ଖୋର୍ଦ୍ଧା ଅଫିସ,୧।୮:ଖୋର୍ଦ୍ଧା ବ୍ଲକ ଅନ୍ତର୍ଗତ ଗଡ଼ହଳଦିଆ ହାଟସାହି ଗ୍ରାମରେ ଅଗ୍ନିକାଣ୍ଡ ଘଟି ମନୋରଞ୍ଜନ ପୃଷ୍ଟି ଓ ପ୍ରହଲ୍ଲାଦ ବେହେରାଙ୍କ ଘର ପୋଡ଼ି ପାଉଁଶ ହୋଇଯାଇଥିଲା। ଏଥି ସହ ସମସ୍ତ ଆସବାବପତ୍ର ନଷ୍ଟ ହୋଇଯାଇଥିଲା। ସ୍ଥାନୀୟ ପ୍ରଶାସନ ପକ୍ଷରୁ ଏହି ବିପନ୍ନ ପରିବାରକୁ କେବଳ ଜରିପାଲ ଯୋଗାଇ ଦାୟିତ୍ୱ ସାରିଦେଇଥିଲା। ସରକାରୀ ଯୋଜନାରେ ଘର ପାଇବା ଲାଗି ଏହି ଦୁଇ ପରିବାର ବ୍ଲକ ପ୍ରଶାସନଠାରୁ ଜିଲା ପ୍ରଶାସନ ପର୍ଯ୍ୟନ୍ତ ବାରମ୍ବାର ଦୌଡ଼ିଥିଲେ ମଧ୍ୟ ସୁଫଳ ମିଳିଲା ନାହିଁ। ଶେଷରେ ଭାଗ୍ୟକୁ ଆଦରି ଦୀର୍ଘ ୮ବର୍ଷ ହେବ ପଲିଥିନ ତଳେ ଦିନ କାଟୁଛନ୍ତି।
ସୂଚନା ଅନୁଯାୟୀ, ମନୋରଞ୍ଜନ ଗୁପ୍ଚୁପ୍ ବ୍ୟବସାୟ କରି ଚଳୁଥିବା ବେଳେ ପ୍ରହଲ୍ଲାଦ ଜଣେ ଦିନ ମଜୁରିଆ ଭାବେ କାର୍ଯ୍ୟ କରନ୍ତି। ଦୈନିକ କାମକୁ ଗଲେ ପରିବାର ଚଳେ। ଯାହା କିଛି ସଞ୍ଚୟ କରିଥିଲେ ଅଗ୍ନିକାଣ୍ଡରେ ଜଳିଗଲା। ସରକାରୀ ଯୋଜନାରେ ଘରେ ଖଣ୍ଡେ ପାଇବା ଲାଗି ବାରମ୍ବାର ପ୍ରଶାସନ ନିକଟରେ ଗୁହାରି କରିଥିଲେ ମଧ୍ୟ କେବଳ ଆଶ୍ବାସନା ଓ ପ୍ରତିଶ୍ରୁତି ମିଳିଲା, ହେଲେ ସହାୟତା ମିଳିଲା ନାହିଁ। ମାଙ୍କଡ଼ଙ୍କ ଦୌରାତ୍ମ୍ୟ ଯୋଗୁ ପଲିଥିନ ଫାଟିଯାଇଛି। ବର୍ଷା ହେଲେ ପାଣି ଘରେ ଜମୁଛି। ନୂଆ ପଲିଥିନ ପାଇଁ ଗୁହାରି କରିବା ସତ୍ତ୍ୱେ ମିଳିଲା ନାହିଁ। ଫାଟିଥିବା ପଲିଥିନ ସ୍ଥାନରେ ଆଳୁ ଅଖା, ସିମେଣ୍ଟ ବସ୍ତା ଜରି ଉପରେ ପକାଇ ଘୋଡାଇ ରହୁଛୁ। କରୋନା ପାଇଁ ମନୋରଞ୍ଜନଙ୍କ ଗୁପଚୁପ ବେପାର ବନ୍ଦ ରହିଥିବା ବେଳେ ପ୍ରହଲ୍ଲାଦ କାମ ନ ପାଇ ଘରେ ବସି ରହିଛନ୍ତି। ଫଳରେ ପରିବାର ଚଳାଇବା କଷ୍ଟକର ହୋଇପଡ଼ିଛି। ଚାଳ ଛପର ଘର ସଜାଡିବା ଲାଗି ଟଙ୍କା ନାହିଁ। ସରକାରୀ ସହାୟତା ନ ମିଳିଲେ ଘର ତୋଳିବା ସମ୍ଭବ ନୁହେଁ ବୋଲି ଦୁଇ ବିପନ୍ନ କହିଛନ୍ତି। ଏ ସମ୍ପର୍କରେ ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ଦିଗନ୍ତ ରାଉତରାୟ କହିଛନ୍ତି, ଏହି ଘଟଣାର ତଦନ୍ତ କରାଯିବ। ସ୍ଥାନୀୟ ବିଡିଓଙ୍କ ସହ ଆଲୋଚନା କରିବି। ସେମାନେ ସହାୟତା ପାଇବା ଲାଗି ଯୋଗ୍ୟ ବିବେଚିତ ହେଲେ ନିଶ୍ଚିତ ଯୋଗାଇ ଦିଆଯିବ ବୋଲି ସେ କହିଛନ୍ତି।
