ କିଶାନହାଡ଼ି ଗ୍ରାମର ମାଲକ୍ମଣି ସିଂ। ଜୈବିକ ସାର ଏବଂ ଔଷଧ ପ୍ରୟୋଗ କରି ବର୍ଷକୁ ସେ ୪୦ କୁଇଣ୍ଟାଲ ବାସନା ଧାନ ଅମଳ ସହ ୫୦ହଜାର ଟଙ୍କା ରୋଜଗାର କରିପାରୁଛନ୍ତି।
ଚାଷ ପ୍ରତି ତାଙ୍କର ପିଲାବେଳୁ ଆଗ୍ରହ ଥିଲା ା ଏକ ଚାଷୀ ପରିବାରରେ ସେ ବିବାହ କରିଥିଲେ। ସ୍ବାମୀଙ୍କ ୭/୮ ଏକ ଜମିରେ ଧାନ ଓ ରବି ଋତୁରେ ମୁଗ ତଥା ପନିପରିବା ଚାଷ ହେଉଥିଲା। ଜଳସେଚନର ସେମିତି ଉପଯୁକ୍ତ ସୁବିଧା ନ ଥିବାରୁ ଧାନ ପରେ ମୁଗ ଚାଷ କରୁଥିଲେ। ତେବେ କୃଷି ବିଭାଗୀୟ ଅଧିକାରୀଙ୍କ ପରାମର୍ଶ ନେଇ ଜୈବିକ ଉପାୟରେ ଚାଷ ପାଇଁ ମାଲକ୍ମଣି ମନ ବଳାଇଥିଲେ। ଚାଷରେ ଭଲ ଅମଳ ପାଇଁ ସେ ଜୈବିକ ସାର ବ୍ୟବହାର କରୁଥିବା ବେଳେ ରୋଗ ପୋକ ପାଇଁ ଜୈବ ଔଷଧ ପ୍ରୟୋଗ କରିଥିଲେ।
ସହକାରୀ କୃଷି ଅଧିକାରୀ ସୁଧାଂଶୁ ପଣ୍ଡା ମୁଗ ଚାଷ ପାଇଁ ସରକାରୀ ସୁବିଧା ସୁଯୋଗ ହିସାବରେ ତାଙ୍କୁ ବିହନ, ଜୈବିକ ସାର ଓ ଔଷଧ ଯୋଗାଇ ଦେଇଥିଲେ। ବିନା ତାଲିମରେ ଆଶାତୀତ ଫସଲ ମଧ୍ୟ ଅମଳ ହୋଇଥିଲା। ମୁଗରେ ସାର ପ୍ରୟୋଗ କରୁ ନ ଥିବା ବେଳେ ଧାନ ଚାଷରେ ସାର ପ୍ରୟୋଗ କରିଥିଲେ। ମାଲକମଣିଙ୍କ ଚାଷ ପ୍ରତି ଆଗ୍ରହ ବଢ଼ିବାରୁ କନକ ବାୟୋସାଇନ୍ସ ଓ ରିସର୍ଚ୍ଚ ପ୍ରାଇଭେଟ୍ ଲିମିଟେଡ୍ର ପରିଚାଳନା ନିର୍ଦ୍ଦେଶକ ଡ.ଦୀପକ ସାହୁ ଓ ସହକାରୀ କୃଷି ଅଧିକାରୀ ବାସନା ଧାନ ଚାଷ ବିଷୟରେ ତାଙ୍କୁ ବୁଝାଇଥିଲେ। ସମ୍ପୂର୍ଣ ଜୈବିକ ଉପାୟରେ ଚାଷ କରିବା ପାଇଁ ପରାମର୍ଶ ଦେଇଥିଲେ। ବିନା ରାସାୟିନକ ସାରରେ ଫସଲ ଅମଳକୁ ନେଇ ଦ୍ୱନ୍ଦରେ ପଡ଼ିବା ସହିତ ଦୃଢ଼ତାର ସହିତ ଚାଷକାର୍ଯ୍ୟ ଆରମ୍ଭ କରିଥିଲେ। କୌଣସି ସମସ୍ୟା ଉପୁଜିଲେ ବିଭାଗୀୟ ଅଧିକାରୀଙ୍କ ପରାମର୍ଶ ଗ୍ରହଣ କରୁଥିଲେ। ଫସଲର ସୁରକ୍ଷା ନିମନ୍ତେ ଫସଲ ସୁରକ୍ଷା ଅଧିକାରୀ ଡ. ମନୋଜ ଚାନ୍ଦଙ୍କୁ ସବିଶେଷ ତଥ୍ୟ ପ୍ରଦାନ କରୁଥିଲେ। ବିଭାଗୀୟ ଅଧିକାରୀଙ୍କ ପରାମର୍ଶ ନେଇ ଜୈବିକ ଉପାୟରେ ଚାଷ ପାଇଁ ବିଭିନ୍ନ ଆନୁସଙ୍ଗିକ ସାମଗ୍ରୀ ଯଥା- ଜିଆଖତ, ଜୈବିକ ଖତ, ସଢା ଜୈବାଂଶ ଏବଂ ବେଲ, ତୁଳସୀ, ଅରଖ, ନିମ୍ବ ଓ କରଞ୍ଜ ପତ୍ରରୁ ଜୈବିକ ଔଷଧ ତିଆରି କରିଥିଲେ। ତାଙ୍କଠାରୁ ପ୍ରେରଣା ପାଇ ଗ୍ରାମର ମହିଳାପୁରୁଷମାନେ ତାଲିମ ନେଇ ଅଞ୍ଚଳରେ ବାସନା ଧାନ ଚାଷ କରି ଭଲ ରୋଜଗାର କରି ପାରୁଛନ୍ତି। ସରକାରୀସ୍ତରରେ ଉପଯୁକ୍ତ ତାଲିମ ଯୋଗାଇ ଦିଆଗଲେ ନୂଆ ପ୍ରଣାଳୀରେ ଚାଷ କରିବେ ବୋଲି ମାଲକମଣି କହିଛନ୍ତି ।
