ରାଉରକେଲା ଅଫିସ,୨୯।୧୧:ଆଉ ମାସକ ପରେ ରାଉରକେଲାରେ ପୁରୁଷ ହକି ବିଶ୍ୱକପ୍ ଆୟୋଜିତ ହେବ। ଏଥିପାଇଁ ସହରରେ ବହୁ ଉନ୍ନତିମୂଳକ କାର୍ଯ୍ୟ ଆଗେଇ ଚାଲିଛି। ଏହା ଭିତରେ ଦିନକୁ ଦିନ ସ୍ମାର୍ଟସିଟିରେ ପ୍ରଦୂଷଣ ମାତ୍ରା ବଢିବାରେ ଲାଗିଛି। ଏଥିଯୋଗୁ ଜନସାଧାରଣ ଏବଂ ଯାନବାହନ ଯାତାୟାତରେ ବହୁ ଅସୁବିଧା ହେଉଛି। ଧୂଳିଧୂଆଁ ଯୋଗୁ ରାସ୍ତା ଦେଖା ନ ଯିବାରୁ ବିଭିନ୍ନ ସମୟରେ ଦୁର୍ଘଟଣା ଘଟୁଥିବା ନଜିର ରହିଛି। ତେବେ ସହରର ଏହି ପ୍ରଦୂଷଣ ହକି ବିଶ୍ୱକପ୍ ପୂର୍ବରୁ ନିୟନ୍ତ୍ରଣ ହୋଇଯିବ ବୋଲି ଆଞ୍ଚଳିକ ପ୍ରଦୂଷଣ ବୋର୍ଡ ପକ୍ଷରୁ କୁହାଯାଇଛି।
ପ୍ରଦୂଷଣ ଯୋଗୁ ରାଉରକେଲା ସହରରେ ବିଶେଷ କରି ପାନପୋଷ ଛକ, ହନୁମାନ ବାଟିକା ଛକ, ଛେଣ୍ଡ୍ ରିଂରୋଡ୍, ପ୍ଲାଣ୍ଟସାଇଟ ଅଞ୍ଚଳ ରାସ୍ତା କଡରେ ଥିବା ଗଛପତ୍ରର ରଙ୍ଗ ମାଟିଆ ଦେଖା ଯାଉଛି। ସହର ନିକଟ କୁଲୁଙ୍ଗା, ବେଦବ୍ୟାସ, ରାଉରକେଲା ଶିଳ୍ପାଞ୍ଚଳରେ ଥିବା କିଛି ଇଣ୍ଡଷ୍ଟ୍ରିରୁ ବାହାରୁଥିବା କଳାଧୂଆଁ ଓ ପ୍ରଦୂଷଣ ମାତ୍ରାକୁ ରୋକିବା ପାଇଁ ରାଉରକେଲା ପ୍ରଦୂଷଣ ବିଭାଗ ପକ୍ଷରୁ ସେଭଳି ପଦକ୍ଷେପ ନିଆଯାଇନାହିଁ। ବିଭିନ୍ନ ସମୟରେ ରାଉରକେଲା ପାନପୋଷ ଛକରୁ ନେଇ ହନୁମାନ ବାଟିକା ଛକ ରାସ୍ତାରେ ଧୂଳି ଉଡୁଥିବାରୁ ଜନସାଧାରଣଙ୍କୁ ଯାତାୟାତରେ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଏହି ଧୂଳିକଣାକୁ ଆୟତ୍ତ କରିବା ପାଇଁ ସ୍ଥାନୀୟ ପ୍ରଶାସନ ପକ୍ଷରୁ ପ୍ରଥମେ ରାସ୍ତା ଉପରେ ଦିନକୁ ଦୁଇଥର ଲେଖାଏଁ ପାଣି ଟ୍ୟାଙ୍କର ସାହାଯ୍ୟରେ ପକାଯାଉଥିଲା। ବର୍ତ୍ତମାନ ପାଣି ପକାଯାଉ ନ ଥିବା ଦେଖିବାକୁ ମିଳିଛି। ଅନ୍ୟପଟେ ରାଉରକେଲା ପ୍ରଦୂଷଣ ବିଭାଗ ପକ୍ଷରୁ ସହର ଆଖାପାଖରେ ଥିବା ଛୋଟ ଛୋଟ ଶିଳ୍ପ କାରଖାନାକୁ ଖାଲି ନୋଟିସ ଜାରି କରି ଦିଆଯାଇଥିବା ବେଳେ ସେମାନଙ୍କ ପ୍ରତି ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ। ଫଳରେ କଳାକାରଖାନାରୁ କଳାଧୂଆଁ ବାହାରି ସହରର ପ୍ରଦୂଷଣ ମାତ୍ରା ବଢିବାରେ ଲାଗିଛି।
