ନୂଆଦିଲ୍ଲୀ, ୩।୨(ପି.ଟି.)-ଭାରତ ଓ ଇଂଲଣ୍ଡ ମଧ୍ୟରେ ପ୍ରଥମ କ୍ରିକେଟ ଟେଷ୍ଟ ଚେନ୍ନାଇର ଚେପକ୍ ଷ୍ଟାଡିୟମରେ ଚଳିତ ମାସ ୫ରୁ ୯ ପର୍ଯ୍ୟନ୍ତ ଅନୁଷ୍ଠିତ ହେବ। ଚେପକ୍ ପିଚ୍ ସାଧାରଣତଃ ସ୍ପିନରଙ୍କୁ ସହାୟତା କରିଥାଏ। ତେଣୁ ଭାରତ ୨ ପେସର ଏବଂ ୩ ସ୍ପିନରଙ୍କ ସହ ପଡ଼ିଆକୁ ଓହ୍ଲାଇବା ସମ୍ଭାବନା ରହିଛି। ଖେଳାଳିଙ୍କ ଆହତ ସମସ୍ୟା ଯୋଗୁ ଅଧିକ ବିକଳ୍ପ ନ ଥିବାରୁ ଦ୍ୱିତୀୟ ପେସ ବୋଲର ସ୍ଥାନ ପାଇଁ ନବାଗତ ମହମ୍ମଦ ସିରାଜ ଏବଂ ଭେଟେରାନ ଈଶାନ୍ତ ଶର୍ମାଙ୍କ ମଧ୍ୟରେ ସୁସ୍ଥ ପ୍ରତିଦ୍ୱନ୍ଦ୍ୱିତା ହେବା ଏକପ୍ରକାର ନିଶ୍ଚିତ ହୋଇଛି। ମଙ୍ଗଳବାର ଭାରତ ଦୀର୍ଘ ସମୟ ଅଭ୍ୟାସ କରିଛି।
ଯଶପ୍ରୀତ୍ ବୁମ୍ରା ଭାରତୀୟ ପେସ୍ ଆକ୍ରମଣ ବିଭାଗ ନେତୃତ୍ୱ ନେବେ। ତଳିପେଟ ଓ ଜଙ୍ଘ ମଧ୍ୟଭାଗରେ ଯନ୍ତ୍ରଣା ଯୋଗୁ ସେ ଅଷ୍ଟ୍ରେଲିଆ ବିପକ୍ଷ ୪ର୍ଥ ଟେଷ୍ଟରେ ଖେଳିପାରି ନ ଥିଲେ। ମାତ୍ର ଏବେ ସେ ସମ୍ପୂର୍ଣ୍ଣ ଫିଟ୍ ଅଛନ୍ତି। ତେବେ ତାଙ୍କ ପାର୍ଟନର କିଏ ହେବ ଏହା ମୁଖ୍ୟ କୋଚ୍ ରବି ଶାସ୍ତ୍ରୀ, ବୋଲିଂ କୋଚ୍ ଭରତ ଅରୁଣ ଏବଂ ଅଧିନାୟକ ବିରାଟ କୋହଲି ସ୍ଥିର କରିବେ। ୩୨ ବର୍ଷୀୟ ଈଶାନ୍ତ ପାଖାପାଖି ୧ ବର୍ଷ ହେଲା ଟେଷ୍ଟ କ୍ରିକେଟରୁ ଦୂରେଇ ରହିଛନ୍ତି। ଅନ୍ୟପକ୍ଷରେ ସିରାଜ ସମ୍ପୂର୍ଣ୍ଣ ଫର୍ମରେ ଅଛନ୍ତି। ଅଷ୍ଟ୍ରେଲିଆରେ ସେ ୩ଟି ଟେଷ୍ଟ ଖେଳି ୧୩ଟି ଉଇକେଟ ନେଇଥିଲେ। ବ୍ରିସ୍ବେନ୍ରେ ସେ ୫ ଉଇକେଟ ସଫଳତା ମଧ୍ୟ ପାଇଥିଲେ। ତେଣୁ ଅଭିଜ୍ଞ ଈଶାନ୍ତ ନା ଫର୍ମରେ ଥିବା ସିରାଜ ଚୟନ ହେଉଛନ୍ତି ତାହା ଦେଖିବାକୁ ବାକି ରହିଛି। ଆହତ ସମସ୍ୟାରୁ ମୁକୁଳିବା ପରେ ଈଶାନ୍ତ ସୟଦ ମୁସ୍ତାକ ଅଲୀ ଟ୍ରଫିରେ ୪ଟି ମ୍ୟାଚ ଖେଳି ମୋଟ ୧୪.୧ ଓଭର ବୋଲିଂ କରିଛନ୍ତି। ତେଣୁ ଆଗାମୀ ଦୁଇ ଦିନ ନେଟ୍ସରେ ଦୁଇ ବୋଲରଙ୍କୁ ଅନୁଧ୍ୟାନ କରିବା ପରେ ବୋଲିଂ କୋଚ୍ ଅରୁଣ ଚୂଡ଼ାନ୍ତ ନିଷ୍ପତ୍ତି ନେବେ।
