ମୋହନା,୩୦।୭(ମନ୍ମଥ ମିଶ୍ର): ପୂର୍ବ ସରକାରଙ୍କ ୫-ଟି ଯୋଜନାରେ ରୂପାନ୍ତରିତ ସ୍ମାର୍ଟ ସ୍କୁଲ, କିନ୍ତୁ ସ୍ମାର୍ଟ ଶିକ୍ଷା କେବଳ ସରକାରୀ ଦସ୍ତାବିଜରେ ସୀମିତ ରହିଯାଇଛି। ଏଠାରେ ସ୍ମାର୍ଟ କ୍ଲାସରୁମରେ ତାଲା ଝୁଲୁଥିବା ବେଳେ ବାରଣ୍ଡାରେ ବସି କୋମଳମତି ଛାତ୍ରୀଛାତ୍ର ପାଠ ପଢ଼ୁଛନ୍ତି। ଶିକ୍ଷକ ଅଭାବ ଯୋଗୁ ସମସ୍ତ ଶ୍ରେଣୀରେ ଏକାସାଙ୍ଗରେ ପାଠପଢ଼ା ସମ୍ଭବ ହେଉନାହିଁ। ଉନ୍ନତ ଶିକ୍ଷାର ସ୍ୱପ୍ନ ଦେଖାଇଥିବା ସରକାରୀ ଯୋଜନାର ବାସ୍ତବ ଚିତ୍ର ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଏଭଳି ଦୃଶ୍ୟ ଗଜପତି ଜିଲା ମୋହନା ବ୍ଲକ ଅନ୍ତର୍ଗତ ଡେଙ୍ଗେସଖାଲ ଗ୍ରାମ ସରକାରୀ ଉଚ୍ଚ ବିଦ୍ୟାଳୟରେ ଦେଖିବାକୁ ମିଳିଛି।
୫-ଟି ଯୋଜନାରେ ସ୍ମାର୍ଟ ସ୍କୁଲରେ ପରିଣତ ହୋଇଥିବା ଏହି ବିଦ୍ୟାଳୟରେ ବାଲବାଟିକାରୁ ଦଶମ ଶ୍ରେଣୀ ପର୍ଯ୍ୟନ୍ତ ୨୦୦ରୁ ଅଧିକ ଛାତ୍ରୀଛାତ୍ର ପାଠ ପଢ଼ୁଛନ୍ତି। କିନ୍ତୁ ସେମାନଙ୍କୁ ପାଠ ପଢ଼ାଇବା ପାଇଁ ମାତ୍ର ୪ ଜଣ ଶିକ୍ଷକ ନିଯୁକ୍ତ ଅଛନ୍ତି। ସେଥିମଧ୍ୟରୁ ଜଣେ ଶିକ୍ଷକ ବିଏଲଓ (BLO) ଦାୟିତ୍ୱରେ ନିୟୋଜିତ ଥିବାରୁ ପାଠଦାନ ବ୍ୟବସ୍ଥା ଅଧିକ ପ୍ରଭାବିତ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଫଳରେ ସମସ୍ତ ଶ୍ରେଣୀରେ ନିୟମିତ ପାଠପଢ଼ା ସମ୍ଭବ ହେଉନାହିଁ।ଅନ୍ୟପଟେ ଶ୍ରେଣୀଗୃହ ଅଭାବ ଯୋଗୁ ଦୁଇଟି ଶ୍ରେଣୀର ଛାତ୍ରୀଛାତ୍ର ବାରଣ୍ଡାରେ ବସି ପାଠ ପଢ଼ୁଛନ୍ତି। ବର୍ଷା ହେଲେ ବାରଣ୍ଡାକୁ ପାଣି ଛିଟା ପଡ଼ୁଥିବାରୁ ସେମାନଙ୍କ ବହି, ଖାତା ଓ ସ୍କୁଲ ବ୍ୟାଗ୍ ଭିଜିଯାଉଛି। ଏହା ଛାତ୍ରୀଛାତ୍ରୀଙ୍କ ପାଠପଢ଼ାରେ ବାଧା ସୃଷ୍ଟି କରୁଛି।