ରାଉରକେଲା ପ୍ରଦୂଷଣ ନିୟନ୍ତ୍ରଣ ବୋର୍ଡ କାର୍ଯ୍ୟାଳୟରୁ ମିଳିଥିବା ତଥ୍ୟ ଅନୁଯାୟୀ, ରାଉରକେଲା ସହରରେ ପଞ୍ଜୀକୃତ ହୋଇଥିବା ୫୬୫ ଛୋଟବଡ ଶିଳ୍ପ, ପଥର ଖାଦାନ, ବାଲିଘାଟ ଓ ଇଟାଭାଟି ରହିଛି। ସେଥିରୁ ୧୩୬ଟି ଶିଳ୍ପ ମଧ୍ୟରେ କେମିକାଲ ଉଦ୍ୟୋଗ, ଗ୍ୟାସ, ଖଣି, ପଥର ଖାଦାନ ଏବଂ ଇଟାଭାଟି ରହିଛି। ପ୍ରଦୂଷଣ ବିଭାଗ ପକ୍ଷରୁ ୩ ମାସ ତଳେ ବଣେଇରେ ଥିବା ୨ଟି ଶିଳ୍ପ କାରଖାନାକୁ ପ୍ରଦୂଷଣ ନିୟମ ଉଲଂଘନ କରୁଥିବାରୁ ନୋଟିସ ଜାରି କରାଯାଇଥିବାବେଳେ କୁଲୁଙ୍ଗାରେ ୨ଟି, କୁଆଁରମୁଣ୍ଡା ଅଞ୍ଚଳରେ ୩ଟି କାରଖାନା ଉପରେ ପଦକ୍ଷେପ ନିଆଯାଇଛି। ବର୍ତ୍ତମାନ ସୁଦ୍ଧା ରାଉରକେଲା ଆଖପାଖରେ ଥିବା ପ୍ରାୟ ୫୦ ପ୍ରତିଶତ କାରଖାନା ପ୍ରଦୂଷଣ ନିୟମର ଖିଲାପ କରିଚାଲିଛନ୍ତି। କିନ୍ତୁ ପ୍ରଦୂଷଣ ବିଭାଗ ଏ ନେଇ କୌଣସି କାର୍ଯ୍ୟାନୁଷ୍ଠାନ ନେଉ ନ ଥିବା ଅଭିଯୋଗ ହେଉଛି। ଫଳରେ ସ୍ମାର୍ଟସିଟି ରାଉରକେଲା ଦିନକୁ ଦିନ ପ୍ରଦୂଷଣ ବଳୟ ଘେରକୁ ଆସିଲାଣି। ଏ ସମ୍ପର୍କରେ ରାଉରକେଲା ସ୍ଥିତ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଉପ ଆଞ୍ଚଳିକ ଅଧିକାରୀ ବିଜୟ କୁମାର ଭୋଇଙ୍କୁ ପଚାରିବାରୁ ସେ କହିଥିଲେ, ସେପ୍ଟେମ୍ବର ମାସରେ ସହରର ବିଭିନ୍ନ ରାସ୍ତାଘାଟ ମରାମତି ଯୋଗୁ ବାୟୁ ପ୍ରଦୂଷଣ ମାତ୍ରା ଅଧିକ ରହିଥିଲା। ଆଗାମୀ ହକି ବିଶ୍ୱକପ୍ ପୂର୍ବରୁ ସମସ୍ତ ରାସ୍ତାଘାଟ ମରାମତି କାମ ସରିଗଲେ ସହରରେ ପ୍ରଦୂଷଣ ନିୟନ୍ତ୍ରଣ ହୋଇଯିବ। ଏଥିସହ ରାଉରକେଲା ଆଞ୍ଚଳିକ ପ୍ରଦୂଷଣ ବିଭାଗ ପକ୍ଷରୁ ସହର ଆଖପାଖରେ ଥିବା ଶିଳ୍ପ କାରଖାନା ଗୁଡିକୁ ଆମେ ସରପ୍ରାଇଜ୍ ଭିଜିଟ୍ରେ ଯାଉଛୁ। ଯଦି କୌଣସି ସ୍ଥାନରେ ପ୍ରଦୂଷଣ ନିୟମ ଖିଲାପ କରାଯାଇଥିବା ଦେଖୁଛୁ ସେମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନିଆଯାଉଛି। ବର୍ତ୍ତମାନ ସହରରେ ବହୁ କନଷ୍ଟ୍ରକ୍ଶନ କାମ ଚାଲୁଥିବାରୁ ପ୍ରଦୂଷଣ ଓ ଧୂଳିମାତ୍ରା ବଢିବାରେ ଲାଗିଛି । ତାହା ହକି ବିଶ୍ୱକପ୍ ପୂର୍ବରୁ ନିୟନ୍ତ୍ରଣ ହୋଇଯିବ ବୋଲି ଭୋଇ ମତପ୍ରକାଶ କରିଥିଲେ।
