ସମ୍ବଲପୁର/ଭୁବନେଶ୍ୱର, ୨୬।୮ (ବ୍ୟୁରୋ): ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ) ସହାୟତାରେ ସମ୍ବଲପୁର ଜିଲା ବୁର୍ଲାସ୍ଥିତ ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟରେ ଦେଶର ପ୍ରଥମ ମହାକାଶ ଅନ୍ବେଷଣ କେନ୍ଦ୍ର ଖୋଲାଯିବ। ଏ ନେଇ ଇସ୍ରୋ ଓ ଭିସୁଟ୍ ମଧ୍ୟରେ ମଙ୍ଗଳବାର ଭର୍ଚୁଆଲ ଚୁକ୍ତି ସ୍ବାକ୍ଷର ହୋଇଛି। ଇସ୍ରୋ ଅଧ୍ୟକ୍ଷ ଡ. କେ. ଶିବନ, ବୈଜ୍ଞାନିକ ଡ. ଉମା ମହେଶ୍ୱରନ, ରାଜ୍ୟ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ କମିଶନର ସଞ୍ଜୟ ସିଂ, ଭିସୁଟ୍ କୁଳପତି ପ୍ରଫେସର ଅଟଳ ଚୌଧୁରୀ, ଇସ୍ରୋ ଡେପୁଟି ନିର୍ଦ୍ଦେଶକ ଡ. ବିଜନ ଦାସ ଉପସ୍ଥିତ ଥିଲେ। ଏହା ଦେଶ ତଥା ରାଜ୍ୟରେ ଇସ୍ରୋ ସହଯୋଗରେ ହୋଇଥିବା ପ୍ରଥମ ମହାକାଶ ଅନ୍ବେଷଣ କେନ୍ଦ୍ର। ଏ ନେଇ କୁଳପତି ଚୌଧୁରୀ କହିଛନ୍ତି, ଭିସୁଟ୍ ପାଇଁ ଏକ ଐତିହାସିକ ଦିନ, ଯାହା ଆଉ ଏକ ସଫଳତା ଆଣିଛି। ଛାତ୍ରୀଛାତ୍ରଙ୍କୁ ଏହା ପ୍ରେରଣା ଓ ମାର୍ଗଦର୍ଶନ ଦେବ ବୋଲି ସେ କହିଛନ୍ତି ା
ସୂଚନାଯୋଗ୍ୟ, ଇସ୍ରୋ ପକ୍ଷରୁ ମହାକାଶ ଅନ୍ବେଷଣ ଉପରେ ଦେଶର ୬ଟି ସ୍ଥାନରେ କେନ୍ଦ୍ର ଖୋଲିବାକୁ ୨୦୧୮ ଡିସେମ୍ବରରେ ଘୋଷଣା କରାଯାଇଥିଲା। ୨୦୧୯ ସେପ୍ଟେମ୍ବରରେ ଇସ୍ରୋର ଏକ ପ୍ରତିନିଧି ଦଳ ଭିସୁଟ୍ ପରିଦର୍ଶନ କରି ଫେରିବା ପରେ ଏଠାରେ ମହାକାଶ ଅନ୍ବେଷଣ କେନ୍ଦ୍ର ଖୋଲିବାକୁ ନିଷ୍ପତ୍ତି ନିଆଯାଇଥିଲା। ଇସ୍ରୋ ପକ୍ଷରୁ ଛାତ୍ରୀଛାତ୍ରଙ୍କୁ ଗାଇଡ୍ କରାଯିବ। ଏଥିପାଇଁ ୫୦ ଲକ୍ଷ ଟଙ୍କା ବ୍ୟୟ ଅଟକଳ ରହିଛି। ୩ଟି ପର୍ଯ୍ୟାୟରେ ଇସ୍ରୋ ଏହି ଅନୁଦାନ ଯୋଗାଇ ଦେବ।
