କଟକ ଅଫିସ,୮ା୫: କଟକ ମାତାମଠସ୍ଥିତ ମହାନଦୀ କୂଳରେ ଥିବା ସିଲ୍ଭର ସିଟି ବୋଟ୍ କ୍ଲବ ଏବେ ନୂଆ ରୂପ ପାଇବାକୁ ଯାଉଛି। ପର୍ଯ୍ୟଟକଙ୍କୁ ଅଧିକ ଆକୃଷ୍ଟ କରିବା ପାଇଁ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ପକ୍ଷରୁ ଏହାର ପରିସରରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଜାରି ରହିଛି। ବିଶେଷକରି ବୋଟ୍ କ୍ଲବ୍ ପରିସରରେ ୮କୋଟି ଟଙ୍କା ବ୍ୟୟରେ ଓପନ୍ଏୟାର ଥିଏଟର୍, ଗ୍ଲାସ୍ ଡେକ୍, ଗେଷ୍ଟହାଉସ୍, ଫାଉଣ୍ଟେନ୍, ପିଲାଙ୍କ ପାଇଁ ପାର୍କ, ଟଏଲେଟ୍ ବ୍ଲକ୍ ଆଦି କାମ ଜାରି ରହିଛି। ଚଳିତମାସ ଶେଷ ସୁଦ୍ଧା ଏହି କାର୍ଯ୍ୟ ଶେଷ କରିବାକୁ ଓଟିଡିସି ଲକ୍ଷ୍ୟ ରଖିଛି।
୨୦୨୧ ମସିହାରେ ୧.୩୫ କୋଟି ଟଙ୍କା ବ୍ୟୟରେ ଏହାର ପାର୍କ ନବୀକରଣ କରାଯାଇଥିଲା। ପର୍ଯ୍ୟଟକମାନଙ୍କୁ ମହାନଦୀରେ ଦୁଃସାହସିକ ଜଳକ୍ରୀଡ଼ା ସହ ମନୋରଞ୍ଜନର ସୁବିଧା ଯୋଗାଇ ଦେବା ନିମନ୍ତେ ଓଟିଡିସି ପକ୍ଷରୁ ଏହି ୱାଟର ସ୍ପୋର୍ଟସ ପାର୍କ କରାଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଉଦ୍ଘାଟନ କରିଥିଲେ। ଏଠାରେ ପର୍ଯ୍ୟଟକମାନେ ମହାନଦୀର ମନୋରମ ଦୃଶ୍ୟକୁ ଉପଭୋଗ କରିବା ନିମନ୍ତେ ଏକ ଭ୍ୟୁ ପଏଣ୍ଟ, ସେଲ୍ଫି ଜୋନ୍ କରାଯାଇଛି। ସେହିପରି ବିଭିନ୍ନ ୱାଟର ସ୍ପୋର୍ଟସ ଯଥା, ଜେଟ୍, ସ୍କିଡ୍ ବୋଟ୍, କ୍ରୁଜ ବୋଟ୍, ପେଡାଲ ବୋଟ୍, ହାଉସ ବୋଟ୍ ଏବଂ ଫ୍ଲୋଟିଂ କାଫେ ବ୍ୟବସ୍ଥା ହୋଇଛି। ଏତତ୍ବ୍ୟତୀତ ପର୍ଯ୍ୟଟକଙ୍କ ପାଇଁ ଓଟିଡିସି ପକ୍ଷରୁ ଏଠାରେ ଏକ ରେଷ୍ଟୁରାଣ୍ଟ କରାଯାଇଛି ା ବିଶେଷକରି ପର୍ଯ୍ୟଟକଙ୍କୁ ଉନ୍ନତମାନର ସେବା ଯୋଗାଇ ଦେବା ପାଇଁ ନିଗମ ପକ୍ଷରୁ ଉଦ୍ୟମ ଜାରି ରହିଛି।
