ରାଉରକେଲା ଅଫିସ,୩୧।୩: ସ୍ମାର୍ଟସିଟି ରାଉରକେଲାରେ ଟ୍ରେନ ଧକ୍କା, ଟ୍ରେନରୁ ଖସି ଓ ଆମତ୍ହତ୍ୟା ଜନିତ ମୃତ୍ୟୁ ମାମଲା ବଢିବାରେ ଲାଗିଛି। ଟ୍ରେନ୍ ଲାଇନରେ ଲୋକଙ୍କ ଜୀବନ ଯିବା ଘଟଣାରେ ରୋକ୍ ଲାଗିପାରୁନି। ସାମାନ୍ୟ ଭୁଲ ଓ ଅସାବଧାନତା ଯୋଗୁ ଅକାଳରେ ଚାଲିଯାଉଛି ଅମୂଲ୍ୟ ଜୀବନ।
ରାଉରକେଲା ଜିଆର୍ପିର ସୂଚନା ଅନୁସାରେ, ଗତ ୩ବର୍ଷ ମଧ୍ୟରେ ରାଉରକେଲା ଜିଆରପି ଅଧୀନରେ ସମୁଦାୟ ୧୭୭ଟି ଅପମୃତ୍ୟୁ ମାମଲା ରୁଜୁ ହୋଇଛି। ତନ୍ମଧ୍ୟରୁ ୨୦୨୨ ମସିହାରେ ସର୍ବାଧିକ ୯୦ଟି ମାମଲା ପଞ୍ଜୀକୃତ ହୋଇଥିବା ବେଳେ ୬୯ଜଣଙ୍କ ଟ୍ରେନ ଧକ୍କା, ଟ୍ରେନରୁ ଖସିପଡି ଓ ଆମତ୍ହତ୍ୟା ଜନିତ ମୃତ୍ୟୁ ହୋଇଛି। ସେହିପରି ୨୦୨୧ରେ ମୋଟ୍ ୬୫ଟି ମାମଲା ପଞ୍ଜୀକୃତ ହୋଇଥିବା ବେଳେ ୫୧ଜଣଙ୍କ ମୃତ୍ୟୁ ହୋଇଛି। ୨୦୨୩ ମାର୍ଚ୍ଚ ସୁଦ୍ଧା ୨୩ଟି ମାମଲା ପଞ୍ଜୀକୃତ ହୋଇଛି। ସେଥିରୁ ୧୯ଜଣଙ୍କ ଟ୍ରେନ ଧକ୍କା, ଟ୍ରେନରୁ ଖସି ଓ ଆମତ୍ହତ୍ୟା ହେତୁ ମୃତ୍ୟୁ ଘଟିଥିବା ଜଣାପଡିଛି। ଏଭଳି ଭାବେ ଟ୍ରେନ୍ରେ ବର୍ତ୍ତମାନ ସୁଦ୍ଧା ଗତ ୩ ବର୍ଷରେ ୧୩୯ ଜଣଙ୍କ ମୃତ୍ୟୁ ହୋଇଛି।
ଅସାବଧାନତା ଏବଂ ଦୁଃସାହସିକ କାର୍ଯ୍ୟକଳାପ ଯୋଗୁ ଲୋକଙ୍କୁ ଦୁର୍ଘଟଣାର ସମ୍ମୁଖୀନ ହେବାକୁ ପଡୁଛି। ଟ୍ରେନରେ ଯାତ୍ରା ବେଳେ ତରତର ହୋଇ ଟ୍ରେନ୍ ଚଢିବା, ଟ୍ରେନ ଦ୍ୱାର ପାଖରେ ଛିଡା ହୋଇ ଅନ୍ୟମନସ୍କ ରହୁଥିବା କାରଣରୁ ଅନେକ ବ୍ୟକ୍ତି ଟ୍ରେନରୁ ଖସି ଗୁରୁତର ହେଉଛନ୍ତି। କୁଲୁଙ୍ଗା, ପାନପୋଷ ଏବଂ ବିଶ୍ରା ଛକ ନିକଟସ୍ଥ ବ୍ରିଜ୍ ତଳ ରେଳ ଧାରଣରେ ଅଧିକାଂଶ ଦୁର୍ଘଟଣା ଘଟିଥିବା ନଜିର ରହିଛି। ଏ ନେଇ ଜିଆର୍ପି ଥାନାଧିକାରିଣୀ ରେଶ୍ମା ଏକ୍କାଙ୍କୁ ପଚାରିବାରୁ ସେ କହିଲେ, ଟ୍ରେନ୍ ଯିବା ବେଳେ ରେଳଧାରଣା ପାରି ହେବାକୁ ବାରଣ କରାଯିବା ସହ ସାଇନବୋର୍ଡ ଲଗାଯାଇଛି। ଏହାସତ୍ତ୍ୱେ ଲୋକେ ଅମାନିଆ ହୋଇ ରେଳଧାରଣା ପାରି ହେଉଥିବାରୁ ଟ୍ରେନ ଧକ୍କାର ସମ୍ମୁଖୀନ ହେଉଛନ୍ତି। ଏହାକୁ ଏଡାଇବା ପାଇଁ ହେଲେ ସମସ୍ତେ ସଚେତନ ହେବା ଆବଶ୍ୟକ ବୋଲି ଏକ୍କା କହିଥିଲେ।