ଗୋଟିଏ ପଟେ ପିଲାମାନେ ଅସୁବିଧାରେ ପାଠ ପଢ଼ୁଥିବା ବେଳେ ଅନ୍ୟପଟେ ନବମ ଓ ଦଶମ ଶ୍ରେଣୀ ପାଇଁ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ସ୍ମାର୍ଟ କ୍ଲାସରୁମରେ ତାଲା ଝୁଲୁଛି। ପ୍ରୋଜେକ୍ଟର, ସ୍ମାର୍ଟ ବୋର୍ଡ ଓ ଆଧୁନିକ ଶିକ୍ଷା ସାମଗ୍ରୀ ବ୍ୟବହାର ନହୋଇ ଅବ୍ୟବହୃତ ଅବସ୍ଥାରେ ପଡ଼ିରହିଛି। ବିଦ୍ୟାଳୟ କର୍ତ୍ତୃପକ୍ଷ ଓ ଗ୍ରାମବାସୀଙ୍କ କହିବା ଅନୁଯାୟୀ, ଶିକ୍ଷକ ଅଭାବ ସମ୍ପର୍କରେ ବାରମ୍ବାର ବ୍ଲକ ଶିକ୍ଷା ଅଧିକାରୀଙ୍କଠାରୁ ଆରମ୍ଭ କରି ଜିଲା ପ୍ରଶାସନ ପର୍ଯ୍ୟନ୍ତ ଅବଗତ କରାଯାଇଛି। ହେଲେ ଆଜି ପର୍ଯ୍ୟନ୍ତ ସ୍ଥାୟୀ ସମାଧାନର କୌଣସି ପଦକ୍ଷେପ ନିଆଯାଇନାହିଁ। ଫଳରେ ଛାତ୍ରୀଛାତ୍ରଙ୍କ ପାଠପଢ଼ା ଗୁରୁତର ଭାବେ ପ୍ରଭାବିତ ହେଉଛି।
ସରକାର ଆଦିବାସୀ ଅଧ୍ୟୁଷିତ ଦୁର୍ଗମ ଅଞ୍ଚଳର ପିଲାମାନଙ୍କୁ ସ୍ମାର୍ଟ ଶିକ୍ଷା ଯୋଗାଇବାର ବଡ଼ ବଡ଼ ପ୍ରତିଶ୍ରୁତି ଦେଉଥିବା ବେଳେ ଡେଙ୍ଗେସଖାଲ ବିଦ୍ୟାଳୟର ବାସ୍ତବ ଚିତ୍ର ଏହାକୁ ପ୍ରଶ୍ନବାଚୀ କରିଛି। ସ୍ମାର୍ଟ କ୍ଲାସରୁମ ଅଛି, କିନ୍ତୁ ପାଠପଢ଼ା ହେଉନାହିଁ; ସ୍ମାର୍ଟ ବୋର୍ଡ ଅଛି, କିନ୍ତୁ ଶିକ୍ଷକ ନାହାନ୍ତି। ପ୍ରଚାରରେ ସ୍ମାର୍ଟ ସ୍କୁଲ ଥିବା ବେଳେ ବାସ୍ତବରେ ଅବ୍ୟବସ୍ଥାର ଚିତ୍ର ସାମ୍ନାକୁ ଆସିଛି। ଅଞ୍ଚଳବାସୀ ତୁରନ୍ତ ବିଦ୍ୟାଳୟରେ ପର୍ଯ୍ୟାପ୍ତ ଶିକ୍ଷକ ନିଯୁକ୍ତି ସହ ଶ୍ରେଣୀଗୃହ ସମସ୍ୟାର ସ୍ଥାୟୀ ସମାଧାନ କରି ପିଲାମାନଙ୍କ ଭବିଷ୍ୟତ ସୁରକ୍ଷିତ କରିବାକୁ ଦାବି କରିଛନ୍ତି।
କୋଟି କୋଟି ଟଙ୍କା ବ୍ୟୟ କରି ସ୍ମାର୍ଟ ସ୍କୁଲ ନିର୍ମାଣ କରିଦେଲେ ମାତ୍ର ସ୍ମାର୍ଟ ଶିକ୍ଷା ସଫଳ ହେବ ନାହିଁ। ସେଥିପାଇଁ ପର୍ଯ୍ୟାପ୍ତ ଶିକ୍ଷକ, ଆବଶ୍ୟକ ଭିତ୍ତିଭୂମି ଓ ସଠିକ୍ ପରିଚାଳନା ମଧ୍ୟ ଅତ୍ୟାବଶ୍ୟକ। ଯଦି ଶିକ୍ଷକ ନାହାନ୍ତି, ଶ୍ରେଣୀଗୃହର ଅଭାବ ରହିଛି ଏବଂ ସ୍ମାର୍ଟ କ୍ଲାସରୁମରେ ତାଲା ଝୁଲୁଛି, ତେବେ ୫-ଟି ରୂପାନ୍ତରଣର ଉଦ୍ଦେଶ୍ୟ କେତେ ସଫଳ ହୋଇଛି, ତାହାକୁ ନେଇ ସ୍ୱାଭାବିକ ଭାବେ ପ୍ରଶ୍ନ ଉଠୁଛି। ବର୍ତ୍ତମାନ ପ୍ରଶାସନ କେବେ ଏହି ସମସ୍ୟାର ସ୍ଥାୟୀ ସମାଧାନ କରୁଛି, ତାହା ଉପରେ ସମସ୍ତଙ୍କ ନଜର ରହିଛି।