ସ୍ପିନର ଚୟନ କ୍ଷେତ୍ରରେ ମଧ୍ୟ ସମାନ ଅବସ୍ଥା। ଓ୍ବାଶିଂଟନ ସୁନ୍ଦର ଚମତ୍କାର ଫର୍ମରେ ଅଛନ୍ତି। ସେ ନିଜ ପ୍ରଥମ ମ୍ୟାଚରେ ୪ ଉଇକେଟ ନେବାସହ ଅର୍ଦ୍ଧଶତକ ହାସଲ କରିଛନ୍ତି। ଏହା ବ୍ୟତୀତ ବାମହାତୀ ଅର୍ଥୋଡକ୍ସ ସ୍ପିନର ଅକ୍ଷର ପଟେଲ, ସିନିୟର ଅଫ୍ବ୍ରେକ୍ ବୋଲର ରବିଚନ୍ଦ୍ରନ ଅଶ୍ୱିନ ଏବଂ ବାମହାତୀ ରିଷ୍ଟ ସ୍ପିନର କୁଲଦୀପ ଯାଦବ ଚୟନ ପାଇଁ ଉପଲବ୍ଧ ହେବେ। ରବୀନ୍ଦ୍ର ଜାଡେଜା ଫିଟ୍ ନାହାନ୍ତି। ଦଳ ଚୟନ ସମୟରେ ଏହା ମଧ୍ୟ ନଜରରେ ରଖାଯିବ। ଅକ୍ଷର ପଟେଲ ମିଡିଲ ଅର୍ଡରରେ ଉପଯୋଗୀ ବ୍ୟାଟିଂ କରିବାର ମଧ୍ୟ ଦକ୍ଷତା ରଖିଛନ୍ତି। ତେଣୁ ଅଭିଜ୍ଞ ସ୍ପିନରଙ୍କୁ ସୁଯୋଗ ମିଳିବା ସମ୍ଭାବନା ଅଧିକ।
ବୁଧବାର ଟ୍ରେନିଂ ଆରମ୍ଭ କରିବେ ହାର୍ଦ୍ଦିକ
ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ବୁଧବାର ଟ୍ରେନିଂ ଆରମ୍ଭ କରିବେ। ତାଙ୍କ କ୍ୱାରାଣ୍ଟାଇନ୍ ଅବଧି ବୁଧବାର ସକାଳେ ଶେଷ ହେବ। ଏହାପରେ ସେ ଭାରତୀୟ ଦଳ ସହ ଯୋଗଦେବେ। ଦୀର୍ଘଦିନ ପରେ ଟେଷ୍ଟ ଦଳକୁ ପ୍ରତ୍ୟାବର୍ତ୍ତନ କରିଥିବା ହାର୍ଦ୍ଦିକ କିନ୍ତୁ ପ୍ରଥମ ଟେଷ୍ଟରେ ଖେଳିବା ସମ୍ଭାବନା କ୍ଷୀଣ। ତେବେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଏବଂ ଇଂଲଣ୍ଡରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜକୁ ଦୃଷ୍ଟିରେ ରଖି ତାଙ୍କୁ ବୋଲିଂ ଦକ୍ଷତା ବଢ଼ାଇବା ଉପରେ ଗୁରୁତ୍ୱ ଦିଆଯିବ।
