ନୂଆଦିଲ୍ଲୀ,୨୧।୧: ଭାରତୀୟ ପେସର ମହମ୍ମଦ ସିରାଜ ଗୁରୁବାର ସିଡ୍ନୀ ଟେଷ୍ଟ ସମ୍ପର୍କରେ ଏକ ବଡ଼ ଖୁଲାସା କରିଛନ୍ତି। ସିଡ୍ନୀ ଟେଷ୍ଟରେ ଦର୍ଶକମାନେ ବାରମ୍ବାର ବର୍ଣ୍ଣବୈଷମ୍ୟ ଆକ୍ଷେପ କରିବା ପରେ ମ୍ୟାଚ୍ ଛାଡ଼ି ଦେବାକୁ ପ୍ରସ୍ତାବ ଦେଇଥିଲେ ଫିଲ୍ଡ ଅମ୍ପାୟର। ଭାରତରେ ପହଞ୍ଚିଥିବା ସିରାଜ ବାପାଙ୍କ ସମାଧି ସ୍ଥଳରୁ ଫେରିବା ପରେ ଏହା କହିଛନ୍ତି।
ଅମ୍ପାୟରଙ୍କ ପ୍ରସ୍ତାବକୁ ଅସ୍ବୀକାର କରି ଦେଇଥିଲେ ଭାରତୀୟ ଦଳର କାମଚଳା ଅଧିନାୟକ ଅଜିଙ୍କ୍ୟ ରାହାନେ। ସେ କହିଥିଲେ, ” ଆମେ କାହିଁକି ମ୍ୟାଚ୍ ଛାଡ଼ିବୁ। ଏହି ଖେଳକୁ ଆମେ ସମ୍ମାନ କରୁ। ଆମେ ଏଠାକୁ ଖେଳିବାକୁ ଆସିଛୁ “। ଏହି ଘଟଣା ମାନସିକ ସ୍ତରରେ ମୋତେ ଶକ୍ତିଶାଳୀ କରିଥିଲା। ମୁଁ ଖୁସି ଯେ, ଦର୍ଶକଙ୍କ ବର୍ଣ୍ଣବୈଷମ୍ୟ ଆକ୍ଷେପ ମୋତେ ପ୍ରଭାବିତ କରିପାରିଲା ନାହିଁ ବୋଲି ବର୍ଡର-ଗାଭାସ୍କର ଟ୍ରଫିରେ ଟିମ୍ ଇଣ୍ଡିଆ ପାଇଁ ସର୍ବାଧିକ ଉଇକେଟ ନେଇଥିବା ବୋଲର କହିଛନ୍ତି।
ଉଲ୍ଲେଖଥାଉ କି, ସିଡ୍ନୀ ତଥା ତୃତୀୟ ଟେଷ୍ଟର ଚତୁର୍ଥ ଦିନ ସିରାଜଙ୍କ ବ୍ୟତୀତ ଯଶପ୍ରୀତ ବୁମରାଙ୍କୁ ମଧ୍ୟ ଟାର୍ଗେଟ କରଥିଲେ ଦର୍ଶକ। ଏ ନେଇ ଫିଲ୍ଡ ଅମ୍ପାୟରଙ୍କୁ ଅଭିଯୋଗ କରିବା ପରେ ସୁରକ୍ଷାକର୍ମୀଙ୍କ ସହାୟତାରେ କିଛି ଦର୍ଶକଙ୍କୁ ଚିହ୍ନଟ କରାଯାଇ ଷ୍ଟାଡିୟମରୁ ବିଦା କରାଯାଇଥିଲା।
