ଆଳି,୨୭ା୫(ଡି.ଏନ.ଏ.): କେନ୍ଦ୍ରାପଡ଼ା ଜିଲା ଆଳି ବ୍ଲକର ଦଶିପୁର ଓ ଏକମାଣିଆ ପଞ୍ଚାୟତ ଗଠନ ହେବାର ୬ ବର୍ଷ ବିତିଯାଇଥିବା ବେଳେ ଆଜି ପର୍ଯ୍ୟନ୍ତ କାର୍ଯ୍ୟାଳୟ ନିର୍ମାଣ ହୋଇପାରୁନି। ଏହି ୨ଟି ପଞ୍ଚାୟତ ଗଠନ ହେବାର କିଛିଦିନ ମଧ୍ୟରେ ପଞ୍ଚାୟତିରାଜ ବିଭାଗ ପକ୍ଷରୁ ଗ୍ରାମ ପଞ୍ଚାୟତ କାର୍ଯ୍ୟାଳୟ ନିର୍ମାଣ ନିମନ୍ତେ ୩୫ ଲକ୍ଷ ଟଙ୍କା ବ୍ୟୟ ଅଟକଳ ହୋଇଥିଲା। ୧୫ ଲକ୍ଷ ଲେଖାଏ ଟଙ୍କା ଆସିଥିଲା। କିନ୍ତୁ ବିଡ଼ମ୍ବନାର ବିଷୟ ଆଜି ପର୍ଯ୍ୟନ୍ତ ପଞ୍ଚାୟତ କାର୍ଯ୍ୟାଳୟ ନିର୍ମାଣ ନିମନ୍ତେ ମାଟି ମୁଠେ ମଧ୍ୟ ପଡିନାହିଁ। ବହୁ ବିଡିଓ ଏବଂ ତହସିଲଦାରଙ୍କ ବଦଳି ହେଉଥିବା ବେଳେ ୨ଟି ପଞ୍ଚାୟତ କାର୍ଯ୍ୟାଳୟ ନିର୍ମାଣ କାଗଜକଲମରେ ଅଟକି ରହିଛି। ତହସିଲ ଜାଗା ନିରୂପଣ କଲେ କାର୍ଯ୍ୟାଳୟ ହେବ ବୋଲି ବିଡିଓ କହୁଥିବା ବେଳେ ତହସିଲ ପକ୍ଷରୁ ସ୍ଥାନ ନିରୂପଣ ହେବାରେ ତହସିଲଦାରଙ୍କ ଟାଳଟୁଳ ନୀତି ଯୋଗୁ ଏହି କାର୍ଯ୍ୟ ଆଗେଇ ପାରୁନାହିଁ ବୋଲି ଅଭିଯୋଗ ହେଉଛି।
ସୂଚନା ଅନୁଯାୟୀ କେନ୍ଦ୍ରାପଡ଼ା ଜିଲା ଆଳି ବ୍ଲକ ୩୨ଟି ପଞ୍ଚାୟତକୁ ନେଇ ଗଠିତ ହୋଇଥିବା ବେଳେ ୨୦୧୭ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପୂର୍ବରୁ ପଞ୍ଚାୟତ ପୁନଃଗଠନ ଯୋଜନାରେ ଦଶିପୁର ଓ ଏକମାଣିଆକୁ ୨ଟି ନୂତନ ପଞ୍ଚାୟତ ଭାବେ ଘୋଷଣା କରାଯାଇଥିଲା। ଏହି ୨ଟି ପଞ୍ଚାୟତ ଗଠନ ହେବା ପୂର୍ବରୁ ଅନ୍ୟ ୨ଟି ପଞ୍ଚାୟତରେ ସଂଯୋଗ ଥିଲା। ନୂତନ ପଞ୍ଚାୟତ ହୋଇଥିବା ଦଶିପୁର ପଞ୍ଚାୟତର ଦଶିପୁର ଓ ଖରିଅଣ୍ଟା ଗ୍ରାମ ପୂର୍ବରୁ ଦେମାଳ ପଞ୍ଚାୟତରେ ସାମିଲ ଥିଲା। ଏହି ୨ଟି ଗ୍ରାମ ବିଭିନ୍ନ କାର୍ଯ୍ୟ ନିମନ୍ତେ ଦେମାଳ ପଞ୍ଚାୟତକୁ ଆସିବାକୁ ହେଲେ ଖରସ୍ରୋତା ନଦୀ ପାର ହୋଇ ଆସିବାକୁ ପଡୁଥିଲା। ଯାହାକୁ ଲକ୍ଷ୍ୟ କରି ଏହାକୁ ନୂତନ ପଞ୍ଚାୟତ ଭାବେ ଘୋଷଣା କରାଯାଇଥିଲା। ସେହିପରି ଏକମାଣିଆ, ଦକ୍ଷିଣଡ଼ିହା ଓ ନଳପାହି ଗ୍ରାମ କୋଳିଡ଼ିହ ପଞ୍ଚାୟତରେ ସଂଯୋଗ ଥିବାବେଳେ ଏହି ଗ୍ରାମକୁ ଚତୁଃପାର୍ଶ୍ୱରୁ ଖରସ୍ରୋତା ଓ ବ୍ରାହ୍ମଣୀ ନଦୀ ଘେରି ରହିଛି। ଫଳରେ ଗ୍ରାମବାସୀ ନଦୀ ପାର ହୋଇ ଭତ୍ତା ନେବାଠୁ ଆରମ୍ଭ କରି ବିଭିନ୍ନ କାର୍ଯ୍ୟ ନିମନ୍ତେ ହଇଣାଣ ହେବାକୁ ପଡୁଥିଲା। ଫଳରେ ଏକମାଣିଆ, ଦକ୍ଷିଣଡ଼ିହା ଓ ନଳପାହି ଗ୍ରାମକୁ ଏକମାଣିଆ ପଞ୍ଚାୟତ ଭାବେ ଘୋଷଣା କରାଗଲା। ଦଶିପୁର ପଞ୍ଚାୟତର ନିଜସ୍ବ କାର୍ଯ୍ୟାଳୟ ନ ଥିବାରୁ ପ୍ରଥମେ ଜଣେ ବ୍ୟକ୍ତିଙ୍କ ଘରେ ଭଡ଼ା ନେଇ କାମ କରୁଥିବା ବେଳେ କିଛିଦିନ ହେବ ଦଶିପୁର ହାଇସ୍କୁଲ ନିକଟରେ ଏକ ଅସ୍ଥାୟୀ ଗୃହକୁ ଲକ୍ଷାଧିକ ଟଙ୍କା ଖର୍ଚ୍ଚ କରି କାର୍ଯ୍ୟାଳୟ ଚାଲୁ ରହିଛି। ଏକମାଣିଆ ପଞ୍ଚାୟତ କାର୍ଯ୍ୟାଳୟ ବାତ୍ୟା ଆଶ୍ରୟସ୍ଥଳ ପରିସରରେ ଚାଲିଛି। ଏ ନେଇ ବିଡିଓ ଦ୍ୱିବେନ୍ଦୁ ଦାସଙ୍କୁ ପଚାରିବାରେ ପଞ୍ଚାୟତ କାର୍ଯ୍ୟାଳୟ ନିର୍ମାଣ ନିମନ୍ତେ ଅର୍ଥ ଆସିଛି। କିନ୍ତୁ ତହସିଲ ପକ୍ଷରୁ ଜମି ଚିହ୍ନଟ ପ୍ରକ୍ରିୟା ବିଳମ୍ବ ହେବାରୁ କାର୍ଯ୍ୟାଳୟ ନିମଁାଣରେ ବିଳମ୍ବ ଘଟୁଛି ବୋଲି ସେ କହିଛନ୍ତି। ଏ ନେଇ ଆଳି ତହସିଲଦାର ଦେବୀ ପ୍ରସାଦ ଆଚାର୍ଯ୍ୟଙ୍କୁ ପଚାରିବାରେ ଉଭୟ ପଞ୍ଚାୟତର କାର୍ଯ୍ୟାଳୟ ଗୃହ ନିର୍ମାଣ ନିମନ୍ତେ ଥିବା ସ୍ଥାନର ଫାଇଲ ପ୍ରୋସେସିଂ ହୋଇ ଉପ ଜିଲାପାଳଙ୍କ କାର୍ଯ୍ୟାଳୟକୁ ପଠାଯାଇଛି। ସେଠାରୁ ନିର୍ଦ୍ଦେଶ ଆସିବା ପରେ ଯାହା କିଛି କରାଯିବ ବୋଲି ସେ କହିଛନ୍ତି।
