ଲୋଇସିଂହା,୧୭।୪(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ବ୍ଲକର ପୁରୁଣା ସଭାଗୃହରେ ଏମଜିଏନଆରଇଜିଏସ ଲୋଇସିଂହା ବ୍ଲକସ୍ତରୀୟ ସାମାଜିକ ସମୀକ୍ଷା ଜନଶୁଣାଣି ଶିବିର ଗୁରୁବାର ଅନୁଷ୍ଠିତ ହୋଇଯାଇଛି। ଏହି ଶିବିରରେ ହାତଗଣତି କେତେଜଣ ବିଭାଗୀୟ କର୍ମଚାରୀ ଥିବା ବେଳେ କେହି ଜଣେ ହେଲେ ଜବକାର୍ଡଧାରୀ ଶ୍ରମିକ କିମ୍ବା ଅଭିଯୋଗକାରୀ ଉପସ୍ଥିତ ନ ଥିଲେ। ଅଭିଯୋଗ ସଂକ୍ରାନ୍ତ ତଥ୍ୟ ଦେବା ପାଇଁ ପଞ୍ଚାୟତର ପିଇଓମାନେ ମଧ୍ୟ ଅନୁପସ୍ଥିତ ଥିବାରୁ ଏହି ଶିବିର କାହା ସ୍ବାର୍ଥରେ ବୋଲି ବ୍ଲକ ଅଧ୍ୟକ୍ଷ ଯତୀନ୍ଦ୍ର ପଟେଲ ଆପତ୍ତି ଉଠାଇଥିଲେ। ଅସନ୍ତୋଷ ବ୍ୟକ୍ତ କରି ବ୍ଲକ ଅଧ୍ୟକ୍ଷ ପଟେଲ ଶିବିର ଅଧାରୁ ଉଠି ଚାଲି ଆସିଥିଲେ ା ୨୦୨୫-୨୬ ଆର୍ଥିକ ବର୍ଷର ଏହା ଦ୍ୱିତୀୟ ଚକ୍ର ା ୨ ଏପ୍ରିଲ ୨୦୨୫ରୁ ୩୦ ସେପ୍ଟେମ୍ବର ୨୦୨୫ ମଧ୍ୟରେ ହୋଇଥିବା ଏମଜିଏନଆରଇଜିଏସ କାମର ସମୀକ୍ଷା ଏହି ଶିବିରରେ କରାଯାଇଥିଲା। ଶିବିରରେ ଉପଜିଲାପାଳ ଆଲୋକ ପଟେଲ ଯୋଗଦାନ କରିବାର କାର୍ଯ୍ୟକ୍ରମ ଥିବା ବେଳେ କୌଣସି କାରଣବଶତଃ ସେ ଆସି ନ ଥିଲେ। ଅପରପକ୍ଷେ ବିଡିଓଙ୍କ ଅନୁପସ୍ଥିତିରେ ଏବିଡିଓ କିଶୋର ମାନସିଂ ଶିବିରରେ ଅଧ୍ୟକ୍ଷତା କରିଥିଲେ। ବିଭାଗୀୟ ଏପିଓ ପୁଷ୍ପାଞ୍ଜଳି ସ୍ବାଇଁ ପ୍ରାରମ୍ଭିକ ସୂଚନା ପ୍ରଦାନ କରିଥିଲେ। ସରକାରଙ୍କ ପକ୍ଷରୁ ଦୁର୍ନୀତି ରୋକିବା ପାଇଁ ବିଭାଗରେ ବିବିଧ ସଂସ୍କାର ଅଣାଯାଉଥିବା ସେ କହିଥିଲେ। ଏହାଛଡା ୨୦୨୫-୨୬ ଆର୍ଥିକ ବର୍ଷରେ ବ୍ଲକରେ ୩ ଲକ୍ଷ ଶ୍ରମ ଦିବସ ସୃଷ୍ଟି କରାଯାଇଥିବା ସୂଚନା ଦେଇଥିଲେ। ଶିବିରରେ ବ୍ଲକ ସାମାଜିକ ଅଧିକାରୀ ରତିକାନ୍ତ ପଧାନ ପଞ୍ଚାୟତ ସ୍ତରରେ ଭିଆରପିମାନଙ୍କ ଦ୍ୱାରା କରାଯାଇଥିବା ସମୀକ୍ଷା ସମୟର ତଥ୍ୟ ଉପସ୍ଥାପନା କରିଥିଲେ। ବ୍ଲକର ବାଦିବାହାଲ ପଞ୍ଚାୟତରେ ଭିଆରପିମାନେ ସମୀକ୍ଷା କଲା ବେଳେ ୯ ଟି ସାମୂହିକ ପ୍ରକଳ୍ପର କେସ ରେକର୍ଡ ମିଳି ନ ଥିବା ପଧାନ ସୂଚନା ଦେଇଥିଲେ। ସେହିପରି ବୁର୍ଡା ପଞ୍ଚାୟତର ଗାଇ ଗୁହାଳ ପାଇଥିବା ଶିବରାମ ସାହୁ ନାମକ ଜଣେ ହିତାଧିକାରୀ ୨୦୨୩ ଓ ୨୦୨୫ ମସିହାରେ ୨ ଥର ପ୍ରକଳ୍ପର ସୂଚନା ଫଳକ ପାଇଁ ବିଲ୍ ଦାଖଲ କରିଥିବା ଅଭିଯୋଗ ହୋଇଥିଲା।
ଲୋଇସିଂହା, କନ୍ଦାଜୁରୀ, ହୀରାପୁର ଆଦି ପଞ୍ଚାୟତର ବିଭିନ୍ନ ଗ୍ରାମରେ ପଞ୍ଚାୟତ, ମୃର୍ତ୍ତିକା ସଂରକ୍ଷଣ ବିଭାଗ ଓ ଉଦ୍ୟାନ ବିଭାଗ ପକ୍ଷରୁ ହୋଇଥିବା କାମଗୁଡିକର ଗ୍ରାମ ସଭା କପି ଦାଖଲ ହୋଇ ନଥିବାରୁ ହିତାଧିକାରୀମାନେ ପ୍ରାପ୍ୟ ପାଇବାରେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଥିଲା। ଶିବିରରେ ଉଦ୍ୟାନ ବିଭାଗର ଅଧିକାରୀଙ୍କ ଅନୁପସ୍ଥିତିରେ ଏଠାରୁ ଆଗଲପୁରକୁ ବଦଳି ହୋଇଥିବା ବିଭାଗୀୟ ଓଭରସିୟର ଯୋଗ ଦେଇଥିଲେ। ସେ ଅଭିଯୋଗ ଉପରେ ସଠିକ ତଥ୍ୟ ରଖି ନପାରି ଥିଲେ ା ଅପରପକ୍ଷେ ବାଦିବାହାଲ ପଞ୍ଚାୟତରେ ପ୍ରକଳ୍ପ କେସ ରେକର୍ଡ ନ ମିଳିବା ଘଟଣାରେ ପଞ୍ଚାୟତର ଏଡିଓ ଓ ଭିଆରପି ଶିବିରରେ ମୁହାଁମୁହିଁ ହେବା ଭଳି ରୋଚକ ଘଟଣା ଦେଖିବାକୁ ମିଳିଥିଲା। ଶିବିରରେ କେତେକ ଘଟଣାକୁ ଦେଖି ଶିବିର ଅଧ୍ୟକ୍ଷ ଏବିଡିଓ ମାନସିଂ ମଧ୍ୟ ଶିବିର ଅଧାରୁ ଚାଲି ଯାଇଥିବା ଦେଖିବାକୁ ମିଳିଥିଲା।
Dharitri – Odisha’s No.1 Odia Daily