ଦ୍ୱିତୀୟ ପର୍ଯ୍ୟାୟରେ ୮ କୋଟି ଟଙ୍କା ଖର୍ଚ୍ଚ କରାଯାଇ ଏହାର ପରିସରରେ ବିଭିନ୍ନ ଉନ୍ନତିମୂଳକ କାର୍ଯ୍ୟ କରାଯାଉଛି। ଅଧିକାଂଶ କାମ ଶେଷ ପର୍ଯ୍ୟାୟରେ ପହଞ୍ଚିଛି। ୨୦୦ରୁ ଊର୍ଦ୍ଧ୍ୱ ଲୋକ ବସିବା ପାଇଁ ଓପନ୍ଏୟାର୍ ଥିଏଟର୍ ନିର୍ମାଣ କରାଯାଉଛି। ଏଠାରେ ବିଭିନ୍ନ ଉତ୍ସବ ଓ କାର୍ଯ୍ୟକ୍ରମ ଆୟୋଜନ କରାଯାଇପାରିବ। ସେହିପରି ମହାନଦୀ କୂଳରେ ଏକ ଗ୍ଲାସ୍ ଚଲାପଥ ନିର୍ମାଣ ଚାଲିଛି। ନଦୀ ମଧ୍ୟକୁ ଲୁହାର ଏକ ତାଜା ବାହାର କରାଯାଇଛି, ଯାହାର ତଳଭାଗରେ କାଚ ପକାଯିବ। ପର୍ଯ୍ୟଟକମାନେ କାଚ ଉପରେ ଛିଡ଼ା ହୋଇ ପାଦ ତଳେ ମହାନାଦୀର ପାଣିକୁ ଦେଖି ପାରିବେ। ଏହାକୁ ଅଧିକ ଆକର୍ଷଣୀୟ କରିବା ପାଇଁ ବିଭିନ୍ନ ରଙ୍ଗର କାଚ ଏଥିରେ ବ୍ୟବହାର କରାଯିବ। ଶିଶୁଙ୍କ ପାଇଁ ଏକ ପାର୍କ ପ୍ରସ୍ତୁତ କରାଯାଉଛି, ସେଠାରେ ବିଭିନ୍ନ ଖେଳ ସାମଗ୍ରୀ ରଖାଯିବ। ସେହିପରି ଏହାର ପରିସରରେ ଏକ ଟଏଲେଟ୍ ବ୍ଲକ୍ ଓ ଖୋଲା ସ୍ଥାନରେ ବଗିଚା କରାଯାଇଛି। ବୋଟ୍ କ୍ଲବ୍ ପ୍ରବେଶପଥର ମୁଖ୍ୟ ଫାଟକକୁ ନୂତନ ଭାବେ ନିର୍ମାଣ କରାଯିବା ସହ ବାହାରେ ଗାଡି ପାର୍କିଂ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଏଥିସହ ବୋଟ୍ କ୍ଲବ୍କୁ ସଂଯୋଗ କରୁଥିବା ରାସ୍ତା ଶୋଚନୀୟ ହୋଇପଡିଥିବାରୁ ଏହାକୁ ନୂତନ ଭାବେ ନିର୍ମାଣ କରାଯାଇଛି ବୋଲି ଓଟିଡିସିର ଜଣେ ଅଧିକାରୀ ସୂଚନା ଦେଇଛନ୍ତି। ଏ ସମ୍ପର୍କରେ ଶେଖର ସ୍ବାଇଁ ନାମକ ପର୍ଯ୍ୟଟକ କହିଛନ୍ତି, ସହରରେ ଏଭଳି ସ୍ଥାନ ଅନ୍ୟ କେଉଁଠି ନାହିଁ। ସନ୍ଧ୍ୟାରେ ଏହି ସ୍ଥାନରେ ବସିବାକୁ ଭଲ ଲାଗେ। ଏଭଳି ସ୍ଥାନ ଅନ୍ୟମାନଙ୍କୁ ନିଶ୍ଚିତ ଭାବେ ଆକୃଷ୍ଟ କରିବ। ସେହିପରି ସ୍ଥାନୀୟ ବାସିନ୍ଦା ସ୍ନେହାଶ୍ରୀ ପ୍ରିୟଦର୍ଶିନୀ କହିଛନ୍ତି, ସବୁ ବର୍ଗର ଲୋକଙ୍କ ମନୋରଞ୍ଜନ ପାଇଁ ଏହା ଉପଯୁକ୍ତ ସ୍ଥାନ।
