ନୂଆଦିଲ୍ଲୀ,୧୭।୧୨: ଚାଇନା ଅଷ୍ଟ୍ରେଲିଆ ମଧ୍ୟରେ ବିବାଦ ଜାରି ରହିଛି। ଏହାଯୋଗୁ ୪୦ ଭାରତୀୟ ନାବିକ ଚାଇନା ସାଗରରେ ଦୀର୍ଘ ୪ ମାସ ଧରି ଗୋଟିଏ ସ୍ଥାନରେ ଭାସମାନ ଅବସ୍ଥାରେ ଜଳବନ୍ଦୀ ହୋଇ ରହିଛନ୍ତି। ସେମାନେ ଅଗଷ୍ଟରେ ଅଷ୍ଟ୍ରେଲିଆରୁ କୋଇଲା ବୋଝେଇ କରି ଚାଇନା ଅଭିମୁଖେ ଯାତ୍ରା ଆରମ୍ଭ କରିଥିଲେ। ତେବେ ଚାଇନା ସରକାରଙ୍କ ପକ୍ଷରୁ ଜାରି ହୋଇଥିବା କଟକଣା ଯୋଗୁ ନାବିକମାନଙ୍କୁ ସମ୍ପୃକ୍ତ ଜାହାଜ କମ୍ପାନୀ ବଦଳାଇ ପାରୁ ନାହିଁ। କୂଳକୁ ଯିବାକୁ ଜାହାଜକୁ ଅନୁମତି ଦିଆଯାଉ ନାହିଁ। ଯଦି ଜାହାଜକୁ କୌଣସି ଦୂର ସ୍ଥାନକୁ ନେବାକୁ ଉଦ୍ୟମ କରାଯାଏ ତେବେ ସୀମା ଉଲ୍ଲଂଘନ ଅଭିଯୋଗରେ ସେମାନଙ୍କୁ ଗିରଫ ମଧ୍ୟ କରାଯିବାର ଆଶଙ୍କା ରହିଛି। କରୋନା ସଂକ୍ରମଣ ଯୋଗୁ ଚାଇନା ଏବଂ ଅଷ୍ଟ୍ରେଲିଆ ମଧ୍ୟରେ ବିବାଦ ଦେଖାଦେଇଛି। ଏହାଯୋଗୁ ଅଯଥାରେ ଭାରତୀୟ ନାବିକ ଦଳ ହଇରାଣ ହେଉଛନ୍ତି। ଇତିମଧ୍ୟରେ ନାବିକ ଦଳ ପକ୍ଷରୁ ଘରକୁ ଫେରିବା ପାଇଁ ଭାରତ ସରକାରଙ୍କ ସହାୟାତା ଲୋଡ଼ି ଅନୁରୋଧ କରିଛନ୍ତି। ନାବିକଙ୍କ ପକ୍ଷରୁ ଗୌରବ ସିଂ ଏନେଇ ଭାରତ ସରକାରଙ୍କୁ ଅନୁରୋଧ କରିଛନ୍ତି। ଏସମ୍ପର୍କରେ ନାବିକ ଆନନ୍ଦ ଫର୍ନାଡିଜ୍ଙ୍କ ପିତା କହିଛନ୍ତି ଯେ, ତାଙ୍କ ପୁଅ ପ୍ରତି ୫ ମାସରେ ଘରକୁ ଫେରିଥାଏ। ସେ ଏପ୍ରିଲ୍ରେ ଘରକୁ ଫେରିବାର ଥିଲା। ମାତ୍ର କରୋନା ସଂକ୍ରମଣ ଯୋଗୁ ସମୟ ସୀମାକୁ ବୃଦ୍ଧି କରାଯାଇଥିଲା। ଗତ ୧୩ ମାସ ହେଲା ଆନନ୍ଦ ଘରକୁ ଫେରି ନ ଥିବା ସେ କହିଛନ୍ତି। ଚାଇନା ସରକାରଙ୍କ ନୀତି ଯୋଗୁ ଜାହାଜ ଗୋଟିଏ ସ୍ଥାନରେ ରହିଥିବା ଆନନ୍ଦଙ୍କ ପିତା କହିଛନ୍ତି।
